3
Dhikkatatte koro haayyu,
kʼaale Pogholhito qhamu waadhettay ghandhaqintipa qhamu hunena kanta kaanasamti kula kaanasaminnu ine ghisadha.
2 Holuppa koro kʼaalissa apaqhi kaasay ho dhukkaysanna qandhikka,
hussa maallay dhohmawhepa koro maghno kodhana kaalla qhama pininaaninnu ine ghisadha.
3 Naqharay Pogholho ho dhukkaysathama,
Uso ihhune dhiktisna,
maghnito kallakka ihhune tiqanna.
4 Olho an hune haynisi hantu ikkodhdha,
karo miinattekka qhama kontessa makaxko Pogholhottay an dhukkaysadhaani.
5 Pogholho saqako haahundhiisi karo cʼikno Haallikkitopa dhupayte Kristoose kula ihhune holasa.
Kodhmo Hxure Ye Gheeqasti
6 Koro haayyu,
hunena kitatte yaxakka ho kodhmo hxuripa kolinkossi aʼinena akkatettay isi ye qaake woʼina kaalla qhama rehhamintennu makaxko Pogholho Iyyesus Kristoosettay an hune hayyaani,
7 lighno haanittay mala qhamu qaake hune gheeqastisa aʼarankuy,
moʼo maallay payni xinke an hunena kaanta qaghaninna koro kodhmo hxuri kula qandhikka an qaakni,
8 ladhdhi hunena yaxasikka qhamu ini rakisennu awnepa kuyyaqte inna xarghghe haanittay kodhathadhaninnakki an tardhini dhiishoy yaxanakka yiʼo huususi hasa ini yiʼooni.
9 Olho anna maallay hasa konnikka qaako haahundhittay qhama ineesi lightennu dhiishoy hunena kʼarkʼarsa akkadhe ye ine gheeqasti maallay qandhi.
10 An hune qale qaghaninna hasa an paynippa hune hayo teexaani “Qhawho ye kodhmo kodhe woʼi iyyiʼe hxura.”
11 Olho anna maallay hasa payni Hunena kittatte tookke tookke qhamu kodhmo hxuressa an apaqhni,
usundhissakka he kodhmo male aʼashadhapa isi olho koro pileetesa xulla.
12 Koro hasa kodhdha qhamu kʼampaynipa kodhathadhuppa yiʼo huususi yiʼo nukki an makaxko Pogholho Iyyesus Kristoosettay hayanipa isan dhihamaani.
13 Naqharray koro haayuu,
hune kodhmo xeesa kodheesi olo hxure.
14 Yaxakka ho erku an hune erakninu ye eeʼe payikki qagha payyni;
qhawho hasa lighaasi pareema eemindhapa kodhmo huusuttakka qhamu palamninu olo na qale kodhdhe.
15 Ikodhitaka payni qhamo qhawho haahundhi kula dheeha dhiisho qhamo paarakara kula olo dhihe.
Nakaysadhe Dhikkatatte
16 Pogholho nakayhito Uso kuyyaqko kaasasay olho kaasattay ihhune nakayho teexa.
Pogholho ihhune kaasay qale kodhdha.
17 Ho nakayhuusi xarghghe haayyuttay hune tooxi ano Pawloose,
erkidhdhe haayyukka husittakki arame,
tooxe haayyukka he hasa ligha.
18 Teexakko Pogholho haani Iyyesus Kristoose ihhune kaasa qale koodhdha.