Dhihamte Qhamu He Thiqitanenu Ateexi
2
Hussa maallay olissa an apaqhnina qhamu ini mayyaqhneppa pataninnu uuma he tiqthadhe ine gheeqasa.
2 Kʼaalessi erkampatadhdhettay qallamtiki theye oohaminti kodhdhipa he hikkate sarpepa heye eeʼe paye kʼitʼaathe gheeqasasi akkadhonkipa
3 inekka isa dhinko hasa dhammasi dhafaani payni mala pinne alkasnaani?
Dhinku hasa ligha paayyotatte Pogholho Iyyesuse uso qalli,
he Usona apaqhekka ine qallonki,
4 Haallikko milikkitaadhdhepa dhahxootaadhdhepa olho koro murkisa qawni qawnittakki qhamo woʼo huusu kula teexakidhdhe Nasso Kʼulkʼullito qhootamettay olisaasi arasi.
Iyyesuse Miʼaadhe Korito Kulaki Kodhdhi
5 Haallikko perri hantu anthorruyni karo miinatte okaynana erkampatadhdhe qhamu rafisnennu ye payu.
6 Ladhdhi xayto pileete hasi payti:
“Ahhela uso thaaynannu qhawho moʼo?
Annu he ghananu miʼaye qhawhito moʼo?
7 Erkampatadhdheete okkoto aʼuso qhacʼasti,
kaanastepa ghulno nu teexa,
8 olho kaasay qhamu nu eeʼe payninu luhhe huusuna kalay kodhay.”a
Haallikko iʼolho kaasassi qhamu nu eeʼe payni kodhana olhu yenu eeʼe payni ye qaghi,
ikkodhitama kapay xeere hantunna olho kaasay innu eeʼe payana ini hiine.
9 Naqharray Iyyesuseessi qhoota miʼaadhe korito kaasay maallay teexakko Haallikkitottay qhamu farrinu aʼerkampatadhdheete okkotto Uso qhacʼasi,
qhoota haani maallay fare huusuttay,
hantu akaanastepa ghulno nu teexanakki an hiinaani.
10 Hossi olho kaasay usoosippa usottay qaaki Haallikko,
koro kishaasi karo kaanastatte okaasenu,
hossi ithawanpakko dhinko huusundhina kodhdhi Iyyesuseesi rakkottay ho olho toʼokokka yena qaghi kodhepa hiʼaase olho gheeqasa ikkodhi.
11 Ho koro kʼulkʼulessapa he kʼulkʼulawa dhelle appa toʼokito qhooti kodhdhe maallay Iyyesuse qassawhe haayyu na payepa ooqenu ye palami,
12 holuppa hasi payamti:
“Makaxko haahusi qassawhe haayyunu an qallina,
waarsho haahu kittemakka qhallitako nassawnkitottay anho kalataysanna.b”
13 Laadhdhi,
“Kippo haayyu Uso.”
Holuppa hasi payamti:
“Haadhi Anopa miʼaadhe Haallikko ye teexi.”c
14 Miʼaadhisakka qhamu kʼeeqhtepa sakankottay toʼoke kodhdhe kula Iyyesusekka qhamo huusundhi kʼeeqhtepa sakanko inna qale kodhdhi,
husakka Seetʼanassi humna fartatte sheeghaasi farte thuusuttay patisepa
15 he perre huusundhi kaasanna ghaapko aylinko fartatena kalla qaghaasi hasa lihasenu.
16 Uso erkampatadhdhe kʼarkʼarenu ye kodhdhunna sanynye Aprihaame kʼarkʼarenu qhamu okaysa karay ho arami.
17 Hussa maallay olho kaasattay qhamo miʼaadhe korito kula kodhdhe ho gheeqasa kodhdhu,
husakka qhamu Kʼeesitto Kʼeesadhdheette Ghula ho koro hxurapa dhukkaysathama kodhdhinipa Haallikkonu kodhadhettay waarshonu cʼuppito alhesame tayasunu.
18 Usokka xeeressi themammina qhooti rakko akkadhi maallay he themmammaasi kʼarkʼare iʼalkasana.