Qhamu Mala Haallikko Kaanase Gheeqasti
2
Lammi olho kaasana qhama inthoosnipa wathathadhepa ghissootepa koro pilenu ghissadhepa kalatha qhoota koro kaasa maallay aʼitʼtʼosunnu an dhihmama,
2 karo ghulattay rafisampawhepa he ghulno sheeghanu ghissadha,
moʼo maallay payni hes payepa nakayhopa Haallikko ghaapepa makaxunte xeesattay qhama qaaknaninnu.
3 Hussakka olho Dhinisampakko haani Haallikkito miinatte xeesapa isi hxaseesa.
4 Uso koro kaasay qhamu dhinnipa dhuke are kula hxafonukki woʼi.
5 Husanu
Haallikko toʼokko qagha,
holuppa Haallikkopa korito kittatte Ararsampakko toʼokko qagha,
6 Ususakka hossi qhawho kodhdhi Kristos Iyyesuse.
Uso koro kaasanna sappeete murra ihhe kodhipa he teexu,
hussakka xeeresi dhukattenakki anu masakari.
7 Anokka erkampakko otisaasi thorruya,
holuppa koro ye koro Ayhudhatte kodhdhunukka kollisampakko dhukkaysadhepa dhuke kollisa an kodhdhipa hxawthama,
dhukisaasi an qallina anu ayyooni.
8 Lammi tʼiire xaytu qaghe kaasanna qhamu miirapa ille thamakkadhe malettay xarghe huusundhi kʼulkʼullawheesi moontho qila haqisneppa ghissadhonkinukki awwoʼi.
9 Holuppa xiske urkuyte palanko bhadhay urkuyetappa pukkaqte thuusundhi tiqadhettay urkuyte gheeqasay iʼurkuye dhiishoy katʼo taakki sire xeesoma taakki lalladhe shooshattay inni he peeponki,
10 naqharray xiske iyya Haallikko an kaanasni ikkodhmo xeesasi kodhettay siradhe.
11 Xiskatto kʼampayepa eeʼe payettay ikkollatta.
12 Xiskatto qhamu kʼampaytinu dhiishoy qhamu kollistinu taakki qhamu tʼiirakito ghulno sheeghintinu anu payi.
13 Moʼo maallay payni Attaame qharriteemi uummammi,
nakala Hewwaane uummammi.
14 Holuppa ho tatakami Attaame qandhi,
naqharray the tatakamtipa cʼuppolatte kodhdhi xiskatto.
15 Ikkodhdhitama kapay xiskatto dhukkaysadhepa cʼikinopa kʼulkʼullunkotakki pukkaqte tiisi tiqatipa kokkisadhi payni miʼaye dhaletakki dhinti.