Erko Yaykʼoope
1
Ano Yaykʼoopessi kodhampakko Haallikkitopa ho Pogholho Iyyesus Kristoose kodhdhi.
Hune hessi Iyesus Kristoose dhukkaysatte kafkossi Israʼeelatte hudhanpa lakki xayto kaasay pullamtenuy,
nakayho ihhune kodhdha.
Themmattepa Dhuupaythe
2 Koro haayyu,
rakko qawni qawni ihhuna dhaghghapana qhama olho xeesa attayatte kula dhihadhindhapa hxasoodhonkuy.
3 Moʼo maalla payni dhukkaysadhe thaahundhi themmammiti qhamu dhuupaythe hune tayasintisa aʼaranku.
4 Dhuupaythe thaahundhi te olo toʼokokka yena erqipa yena qaghi hoqhqho qhama kodhdhintennu ikkodhmo kotta.
5 Hunena kitatte yaxakka ho arnane na qhacʼekki qagha payni,
hossi ye koro dhafunna kaasannu xorxuntettay teexa Haallikkoosi ighghisadhama innu texnaye.
6 Naqharray yehe ghadhunna idhdhukkaysadhettay ghissadha,
moʼo maalla payni qhawho he ghadha qhamo qhawho ururettay susughghuramapa isi qhamo qandhessi pasito kula kakanthulama.
7 Qhawhussa ho Haallikkito kaanta olho tookko tayanna inti nu lighuy,
8 moʼo maallay payni qhawho hasa ligha ho dhihadhe lakkitay ghapamipa isi dhihadhe totteema ye shikkaari.
Qaako Qhawho Qhacʼanapa Ho Shorokkithito
9 Qhawho qaako qhaʼca qaakasi Haallikko qhooti qila pasni maallay ihxhxasoodhi.
10 Shorokunkko qhawhito qhamo piso qashkito kula qhooti hayyni maallay shorokittoosi Haallikko kata pasi payni ihxhxasoodhi.
11 Oqhqhaye thorno hiisi illakki lightipa qashkoosi isi xaxoosay,
pisokka ihhayyina,
xeesnokka na patuy,
qhamussa kula shorokittokka inni kodhmo shorokunkito kala patta heranakki panni.
12 Qhawho themmatte dhuupadha ho sakami,
moʼo maalla payni themmatte dhuupadhi payni kippossi Haallikko he Uso cʼikadhanu teexni,
shillimathessi qaghito ittayanni.
13 Yaxakkakki themmammi payni,
“Haallikko ye theemmi” ippaye hxura,
moʼo maalla payni Haallikko maghnottay ye theemmammi holuppa yaxassikka maghnottay ye themmi.
14 Naqharray qhawho kaasay hu themmammi yookunte thuusu maghattakki akkamipa isi tatakama payni.
15 Yokkunte maghay ishsheeghti tupettay cʼupposikki dhalti,
cʼuppokka ighghohi tupettay farteesikki dhali.
16 Hune hessi cʼikathamte koro hayyu,
olo tatakame!
17 Teexakko xeesapa sake meethe yena qaghe kaasay Haallikkito kantaye,
husakka hu okayni Haallikko papposi hammakito qhamo kassatte ye lallaghamipa ye oʼoohamina.
18 Haallikko uumatha huusuna qhama qharumadhdhe kodhdhinaninnu qhamo woʼo huusu kula kʼaale dhukattetakki ine dhali.
Apaqhepa Kodhmito Nakeese
19 Hune hessi cʼikathamte koro haayyu,
husiisi hela thaaya,
qhawho kaasa ho apaqhenu waadha,
ho qalladhenu oladha,
ho mirodhenukka oladha ikkodhdha,
20 moʼo maalla payni miira qhawhito pare qaghunko Haallikkitoosi ye tayasni.
21 Hussa maallay lokmepa maghno kaasattay qaakesi hela hxurapa kʼaalessi napse thaahundhi dhinise alkasnay kitte thaahundhisa dhishshamtiisi laaluntettay akkadhankuy.
22 Olho kʼaale paytiisi kodha dhiishoy he apaqha patta olo kodhdheppa isa he tatakanku.
23-24 Ho kʼaaleesi apaqhasapa isi olhu paytiisi ye kodhi qhamo qhawho eemadhottay hela miinte eemapa iʼshshi tupettay,
haamakata qhamu maala lighiisa isi thaymoodhi kulakki lighi.
25 Naqharray qhawho hikkessi ashoote koro lihasay meethe yena qaghiisi toomoma eemapa isi kodhettay dhikita,
holuppa thessi apaqhiisikka isi kodhapa isi ye thayymoodhi kodhmo huusuttay issakamna.
26 Qhawho qallithe pako huusuna lighaasi ye tiqthadhunna iyya Haallikko an dhukkaysadhi hohe tataka,
dhukkaysadhe thuusukka thaythe.
27 Dhukkaysadhe Haallikkito miinatte alhesamitipa isi meethe yena qaghe thisi,
miʼaadhe ahxke na farreppa xiske tʼiire na farre rakkito kʼaarkʼarepa lokme piyyina he tiqthadhe.