Teekolakoosi Dhafe Ye Gheeqsati
2
Koro haayyu,
he Pogholho haani kaanasami Iyyesus Kristoose dhukkaysadha qhama kodhdhite kula teekolakoosi olo dhafi.
2 Qhawho tʼukitte warkʼatte qadhdhadhipa laalledhdhe xeesa qadhdhadhukki xayto atoʼokunkottay illa holte kula xullinapa holu qhawho teekollakko ho lalladhdhe huusu na oskakoodhekka xullu payni,
3 ho lalladhdhe xeesa qadhdhadhinu kaanaste the qawni nu hiʼaasettay:
“Qakatte xeesay aho gharsi haadhi” napayankuppa teekollakko iʼokayina kapay;
“Atho haama shikkaar” taakki:
“Luhhe haayyuna kalay piyyeema qakkadh” napayanku payni,
4 hussa hune he tookosi tookito ghulasa payyo qandhi?
Holuppa hune he dhihadhe maghattay ghapamteppa isa qhaqhitte qhaqhanku qandhi?
5 Hune cʼikathamte Koro hayyu:
apaqhasindha!
Haallikko dhukkaysadhettay shorokke qhamu kodhdhineppa ahxasessi he uso cʼikadhanu ikkippo teexisi tayonkinnu teekollawhe piyyinaasi ye qholadhuy?
6 Hune kapay teekollawheesi appalamiste.
He hune rakkisa shorokke qandhi?
He hune kittesapa isi manne qhaqhitatte kula hunettay ashsha usundhe qandhi?
7 Usundhe he makaxkossi kaanasami ahunettay ooqisi dhaghghisa qandhi?
8 Hikkesi Ahxase Haallikkitona “Qhawhoosi qhamo haahu kula cʼikadhaa” payamtipa matʼafaama tooxamosiki akkote payni olho xeesa akkotte.
9 Naqharray qhawho tookosi tookito ghulaste payni cʼuppo akkotte,
qhamo hikke payti kulakka hune dhapampawhe,
10 moʼo maallay payni ho hikke kaasasi tiqthadhapa isi toʼotte dhappa qagha payni,
qhamu hissa kaasanna dhappisa innu dhihamti.
11 Hikkessi iyya:
“Olo palakumi.”
Isikakki iyya:
“Olo poghi.”
Athu palakumtipa naqharray isa qhawho pogha payni,
ho hikkatte dhappa akkodhiti.
12 Aqqaladhankunakka ikkodhdha akkodhankunakka qhamo koro hikkessi hxuransadhe koro teexa miinta shikkarra kula kodhdha,
13 moʼo maalla payni qhaqhitte Haallikkito qhawho ye hxurakko hxurinu ye hxurti.
Ikkodhitama kapay hxurakko qhaqhitatte ighghula.
Dhukkaysadhepa Kodhmo
14 Koro hayyu,
qhawho tookko payna dhukkaysadhe an sheeghipa kapay isi dhukkaysadhisaasi kodhmo xeesatay ye hiʼaasi payni moʼo uso pakirti?
Dhukkaysadhe hasa lighay iʼuso dhinisnay?
15 Lighnonuy koro aʼillay Haallikko dhukkaysattenna kittatte shampo tookko takki sheththe tootte qaghnapa olhu urkuyneppa hu yiine dhaponkippa
16 hunena kittatte qhawho tookko napayu:
“Nakayhottay ashshindha!
Olo oshoonadhe,
dhalaxa!”
napayunippa olhu yiine takki hu urukuyne yenu teexu payni moʼo usundhe pakirri?
17 Qhamussa kula dhukkaysadhe kodhmo xeesattay ye armatti the farti.
18 Naqharray qhawho tookko payna:
“Atho dhukkaysadhe ashsheghti,
ano kodhmo an sheeghi.”
“Dhukkaysadhe thaahusi kodhmito reehhipa ye hiʼaasay,
anokka dhukkaysadhe thaayyusi kodhmotakki anho hiʼaasniye.”
19 Atho “Haallikko toʼokko qaghab” appaytipa isa adhdhukkaysadhay,
hussa olho xeesa,
nassidhdhe maghumakka qhamussa kula idhdhukkaysadha,
ghapkottay isi xotholadha.
20 Atho qeepakko,
dhukkaysadhe qhamu kodhmo maalle ye olo thoʼokokka kodhe ye alkastisa are awwoʼay?
21 Appa haani Aprihaame xinkessi miʼaye huusu Yisaakʼeesi xayto ana teexako dhilisa texakonu itʼtʼosina kodhmottakki Haallikko miinatte ho pare qagha kodhdhi qandhic?
22 Husittay dhukkaysadhepa kodhmo he ille qale kodhadha qhamu kodhdhisaki aʼarti,
dhukkaysadhe kodhmotakki the gharti kodhdhiti.
23 Kʼaalessi Matʼaafe Kʼulkʼullawhatte iyyanna:
“Aprihaamekka idhdhukkaysadhi,
dhukkaysadhe thuusukka pare qaghunko kodhdhippa nu dhihamokkid” dhikkadhi,
usokka dhaliththo Haallikkito payamue.
24 Lammi thannu dhukkaysadhettay patta ye kodhdhunna qhamu kodhmotakka Haallikkito miinatte ho pare qagha kodhdhisa aʼarte.
25 Holuppa xiskattossi palakunkottay qaakay Reʼaape xinkesi he piyye qiwenu okayesi akkatipa onke pilettay laghghasinna kodhmottakki Haallikkito miinatte the pare qaghay kodhdhiti qandhif?
26 Qhamussa kula pishko napsatte rehhammi qhamu ho fari kodhdhi kula dhukkaysadhe kodhmito rehhammitikka the fartti.