Erko Erkampakko Pawloose
Filmoonanu
1
Ano Pawloosessi qhoota Kristoos Iyyesuse maallay shapamipa qhawho haani Tʼimothoose,
hossi an uuma cʼikanni dhalitho haanipa hossi ine qale kodhadha Filmoonanu.
2 Alawte thaani Apifiyapa hossi ine qale wothadherito Kristoose kodhdhi Arkipaasepa manne toʼokunko koro dhukkaysadha haahuna maneete qaghanu.
3 Teexakkopa nakayyho Haallikko Pappo haaninapa ho Pogholho haani Iyyesus Kristoos ihhune qale kodhdha.
4 An ghisoote thaayuttay hoosi hela ghadhana kuyyaqko kaasakki an Haallikko hayyuusi kalataysadhi,
5 moʼo maalla payni dhukkaysadhe Appogholho Iyyesuse dhukkaysattipa cʼikno akʼkʼulkʼullawhe kaasannu sheeghtiisi an apaqhi.
6 He Kristoose kodhdhe haanittay olho xeesa an sheeghni kaasay qhama arintipa dhukkaysadhe thaahusikka koro pilenu hiʼaasettay kokkisadhannu anho ghissadha.
7 Qhawho haayyu,
saqqe kʼulkʼullawhateesi qhoota hxaysisti maallay cʼikno haahuna hxasopa dhikitno dhammaasikki an tayadhi.
8 Hussa maallay olho kodhe ho gheeqasitiisi ho hayenu an Kristoosettay shahxumte sheeghi kakki payni,
9 cʼiknottay anho waathadha,
lammi ano Pawloosessi keeshuyipa hantu Iyyesus Kristoose maallay shapama,
10 miʼayessi haayyu ammanne shappeetena qaghana an Pogholhottay nu appa kodhdhi qhoota Onesmoosea anho waathadha.
11 Xayna qharreʼitha uso hoho pakirra qandhikka,
hantu kapay ho yeesippa hoosi pakirra ikkodhdhi.
12 Qhawhossi an uuma cʼikadhipa isannu he ghadhasikki anholi hokula eraka.
13 Qhoota wonkelattenu an shapamina qhamo haahu qhamu kodhdhinipa ye kodhadhunukki anhe kapa haqhsadhe woʼi ahxay,
14 naqharray olho xeesa akkotti kaasasi woʼottay dhiishoy kittettay qhamu ye kodhininnu anu ho qale thorruyadhunna olo thoʼokakka kodhe anu woʼu.
15 Yaxarakka hu kuyyaqqe qhacʼa hola kaanta reehammi,
qhama uso akkadhintipa kuyyaqqe kaasay ho qale qaakonnuye.
16 Xaynu koruy uso qhamo aylithito qandhikka,
naqharray yeesikki qhawho haayyu an Pogholhottay uuma cʼikadhi ikkodhdhakkakki payni,
laadhhi malakki hoosi Pogholhottay ho aylithito ghutay ghula qhawho haahu aʼuuma cʼikatti yeho kodhhini.
17 Lammi qhawho ho qale kodhadha kulakki ayye dhihti payni qhama yeesi akkatti kula usoosikka akkadh.
18 Olhu hola dhappi qaghna payni takki pasante thaahu naqaghakka payni yeema dhiha.
19 Olho naqaghaasi anho murra ho payipa xarghghe haayyuttay ho tooxo ano Pawloose,
ikkodhakka payni athokka qhama Pogholhottay hayyu kodhitisa ho qalle yeye gheeqasti.
20 Eeppa qhawho haayyu,
olissa xeesa qhama kontnu Pogholhottay an ho wathadha.
Kristoosettay saqako hayyusi ye hxaaysis.
21 Ho eeʼe paya qhama kodhdhintisa dhukkaysadhettay olho an hola kasqadhina ghutay qhama kontisa arettay taptaappisikki anho tooxi.
22 Husinna pile,
ghisoote thaahundhi qhamu malse tayadhintipa karo haahudhi okayasa qhoota kippo kodhi maallay xayto anna salli ye gharisa.
Ille Nakaysadhe
23 Hossi qhoota Kristoos Iyyesuse maallay ye qale shapama Epifaarakka nakayyho ihhola payi,
24 holuppa hessi ye qale kodhadha Markʼoosepa Aristʼokoosepa Temaase pana Lukʼaasekka nakayyo ihhola paye.
25 Teexakko Pogholho haani Iyyesus Kristoose ihhune qale kodha.