Qhawhossi Maghnito
2
Koro haayyu,
qhoota okaye Pogholho hani Iyyesus Kristooseppa qhoota Uso kula ashshe kaaʼitha oliisikki an hune qalli.
2 Armadhe nassitottay takki thorrettay takki erko ine hune erakni kula okaaye Pogholhito idhdhaghghapti qhamu huni payinteppa waadhettay kʼalpe thaahundhittay murukankuppa isa lelehankunukki an hune waathanni.
3 Yaxakka onke thinkattakka inni hune tatakuy,
payyotatte koro kisha Haallikkoosi ye marmadhuppa Qhawhossi Maghnito patittenu teexamikka ye armadhunna kuyyaqkussa ye okayni.
4 Ususakka Toorampakkossi hessi waakidhdhe ana payipa isa kaanasa kaasanna ghutakki qila qila he paasni:
“Ano Haallikko” payuppa Manne Kʼulʼkullawhe Haallikkitosa haki qakkanni saasa saleete saluyasu.
5 An hune qale qaghana oliisi qhama hune qalisa huni hela sheeghte?
6 Xeeressi anupayina haaki armanni saasa hantu qhamu moʼo na kohxisa hune aʼarankuy.
7 Bhadhdhamttessi maghnito hantukka ikkodhadhay,
naqharray olhu namallay bhadhamtettay kodhadhi hossi uso kohxhxa haaki nu pattini saasa.
8 Xayysa tupettay Qhawhossi Maghnito Pogholho Iyyesuse nasso pako huusuna lighattay patisnipa kaanastte okaaye thusuttay miinakale patisukki ximpanna.
9 Qhawhussa Maghnito kodhmo Seetʼanay qale gharetaki okayni,
hussakka humnadhdhe qawni qawnippa milikithadhdhepa olho koro dhahxisa aayya kaasattakki kodhdhini,
10 laadhdhi koro pannaasi hu tatakni kodhmo magha kaasasi kodhettay,
usundhissa pannekka dhukessi dhinkooma usundhe hxafassnaasi qhooti ye cʼikadhonki maallay.
11 Hussana haqti qhamu aayya dhukkaysannennuy Haallikko kodhmo koro dhappisaasikki na erakni,
12 hu hasa kodhdhinikka he dhukeesi ye dhukkaysadhonkippa isi maghnottay hxasodha kaasassa qhamo ana qhaqhitte qhaqhninu.
Dhikitepa Shikkaare
13 Hune hessi Pogholhottay cʼikathamte koro haayyu,
ine naqharray qhoota haahundhi mallay xeere kaasay Haallikkoosi kalataysadhe ine gheeqasa.
Moʼo mallay payni Haallikko payyotenu paayyatti he Nasottay kʼulkʼulawiteppa dhukeesi dhukkaysadhankuppa dhinakuy qhama kodhintenukki hune qholadhi.
14 He kaanaste Pogholho haani Iyyesus Kristoose qhootadhdha qhama kodhintennu wonkelessi ine hune qallinittakki hune ooqi.
15 Lammi koro haayyu dhiktapa shikkaaranku,
kollinko an pakottay hune qallinikka ikkodhdha ho an tooxetttay hune erakniisikka kokisapa ghapadhanku.