Kodhampakko Kristoose Dhukkaysathama Kodhdhe
2
Lammi miʼaye haayyu,
teexakkossi Haallikkito Kristoos Iyyesusena tayamattay kokkisadh!
2 Kollinkossi koro kisha minteema ayyela apaqhtiisi he koro pile kollise alkasna koro dhukkaysatamanu atara teex.
3 Qhamo serawithitto Kristoos Iyyesuse xeesa kula kodhdhipa ye qale rakko akkadhay.
4 Holuppa qhawho serawithinko kodhadha hayampakko huusu hxaseesenukki kokkisadhi dhiishoy kodhmo pilettay ye ghapami.
5 Qhamussa kula qhawho koro pile qale xaakkumakka tampe xaakumateesiki ye thiqthadhunaki xaakkumi payni shillimaathe kammaasi ye akkanni.
6 Qhothampakko kokkisadhakka ho manghusaasi qharriteema ghimanna uso.
7 Olho an ho qalliisi pareema ghapadi;
Pogholho olho kaasattay thaayho ihho teexnaye.
8 Iyyesus Kristooseesi fartatte haqi,
sanynye Taawitena kodhdhiisi hela ghadha,
wonkele ano qallikka haadhi thisi.
9 Qhoota wonkelissa maallakki an qhamo qhawho dhappitte kodhi kula haka shapamni saasa rakko akkadhi,
Kʼaale Haallikkito kapay ye shapaminti.
10 Lammi hessi qholame qhamu dhinkossi Kristos Iyyesusettay qaghaasi kaanaste perre ye humme sheeghe illay tayannenukki an payipa isan qhoota huusundhi olho kaasasi dhuupadha.
11 Kʼaalessi iyyanna:
“Uso qale an farrini payni,
Uso qale an qaghnaani.
12 Dhupaythettakki an kokkisanni payni,
Uso qale an poghulumnaani
An uso marmanni payni,
Usoka iʼine marmanna
13 Ini dhukkaysathamoonikaki payni,
Uso qhooti yehe marmadhi maallay,
xeere kaasay dhukkaysathemetakki qaakni” the dhukkaysathama.
Kodhampakko Kokkisadha
14 Oliisaasi nathaayise olo hxuri,
qhamu ye illena pako dhappineppa ille thamakadhe kitta xulonkinnu Haallikko miinta usundhe dheeh,
husi olho ye koro pakiripa he apaqhasaasikka isi pulaye.
15 Qhamo kodhampakko ye palamipa isi kʼaale dhukatteesi pareema koro hxulisa kula Haallikkito miinatte dhukkaysathame tayadhenu kokkisadh.
16 Qallithe lathu the Haallikko yena kaanasamina kalla sikaapuy,
koro olho hasa lighattay ghapami Haallikkito kaanta issikkapuyapa isi pataye.
17 Kollinko huusundhi qhamo payshite ye dhinti kulakki poori.
Usundhisana kittatekka Hemenwoosepa Filtʼoose qagha.
18 Usundhissakka he dhukatte sikaapuyeppa patonki,
haqamako koro farrina xayna qharaʼitha idhdhikkadhi payeppa isi dhukaysadhe koro tookko tookkito pula.
19 Ikkodhdhitama kapay kirithossi Haallikkito ye lellehi kʼaale iyyana:
“Pogholho he huusu kodhdheesi iʼara,a
” holuppa,
“Qhawho makaxko Pogholhhito ooqa kaasay immaghnito kalla sikaapuya.b
” Idhikitipa isi qaaka.
20 Manne dhammana kalla maahxhxe workʼattepa sipilho piratena akodhdhi patta ye kodhdhunna mahxaththo akaarkitopa cʼoqholito kodhdhikka iqqagha,
uusudhisana kittatte tooke tooke kodhmo kaanasaminu tooke tooke kodhmo ye kaanasamunukki anakeesi.
21 Lammi yaxakakki mahxissa ye kaanasamonknna kaalla he reehina payni maahxatto kodhmo kaanasaminu kodhdhina ho kʼulkʼullawi,
ho Pogholhoosikka pakirra,
ho kodhmo xeesa kaasannu gheeqasa ikkodhdhini.
22 Dharraʼo ponkorinkito maghana kalla sikapuy,
koro saqko xeesattay Pogholho ooqa qale pare qaghunkopa dhukkaysadhepa cʼiknopa nakayhoosi gheeq.
23 Thamakadhe qeepuntattepa the ye koro pakirtina kalla sikapuy,
moʼo maala payni olho hasa ligha qhamu paqhto kora okasisa aʼaraye.
24 Ayliththo Pogholhito poghghamadhe ye uso gheeqasti,
laadhdhi ho koro kaasannu ghara,
kollisenukka ho arno sheeghapa ho dhuupadha kodhdhe uso gheeqasa,
25 holuppa he torrakko haqisaasi ho laaluntettay holasa kodhdhe gheeqasa,
yaxaarakka Haallikko dhukeesi arenu onki nattay c’uppito karo Huusu hollekki nu hiʼaasniye.
26 Onke hasa lighattay kʼalpe xeesa kulakki holleppa siikessi Seetʼanay qhamu woʼoko huusu konennu usundhe ghapanna kaalla pinnoki.