Iyyesuse Muusena Ighghula
3
Hussa maalla hune kʼulkʼulawhessi ooqmaththo moonthito paqhate koro haayyu,
Erkampakkossi dhukkaysadhe thaani arasa Kʼeesito Kʼeesadheete Ghula Iyyesuseesi patta dhihadhindha.
2 “Muuse qhamu Manne Haallikkitosa dhukkaysathami kula.”a
Usokka hossi Uso xawwadhi Haallikkonu ho dhukkaysathami.
3 Qhawho manne gupadha qhamu mannissa ighghupadhina ghutay kaasnaste ghula sheeghi kula Iyyesusekkea Muusena ghutay kaanasete ghulakki sheeghi.
4 Mannadhe kaasaasi ho ghupadha ishsheeghe,
naqharray ho olho kaasasi ghupadhi Haallikko.
5 Muuse olhossi karo miinatte Haallikko ikkodhamanna payiisi iqqallipa manne Haallikkito kaasasa kodhampakko dhukkaysathama kodhdhu,
6 Kristoose kapay manne Haallikkitona miʼaye dhukkaysathama.
Inekka kippossi an shahxumnitappa isa peepadhanitakki an kokkisani payni ine manne huusu.
Dhihaamte Qhamu Ye Dhukkaysadhe Hxurrenu Ateexi
7 Hussa maallay qhamossi Nasso Kʼulkʼullo payina:
“Kuyyukka Aʼuso apaqhte payyni,
8 qhamossi kuyyaqko thematattena appadhe hahundhi piyye mandhitosa ya paqhto haqise kula
hunekka saqqe haahundhi olo lulise.
9 Xinkisana uumi ye themme
koodhmo haayyusikka perko hudhanko salax saasa eemonki.
10 Hussa maallakki an dhalathisasa miirodhi;
hasakka paya;
‹Saqqe huusundhi xeere kaasakki dhappe
onke thaayyusikka ye aronki›
11 Hussa maallay miira haayyuttay moʼokka payni karo hxaysinko haayyu kula ye xulline kan paypa akutadha.b”
12 Koro haayyu,
hunena kittatte yaxakka saqko maghakopa hoye dhukkaysadhi ho Haallikko qaghampakito kaalla uso ghorasasna qhamu ye sheeghininu ihhe tiqthadhi.
13 Naqharray hunena kittatte yaxakka qhamu ye cʼuppottay tatakamnippa saqko huusu nalulunnu,
kuyyaqakossi “kuyyu” apaypa isa ooqa iqqaghana kuyyaqako kuyyaqakooma ille dhikitisa.
14 Dhukkaysadhessi an payyotenu sheeghnisikki an haaka dhikkatte saasa kokisneppa ghapadhaani payni he Kristoose qale qhootadhakki an kodhdhinaani.
15 Husakka qhamu hasa payamti kula:
“Kuyyukka Uso apaqhte payni,
qhamossi appaqhato haqiste kula,
hantukka saqqe haahundhi inni lulonki.c”
16 He apaqheppa paqhto haqisonki koro yaxay?
Hessi Muuse piyye Kiptʼattena lihasi kaasay qandhi?
17 Hessi perko hudhanko salax inna miiroodhi hinka?
Hessi cʼuppo kodheppa pukkaqqe huusundhi piyye mandhitosa na haqhonki qandhi?
18 Hessi ye eeʼe payonki malettay he qhamu ye karo hxaysinkito xulinennu iʼakutadhi hinka?
19 Lammi hu xulle ye alkasonki dhukkaysadhe hxure thuusundhina haqti qhamu kodhdhisa an araani.