Kollisampawhe Aayyay
4
Perre xayna tupeettay okaynana tooke tooke qhamu dhukkaysadhe marmanneppa nassidhe koro dhappisapa kollinko nassidhe maghana kala ashshonkisa Nasso Kʼulkʼullo pareemi qalli.
2 Kollinkussakka ayyolawhesi kʼalpe thuusundhiisi ana sipilho uuma thorattay dhillipa na fafi kula lighapa isi he paseesa kakorukki okayni.
3 Usundhisa ille akkepa yiʼoosi ikkohxhxanki;
yiʼusakka ho Haallikko uumipa koro dhukkaysadhapa isi dhuke ara Uso kalathaysadhettay akkani.
4 Olho Haallikko uumi kaasay ho xeesa,
Haallikko kalathaysadhe illakki ayiʼi payni olho ana kʼurri toʼokoka ye qaghi.
5 Moʼo maallay payni Kʼaale Haallikkitopa ghissottettay ho kʼulkʼullawwiye.
6 Huusaasikka koro dhukkaysadhanu qalliti payni athokka kʼaalessi dhukkaysadhattepa kollinkossi xeesa akkollattitakka ghohintipa kodhampakko Kristoos Iyyesuse xeesa kodhdhay.
7 Tharatepa qallithe lathu the Haallikko kaanase yena qaghtina kaalla siikapuy,
laadhdhi Usoosi ghaape he kollis.
8 Ispoorte kolladhe okoto pattakki koro pakirti,
Haallikko ghaape kolladhe kapay hantunukka ikkodhdha qagho karo miinatte okaynanukka qhooti kippo sheeghi maallay lakkisanukki koro pakiri.
9 Thorri he dhukkaysathamapa he koro kaaasay akkadhe gheeqasi.
10 Hussasi tayadhenukki an paynippa isan kokkisadhaanippa isan tardhaani,
hussakka hossi koro kaasay karo ghuulattay koro dhukkaysadhanu Dhinisampakko kodhdhi Haallikko qaghampakkoosi qhoota an kippo konni maallay.
11 Oli anho qalliisi usundhe hay,
isa kollisakka!
12 Yaxakka inni dhellinko haahu dhafuy,
naqharray he dhukkasadhanu qalliithepa qaakopa cʼikinopa dhukkaysadhepa kʼalpe xeesa sheeghettay nu lighno kodhdhi.
13 Haka an okayni saasa Matʼaffe Kʼulkʼullawheesi koro kaasannu nappapepa dhihamepa kollisenu kokkisadh.
14 Teexakossi Nasso Kulkʼullito xinke xaadhighghe manne thoʼokunko koro dhukkaysadhana xarghe hooma ghapadheppa aho hxuuma qallunna ho teexamiisi olo dhafi.
15 Koro kaasay qhamu ghohe haahuusi hiininu olho hasa lighoomasa miinte laagh,
kokkisadhetakka kodhay!
16 Qagho haahupa kollise thaahunu he pankadh,
hisitakka dhikit,
hasa kotti payni pukaqte thaahupa heho apaqhasasikka adhdhinisnaye.