6
Makaxko Haallikkitopa kollinko kristaninkito qhamu ye dhaghsamninu,
he aylinkito kaalla qagha kaasay rafisampawhe huusundhi he kaanaste dhammay usundhe gheeqastisa idhdhihadhe.
2 He rafisampawhe dhukkaysadha sheegha Pogholho Iyyesusettay qhooti koro huusundhi kodhdhe maallay idhdhafe hxure,
laadhdhi rafisampawhisa huusundhi dhukkaysadhapa he cʼikathame he kodhmo huusundhittay pakirko tayadha koro huusundhi qhooti kodhdhe maallay ho qharrona kaanta iʼuuma nu kodhadhe.
Athokka hu kollisepa dhihaame ho gheeqasti husiisi.
Kollinko Ayyappa Kodhaththe Dhukatte
3 Yaxakkakki kollinkossi dhukatte Haallikko ghaape qale ghara Kʼaalessi dhukatte Pogholho Iyyesus Kristoose hxuripa isi kollinko pile kollisa payni,
4 qhawhussa ho peepottay hoqhqhipa olho toʼokoka isi ye ari.
Qhoota qallithatte tamakathamepa paaxakoosikki cʼikadhi usundhisakka yookunte maghappa dhaghisthopa ille tʼaratʼare maghaassikki okaase,
5 olissakka koro dhuke na akkamtipa koro kodhmo nasawnkito olho ana shoorokumi nu lighipa koro dhihadhe na qhacʼtina kittatte parpe ye shikkaartisikki okaasi.
6 Naqharray Haallikko ghaapepa olho an sheeghi iyye hxafna paye shorokunko dhamma.
7 Moʼo maalla payni olho an karo piyye qhaatʼi kula okaynittay ye qaghi,
olho toʼokkoka ini ghapanneppa ashshoonittay.
8 Naqharray yiʼopa laalle urkuytatte an sheeghni payni iʼine hxafna.
9 He shorokke kodhdhe woʼa themmatettakki ranne,
siike patittattepa the koro pulappa olho lathuppa woʼo maghattakki ghapamne.
10 Moʼo maalla payni pirraadhdhe cʼikadhe xitʼitte maghno kaasanna,
tookke tookke yorko ishshorukumenu sheeghenna haqati onkke dhukkaysadhatena idhdhappameppa lighonki,
qootʼo dhammattay he kotaʼonki.
11 Atho qhawho Haallikkito kapayi,
olho hasa ligha kaasanna sikaapuy!
Pare qaghunkopa Haallikko ghaapepa dhukkaysadhepa cʼiknopa dhupaythepa xeesno kala ashsha.
12 Ohxmaththossi dhukkaysadhatte xeesasi ohxmam;
qaghossi perre ye hume sheeghenna annu ooqamtipa misikkiradhe kisha miinta hela arasoosi kokkispa ghapadhay.
13 Haallikkossi kaasannu qagho teexapa hossi Pentʼenawito ana payi Pilaatʼoose miinta dhuke masakari Kristoos Iyyesuse miinta olho an hola atara payi,
14 Pogholho haani Iyyesus Kristoose haki armanni saasa hayuusi dhafkopa meethe male kokispa tiqadhoy.
15 Hossi sakamipa Uso patta Rafisampakko kodhdhu,
Nukusa nukasadheetepa Pogholho poghuladheete armadhisaasi pukkaqte thuusuna xeeri woʼina Uso hiʼaasna.
16 Uso pattakki hoye fari,
hammako yaxakka yena kapa itʼtʼuye alkasnina kittatti qaaki,
qhawho Uso hiʼi ye qaghi,
ho Uso hiʼe alkasnakka ye qaghi.
Usoosi perre ye hume sheeghennu haaka perre ye hume sheeghe saasa kaanastepa humna innu kodhdha.
Amen.
17 Shorokke piyye qhaatʼinna qhamu yehe peepne takki shorokunko karo miinatte ye koro pakirissa qhamu ye kippo konne,
ladhdhi qhama hxasonaninnuy hossi olho kaasasi purasapa isi teexa Haallikkooma qhamu kippo konennu hay.
18 Holuppa qhamu kodhmo xeesa konneppa kodhmussa xeesatakka shorokumonkippa teexepa hu sheeghenna qhootenu he gharsame kodhdhonkinnu hay.
19 Onke hasa lighattay qhamu qagho dhukatte tayannennu,
shorokunko perre okaynanu kiriththo dhikita kodhdhina iʼilla holsanne.
20 Qhawho haayyu Tʼimothoose,
olhossi aʼatarattay akkatti kaasasi tiqadha;
olho ye arno kodhdhuna arno ligha qalithe lathu Haallikko yena kaanasamina kaalla sikapuy.
21 Tookke tookke he paya arnusa kulakki an sheeghni husaasi kodhettakki onke dhukkaysadhatena dhapameppa lighonki.
Teexxakko Haallikkito ihhune qale kodhdha.