Erko Erkampakko Pawloose Lankay Tʼimothoosenu
1
Ano Pawloosessi kippo qaghito Kristoos Iyyesusettay tayama kula woʼo Haallikkitottay erkampakko Kristoos Iyyesuse kodhdhi.
2 Miʼayessi haayyu an cʼikadhi Tʼimotiwoose.
Horxuntepa nakayho pana teexako Haallikko Paapoppa ho Pogholho haani Kristoos Iyyesuse ihho kodhdha.
Wonkelenu Dhukkaysathame
3 Xeere kaasay awnepa kuyyaqate ghissoote thaayyuttay an hela ho thaayana qhamo appadhdhe kedhdhay kodhe kula anokka kʼalpe xeesatakki an Haallikko kalataysadhi.
4 Ilmaame haahusikki an hela thaayipa qhama ho hiinipa hxasodhonu isa yora.
5 Dhukkaysadhessi thaahu he paseese yena qaghtiisi an hela sheegha,
dhukkaysadhissakka the qharro kaakka thaahu Loydhepa yaaye taahu Ewunkʼe sheeghe,
hantukka dhukkaysadhissa qhamu hola qaghtisa an upadhi.
6 Hussa maallay teexakossi Nasso Kʼulkʼullito xinke an xarghe haayyu ho saappa ghapadhina Haallikko ho teexipa isi hola kittatte qaghaasi qhama qhapsistinu an ho arasa.
7 Haallikko Nasso humnappa ho cʼiknitopa ho he rafisatte iʼine teexi dhiishoy ho ghaapkito ye ine teexuye.
8 Lammi qhoota Pogholhito haani qallepa ano hossi qhoota Huusu maallay shapamitakka olo palami,
naqharray humna Haallikko ho teexittay qhoota wonkelatte maallay ye qale rakko akkadh.
9 Ho ine dhinsipa ooqumaththo kʼulkʼullunkitottay ine ooqu Haallikko,
husakka qhamo woʼo Huusupa teexakko Huusu kula dhiishoy qhamo kodhmo haani kula qandhikka.
Teexakussa Haallikkito qhaatʼe ye umamonkinna qharraʼithaki Kristoos Iyyesusettay ine teexami.
10 Teexakussa Haallikkitokka hantu okaye Dhinisampakko haani Kristoos Iyyesusettakki armadhi.
Uso humna fartatteesi ippatisipa qaghopa farte tupettay qagheesi wonkelettay hammakooma lihasu.
11 Anokka erkampakko,
kolisampakkopa ho wonkelisaasi saluya kodhdhapa xawthama.
12 Hussa maallakki an rakko akkadhi,
ikkodhdhakka payni ho an dhukkaysadhiisi qhoota ari maallay anu palamnittay,
atarassi iyye teexisikka haka kuyaqako dhikkatatte saasa qhamu tiqadhe alkasnisa an upadhi.
13 Kʼaalessi dhukatte ayyela kollattiisi lighno kodhpa dhukkaysadhepa cʼiknossi Kristoos Iyyesusena an sheeghnittay tiqadhoy.
14 Erkkossi wonkelatte xeesa aho teexisi Nasso Kʼulkʼullossi inena kittatte qaakattay pankadh.
15 Hessi piyye Iisiyanna qaaka kaasay qhamu ye hxuressa atho aʼaray,
usundhisana kittatte Fikeluusepa Hermogheneese qagha.
16 Pogholho ahxke Onesforeesi iqhararsadha,
moʼo maalla payni xeere kishakki xesno ye kodhi,
shapame thaayyutakka ye palamu.
17 Laadhdhi xinkesi ippiyye Roome kula okayina iyye ghegheeqipa yeema hxafoy.
18 Xeere dhikkattattena qhamu Pogholhito kaanta hxurakko tayaninu Uso innu teexa;
an piyye Efesonenna qaghanakka qhamu mala ghaqqiti ye kʼarkʼaarisa atho pareema arti.