Erko Erkampakko Pawloose Lankay Koro Kathama Theselonkʼennu
1
Ano Pawloosepa Silwaanoose pana Tʼimathoose.
Hune hessi Pappo haani Haallikkopa Pogholho haani Iyyesus Kristoosesi dhukkaysadha manne thoʼokunko koro dhukkaysadha kathama Teseloonkʼenna qaghanu.
2 Teexakko Haallikkitopa nakayyho ihhune kodhdha!
Kalathapa Dhihamte
3 Koro haayyu,
dhukkaysadhe thaahundhi qhooti pareema ghohtipa ille cʼikadhe thaahundhikka isi padhawama maallay qhoota haahundhi Haallikkoosi kuyyaqko kaasay kalataysadhe ine gheeqasa.
4 Hussa maallay inekka ghoghorame thaahundhipa rakko huneema dhaghghapi kaasanna kokisadhe thaahundhittay pukkaqate thaanina qhoota dhuupadhe thaahundhipa qhoota dhukkaysadhe thaahundhi maallay mannaadhdhe thoʼokunko koro dhukkaysadha Haallikkito kaasanakki an peepanni.
5 Olissa kaasay qhaqhitte Haallikkito qhamu pare kodhdhitipa ahxasessi Haallikkito annu rakko akkate kula xulenu he gharte qhama kodhintekki hune konni.
6 Husakka Haallikko qhaqhitte thuusuttay dhukampakko qhooti kodhdhi maallay he huna rakko okaasasa rako na okaasettay hxayye huusundhiisi innu murra.
7 Holuppa uso hunissa rakko akkatenukka ikkodhdha ineesikka hxaysinko iʼine teexni.
Hussakka hu hasa kodhdhini xinke Pogholho Iyyesuse erkampatadhdhe huusu kaanomo illay halapko haththatettay moonthonu okaayina.
8 Lammi xeerisana he Haallikkoosi ye are pana he wonkele Iyyesus Kristoosennu ye eeʼe payeesi ihhaaluyna.
9 Usundhekka taymadhe Pogholhitopa humna huusu dhamma kaanasamina irrehaminakippa patittessi perre yehume sheeghettay choqhamonki.
10 Hussakka hukodhdhamanni xinkesi kʼulkʼulawhe huusu kitta kaanasamnipa he Uso dhukkaysadha kaasay qhamu Uso dhahxinennu okaayina.
Huneka misikirunko haanisi qhoota akkateppa dhukkaysadhanku mallay he dhukkaysadha qale adhihamnte.
11 Husiisi inna hela ghadhaninna Haallikko haani he ooqmatho huusunu ghare qhamu konnipa hune dhihonnuy woʼokossi xeesno kodhenu ashsheghteppa kodhmossi haahundhi dhukkaysadhatte kaasasi humna huusuttay qhamu hune dhikkisninu kuyyaqko kaasaskki an hune ghissanni.
12 Holuppa qhamo teexakko Haallikko haanipa ho Pogholho Iyyesus Kristoose kula ghaqqi makaxko Pogholho Iyyesuse qhamu hunettay kaanasamnipa hunekka Usottay kanasamankunukki an hune ghissanni.