Paanikepa Olho Pawloose Tʼimothoosenu Arasi
4
Haallikkopa Kristoos Iyyesusesi he qaghapa he farresa qhaqhitte qhaqhna miinteema,
armadhepa ahxase thuususi dhihadhettay husiisi atara an hola payi:
2 kʼaalesi thorruy,
ihho ghartikka ihho ghare hxurtakka payni xeere kaasay ho ghersatti kodhdhi,
dhupaythe dhammappa kollisettay gheteʼis,
qher,
dhiktis,
3 moʼo maalla payni xeere koro kollinko xeesasi yena apaqhe woonikki okayna,
husana kanta laadhdhi olho qhaame huusundhi apaqhenu shesheʼe qhamu nu qalinennukki kollisanpawhe kiisha he kapa holsanne.
4 Dhuke apaqaseesi ihxhxurrapa karo tharathe lathu kula laaghamonki.
5 Atho kapay olho kaasattay hohe pankadha kodhdhi,
rakkoosi dhuupadh,
wenkeleesi thoruy,
kodhmo haahu wenkelaaateesikka dhikkis.
6 Yeesi qhamo qukte aʼoohxadhi kula elisenukki aye itʼtʼoosi,
xeere an rehaminipa ashshokka iʼituye.
7 Ohxmatho xeesaasi an ohxmami,
hermaththo haayyuusikka an dhikkisi,
dhukkaysadhesi an tiqadhi.
8 Karo miinatte shilimaathe pare qaghunkito ye ghersami,
husasikka Pogholhossi pare qaghunkottay qhaqhite qhaqha kuyyaqukussana iyye teexna,
holuppa yeesi patta yekodhdhuna he ximpadhe Thuususi yorkottay tiqthadha kaasannu.
9 Wadhettay ye kula okayenu kokkisadh,
10 moʼo maallay payni Teemase olho piyyinaasikki cʼikadhipa ye hxuruppa kathama Theselonkʼe kula ashshoy,
Kʼerkʼeesekka piyye Kelathiya kula,
Thithokka piyye Dhilmatʼiya kula ashshoy,
11 Lukʼaase pattakki ye qale qagha.
Markʼoose kodhmottay qhooti ye kʼarikʼari maallay ihho qale okayaa.
12 Thikʼikʼoosesi karo kathama Efesoone kulakki an eraki.
13 Piyye Tʼroʼadhattay aʼokayanna koothessi dhamay an Akirippa kapa hxuriisippa matʼaafassi aʼilla mariisi karo ghula matʼafassi qulitoyyay ye okay.
14 Iskindhiroosessi siple thubha qootʼo dhamma iyya dhaghapoosi,
Pogholho kapay olho xarghe huusunaasi innu teexna.
15 Erko haansi miirikki toori maallay athokka nakalla he tiqthadha.
16 Dheekossi aye kasasina malse paayyotatte hela holasenu an itʼtʼuyina yaxakka hoye kaaqila shikkaari ye qaghi,
naqharray kaasakki ye hxuripa ashshonki,
hussasikka Haallikko idhdhappiteema nu dhihe hxura.
17 Naqharray Pogholho ye kapa shikaaripa ye dhikitisu,
pako karmidheetenakka ye pinnisu moʼo maallay payyni erkussa yettay qhamu paareema qallamnipa koro ye koro ayihudhatte kodhdhuy apaqhunnu.
18 Pogholho olho magha kaasanna iyye dhinisna,
karo ahxase thuusu monthito kula nakayhottay ye dhaghghaposuy.
Usoosi perre ye hume sheeghennu haaka perre ye hume sheeghe saasa kaanaste innu kodhdhita!
Amen.
Ille Nakaysadhe Dhikkatatte
19 Bhriskʼillapa Akʼila pana ahxke Onosiforosenakka nakayho naye pay.
20 Eristʼoose katama Kʼoronthoosesi haqhi,
Tʼirofimoosekka qhooti udhami maallay katama Militʼiinessa an hxuri.
21 Kathaniko ye hxafunna qharaʼitha ye kula okayenu olho ho alkasamna kaasasi kodhi.
Ewupuloose,
Pitoose,
Linoose,
Kʼilawtiya pana koro dhukkaysadha kaasay nakayho ihhola payi.
22 Pogholho Innasso haahu qale kodhdha.
Teexakko Haallikkito ihhune qale kodhdha.