Erko Erkampakko Pawloose Payyotatte Tʼimothoosenu
1
Ano Pawloosesi hayo Haallikko haani Dhinisampakkopa hossi kippo haani kodhdhi Kristoos Iyyesusettay erkampakko Iyyesus Kristoose kodhdhi.
2 Atho hossi dhukkayisadhettay miʼaye haayyu dhukatte kodhdhithi Tʼimathoose.
Horxuntepa nakayho pana teexako Haallikko Paapoppa ho Pogholho haani Kristoos Iyyesuse ihho kodhdha.
Kollinko Aayyanna Kalla He Tiqadhe
3 Xinkessi an karo Mekʼdhooniya ashshina qhama kokkisipa ho qalla kula,
hantukka koro tookko tookko ho kollinko ayya kollisana kolinkusaasi qhamanna kohxintinu piyye Efesoonessa ghayya.
4 Karo tharathe lathuppa dhihakko sanynyatte ye dhikkatte sheeghi kula qhamu ye hollenu usundhe hay.
Olho hasa ligha ille thamakadhi okaasi dhiishay kodhmossi Haallikkito dhinkito adhdhukkaysadhettay kodhdhinu ye koro pakiri.
5 Naqharray hayunna alaama huusu cʼikno.
Cʼiknusakka hutayami saqko xeesapa kʼalpe xeesa pana dhukkayisadhe dhukatena.
6 Tookke tookke olinna immugheppa karo qallithe lathu kula holonki,
7 kollisampawhe hikkatte kodhdheesi iwwoʼanki,
ikkodhitama kapay olhu qalladheppa qhoota olhossi kokkiseppa isinu thamakkatama ye are.
8 Naqharray qhawho hikkeesi qhamu gheeqasti kulakki kodhanitta payni,
hikke qhamu olho xeesa kodhdhitisa an araani.
9 Holuppa hikke hu teexamti koro pare qaghanu qandhimma he hikkenu ye eeʼe payeppa maghampawhenu,
heye Haallikko ghaapepa cʼupolawhenu,
heye kʼulkʼullunko sheegheppa he Haallikko dhafanu,
he pappopa yayye thuusundhiisi poghghanu,
he napise poghanu qhamu kodhdhitisa an araani,
10 he paalakumapa tʼiire tʼiire qale rafappa he koro lassapa isi xorighapa ayyolawhepa he ayyattay akutadhapa he kollinkosi xeesasi toora kaasannu,
11 kollinku xeesa ho wonkellessi kaanasamti Haallikkossi kalataysami atarattay ye teexi qale ghara.
Pawloose Qhoota Hxurakko Haallikkitonukki Kalatha Itʼtʼoosi
12 Pogholho haani Kristoos Iyyesusessi ye humna teexipa kodhmo huusunu ye xawadhuy,
ho dhukkaysathama qhaman kodhdhisa ye dhihoosi an kalataysadha.
13 Xayna qharaʼitha ano ho koro dhadhaghghisa,
ho koro ghoghorapa maghampakko an kodhdhakka payni,
qhoota kodhmo an arnopa dhukkaysadhe male kodhinu hxurakko aye kodhi.
14 Woo korunka,
dhukkaysadhepa cʼiknossi Kristoos Iyyesusena tayama teexakko Pogholho haaninakki ye puri.
15 Kʼaalessi iyyanna:
“Kristoos Iyyesuse cʼuppolawhe dhinsenukki karo piyye qhaatʼe kula okay” dhukepa the qhawho kaasay akkadhe gheeqasti;
anokka cʼuppolawhe kaasanna ghutay cʼupolakko.
16 Naqharray Kristoos Iyyesuse he uso dhukkaysadhapa hessi qagho perre ye hume sheeghe akkananu,
dhuupaythesi thuusu ye saapanko sheeghtisi ano hossi cʼuppolawhe kaasanna ghuta ghulattay lighno kodhepa hiʼaasenu hxurakko iyye kodhi.
17 Lammi Pogholhossi perre ye hume sheeghe qaakna,
hossi ye fari,
hossi ye ximpadhipa hossi Uso patta Pogholho kodhdhinu perre ye hume sheeghennu haaka perre ye hume sheeke saasa kaanastepa kalatha innu kodhdha!
Amen.
18 Miʼaye haayyu Tʼimathoose,
qhamossi aʼinthoosipa qhoota haahu hxuumatta qallu kula hayuusikki anho teexni,
hussakka hayusaasi tiqthadhapa qhipaththo xeesa qhipamay,
19 dhukkaysadhpa kʼalpe xeesa sheeghoy,
tookke tookke hussikki hxureppa qhamo markapesi pasooma rakko na dhaghghapipa pati kula hela dhukkaysadhe thuusundhiisi pattisonki.
20 Usundhisana kittatte he Haallikkooma dhaghghisamatte kalla qhamu he pankadhe kollanennu an likkasipa Seetʼananu teexana,
Hemeneesepa Isikntiroose na qagha.