Maghno Perre Dhikkattattena Kodhdhamanna
3
Naqharray perre dhikkattattena xeere koro rakkisna qhamu okaynessa ara.
2 Koro ho pukaqate thuusu patta cʼikadha,
ho pirraadhdhe cʼikadha,
hohe peepa,
hohe paasesa,
ho dhaghghisama,
he ahxkenu ye eeʼe paye,
he Haallikko teexa ye paye,
he ye kʼulkʼulnko sheeghe,
3 he ye cʼikno sheeghe,
heye ararame,
he koro hxashsha,
heye pukkaqte thuusundhi tiqadhe,
shahxawhe,
he olho xeesasi shikka,
4 he marmadha,
he waadha,
he peeppo lathuttay hoqhqhe,
he olho Haallikko hxasesana kaanta ho usundheesi hxaseesa patta cʼikadhakki kodhdhine.
5 Usundhissa he Haallikko ghaapakki lighe naqharray humna Haallikko ghaapeteesi immarmadhe.
Koro hasa lighana kalla siikapuy!
6 Usundhisaka he looxattay mannadhe kalaʼitha aʼashapa xiske cʼuppo nanaqiisi karo ghulattay he dharaʼo magha kitta xulleppa nassottay tardhoonkiisi isi he kula holasa.
7 Xiske hasa ligha he kuyyaqko kaasay kolladha,
naqharray moʼo kakki payni dhuke are kula hxafe ye alkasne.
8 Iyyaneesepa Iyyanpreesea qhamu Muuse toore kula usundhisakka he kʼalpe napatipa dhukkaysadhatte ranokki maallay dhukeesi ittoora.
9 Qhamu qeepunte Iyyaneeseppa the Iyyanpreese armatti kula qeepunte thuusundhi qhooti koro kaasa miinta armatti maallay yenu gharinti.
Dhihamte Pawloose Tʼimothoosenu Teexi
10 Atho kapay kollinkko haayyupa ashanko haayyupa alaama haayyupa dhukkasadhe thaayyupa dhuupaythe thayyupa cʼikno hayyupa kokkisadhe thaayu kaasasi paarema ahhitipa isa aray.
11 Holuppa ghoghoramepa rakko haayyusi aʼaray;
olho piyye Antʼokiyappa piyye Ikʼooniyyoneppa piyye Listʼirasa yadhaghghapipa dhuupaytha akkadha ghoghorame thayyuusi aʼaray,
Pogholho kapay hussa kaasanna iyye pinnisi.
12 Karay he Kristoos Iyyesuse kodhdheppa Haallikko ghaapettay isi qaake woʼa kaasay ighghoghoramna.
13 Maghghawhepa he koro tataakka kapay idhdhappapa isi koro dhapisa,
maghno sappeema maghno padhaawettay isi ashsha.
14 Atho kapay hussaasi yaxana qhama kollatisa aʼarayye hossi akkolatipa upadhattay kokkisadhpa qaakoy.
15 Miʼayunko haahunu payyatti Maatʼaffe Kʼulkʼullawhessi arnaane Kristoos Iyysusese dhukkaysadhettay dhinko koro tayasa na qaghesi aʼarayye.
16 Matʼaaffe Kʼulkʼulawhe kaasay qhoota Nasso Haallikkitottay kodhdhi qhari atooxoy maallay,
kollisepa qheerepa gheteʼisepa onke pare qaghinkitonu dhihamenukka ikkoro pakira,
17 hussakka qhawho Haallikkito kodhmo xeesa kaasay kodhenu ho ghari qhamu kodhdhinipa tayammunu.