Inthawanpawhe Manne Toʼokunko Koro Dhukkaysadhana
3
Hossi apayina:
“Yaxakkakki inthawampakko manne toʼokunko koro dhukkaysadhana kodhdhe woʼa payni kodhmo xeesanukki yooki” dhuke.
2 Lammi inthawampakko manne kristaananna ho olo meethuy,
tʼiirakko xiskato toʼotatte,
ho qhamu gheeqasti kula qaaka,
hohe pankadhe alkasa,
ho thaayhottay qaaka,
ho hayhiththo akkadha,
ho kollise alkasa,
3 ho ye hxayyoodhi,
ho ye poghghamadhi naqharray laalakko,
ho ye paqhtuyami,
ho ye pirraadhdhe cʼikadhi,
4 ho manne huususi qhamu gheeqasti kula rafisa,
ho miʼaadhe huususikka eeʼe payepa koro kaanasettay ghohisa kodhdhe gheeqasa.
5 Qhawho manne huusuusikki ye rafise alkasu payni malaali manne thoʼokunko koro dhukkaysadhana Haallikkitoosi rafise alkasni?
6 Qhamu ye peepottay hoqhqhinippa qhaqhitessi Orriththo ranittay ranunnu qhawho haannay dhukkaysadhi ikkodhdhe hxura.
7 Holuppa qhamu ye meethuyamnippa siike Orithitottay ghapamunnu ho koro ye dhukkaysadhina miinatte makaxunte xeesa sheegha kodhdhe gheeqasa.
Qhoota Takʼoonadheete
8 Qhamussa kula takʼonadhdhekka he kaanasame,
heye qalliithe oʼoohe,
heye qukte dhammannu yooke,
heye pakirko onke gheqastittay tayama kala ye hehere kodhdhe gheeqasa.
9 He kʼalpe xeesattay bhadhdhamte dhukkasadhatte qhamu ye oohamintinnu kokkisadhettay pankadha kodhdhe gheeqasa.
10 Usundhisaasikka aʼinthoosapa theemmu,
meethekki yena qaghe payni ittaakʼonunko kodhadhe.
11 Holuppa xiskekkaa he kaanasame,
heye koro hxashshe,
laadhdhi he qhamu gheeqasti kula qaaka he olho kaasattay dhukkaysathama kodhdhe gheeqasa.
12 Taakʼonaadhdhe he xiskato toʼotte patta sheegha kodhdhe gheeqasa,
holuppa he miʼaadhe huusundhipa manne huusundhiisi pareema rafisa kodhdhe gheeqasa.
13 He pareema kodhmo kodhe makaxunte dhamma ittayanne,
Kristoos Iyyesuse dhukkaysadhe thuusundhitakka shahxumte dhammaasikki tayanne.
14-15 Waadhettay ho kula okayenu an kippo kodhakka payni yaxaarakka an olanna maallay toʼokunko koro dhukkaysadha Haallikkossi qaghotta qaghanapa mannessi dhiptakkopa kiriththo dhukatte kodhdhe manne Haallikkitona koro qhamu malaala qaake gheeqasi qhama artinukki an payipa hayuusi ho tooxo.
16 Bhadhdhamte qagho Haallikko ghaapetenna ghadhko male the dhammay,
Ususakka ho pishkottay armadhi,
Ho dhukunko huusukka nassottay arami,
Ho erkampatadhdhenu ximpadhi,
Ho koro Ayhudhatte ye kodhdhu kaasannu athorruyi,
Ho koro piyye qhaatʼinna Uso dhukkaysdhi,
Ho kaanastettay moontho kula hadhdhi.