Dhihamte Koro Dhukkaysadha Maallay Atʼimathoosenu Teexi
5
Qhawho bhahxiisi qhamo appa haahu kula dhihadhapa dhihamay dhiishoy qallithe dhikita olo na qalladhi.
Ponkorreesi qhamo qharumadhdhe taaki qassawhe haahu kula akkadh,
2 holuppa xiske bhahxeesi qhamo yayyaadhe haahu kula,
ihaadhdheesi qhamo allawwe haahu kula kʼalpe xeesattay usundhe eema.
3 Xiske tʼiire nafarrtipa isi dhuke rakkadhaasi uuma kʼarkʼar.
4 Xiskatto tʼiirakko na faripa isi miʼaadhe taakki opoppe sheegha payni usundhissa olho kaasanna qharriteema ahxkkadhdhe huusundhi kʼarkʼarepa nu pasante hoolassettay dhukaysasdhe thuusundhiisi kodhmottay hiʼase kolladhe usundhe gheeqasa,
husi olho Haallikkoosi hxasesaye.
5 The tʼiirakko nafaripa isi qawni qaakay kapay kippo hiisisi Haallikkoomi kottipa awunepa kuyyaqte kʼarkʼarsa Haallikkito waathadhettay isi ghisootettay kokkisadhay.
6 Naqharray xiskatto tʼiirakko nafaripa isi olho piyyina qaghattay hxasoodhappa isi na kippo kodhaay the shikkarteema farti.
7 Yaxanakka olho ana meethuyni qhamu yena qaghninu hussaasi waarsho kollis.
8 Qhawho tookko dhaliththo huusupa ahxke huususikki ye kʼarkʼaari payni ho dhukkaysadhe marmadhi,
qhawho ye dhukkaysadhunna kaanta ho uuma magha.
9 Xiskatto tʼiirakko nafaripa perre hiisi perkko 60 na kalay kodhdhonki mazkapeema olo tooxi,
holuppa the tʼiirakko toʼokko patta akkatti kodhdhe gheeqasa.
10 Holuppa the miʼaadhe ghohisepa hayhiththo akkadhepa luhhe kʼulkʼullawhatte shoxepa he rakkadheesi kʼarkʼarepa kodhmo xeesa kaasannu pukaqate thiisi teexettappa kodhmo xeesattay isi aramay kodhdhe gheeqasa.
11 Naqharray xiskke tʼiire nafarritipa isi qaghghooma qhooti woʼo sakankito usundhe putnipa cʼikno Kristoose naqhacʼoppa isi tʼiire akkadhe woʼa maallay usundheesi mazkape xiske tʼiire nafaritisa olo tooxi.
12 Xiskisa ulessi ippayyotatte Kristoose qale xuleesi qhooti pulle maallay inna qhqhamnay.
13 Holuppa heye kodhmo kodhadheppa isi mannadhdhe kaltha aʼashakki kodhdhine,
hussa patta ye kodhdhuna he olho ye gheeqasi qalladha,
he koro hxashshapa isi olho koro pileetesa hxullakki kodhdhine.
14 Hussa maallay xiske tʼiire nafarritipa isi qaghghooma qhamu akkaneppa miʼaadhe dhalonkippa mannadhdhe huusundhiisi rafisettay parakaara olhu na methuyni dhapisonkinnu an dhihmama.
15 Karay dhuke xayna qharaʼitha tookke tookke Seetʼana kala ashshenukki konnankonaye hole.
16 Xiskatto tootte the dhukkaysadhappa dhaliththo hiisina kittatte xiske pile he tʼiire nafare isi qagha payni qhamu manne thoʼokunko koro dhukkaysadhanu ye dhoqhqho kodhdhintinnu ikʼkʼarkʼarta;
onke hasa lighattay mannne thoʼokunko koro dhukkaysadhana xiske tʼiire nafarreppa isi dhuke kʼarkʼarsa gheeqasaasi patta kʼarkʼaare iʼalkasnaye.
17 Xaadhighghe manne thʼokunko koro dhukkaysadhana pareema rafisa karo ghullattay he thorruyepa kollisettay kokkisadhaasi xargho lakki kaanase gheeqasa,
18 Matʼaafakka hasi payi:
“Qardho qhothana olona pako shapi,a
” Holuppa “Kodhampakkonu hxaayye gheeqasab.”
19 Qhawho xaadhighto manne thoʼokunko koro dhukkaysadhana kasasa qagha payni misikire lakki taakki izexki ye itʼtʼoosu payni kisse usooma itʼtʼuyaasi olo akkadhi.
20 Ho cʼuppo kodhikki qagha payni kapay qhamu koro pile hiinipa he tiqthadhonu waarsho miinteema qheer!
21 Dhihamtiisi athu lighghadhunna tookoosi tookkito athu ghulasunna qhama dhikkisintinu Haallikkopa Kristoos Iyyesusepa erkampatadhdhessi qholame miinta atara an hola payi.
22 Yaxaamakka xarghe ghapadhepa xawwadhenu olo waadhi,
koro cʼuppo kodha qale olo ghari,
xeesnottay he pankadh.
23 Udhanko karqitho haahunapa hossi hola hahaqa maallay,
tʼayye woynatte takkayya quk dhiishoy qandhe patta olo quki.