Kodhmo Pawloose Kathama Theselonkʼenna
2
Koro haayyu,
hune kula okaye thaani lathu qhamu ye kodhdhusa aʼaranku.
2 Qhama arte kula xayna qharaʼitha kathama Filipisiyosesa an rakkannippa aʼine dhaghghisokka,
naqharray toorakko dhamma iʼina haqa kakki payni wonkele Haallikkitoosi qhama hune thoruynanninu Haallikko haani shahxumte ine teexi.
3 Dhihamte thaanikka hune dhappisenu taakki olho maghanu taakki hune tatakenu qandhikka.
4 Naqharray Haalikko wonkeleesi atarattay akkadhenu koro alkasna kula qhooti ine dhihi maallay wonkeleesi an thoruynaani.
Olho anna maallay hussisi konni Haallikkossi saqako haani araasi hxasesenu dhishoy koroosi qandhi.
5 Kuyyaqko toʼokokakki qalithe xeetʼosettay ini hune tatakooni taaki koro kodhaththenu yuyuʼa qhamu ini kodhdhoonissa hunekka aʼarankuy,
olinuy Haallikko ineesi misikire.
6 Hunenakka ikkodha koro pilete yaxanakka kaanaste ini gheeqoni.
7 Erkampawhe Kristoose kodhdhe haanittay an hune rakkisnaani ahxay,
naqharray qhamo yaaye miʼaadhe hiisisi pankatti kula,
laaluntetakki an hune kitteʼitha lallaaghamni.
8 Laadhdhi qhoota an uuma hune cʼikanni maallay Wonkele Haallikkito hune qallenu patta qandhimma qagho haanisi kakki huneesi teexenu an gharri.
9 Koro haayyu,
kodhmo haanipa tardhinko haanisi ahhela sheeghanku,
yaxanukka dhooqhqho ini kodhdhoni,
awnepa kuyyaqte inna kodhadhaaninnakki an wonkele hune thoruyni.
10 Hune he dhukkaysadha qale qhama mala kʼulkʼullunkopa pare qaghunkopa qagho meethe yena qaghetay qaknissa hunepa Haalliko misikiradhdhe.
11 Qhamu appa miʼaadhenu huusunu olho gheeqasa kodhi kula inekka pukkaqatte pukkaqatte hune kaasannu olho gheeqasa qhama konnisa aʼaranku.
12 Haallikossi karo ahxase thuusupa kaanaste thuusu kula hune ooqinu qhamu gheeqasti kula qhama qaaktennu an hune dhihamni,
hune dhikitisani kokkisaanippa hune waathadhaani.
13 Holuppa qhoota haahundhi maallay olho ini shikarashooninna an Haallikko kaanasnikki qagha,
hussakka kʼaalessi Haallikkito aʼinena apaqhteesi xeere aʼakkatenna hunisa dhukkaysadhana hu kodhatti qhamo kʼaale qhawhito kula qandhimma the Haallikkito kula akkotteppa akkadhankunnu.
Karayka ise kʼaale Haallikkito.
14 Koro haayyu,
hunekka manadhdhe toʼokunkosi koro dhukkaysadha Haallikkito he Kristos Iyyesuse kodhdhe piyye Yihudhanna qaaka lighte;
usundheema qhamu koro Ayhudhatettay rakko na dhaghghapi kula huneemakka koro haahundhitakki rakko huna dhaghghapi.
15 Koro Ayhudhatte he Pogholho Iyyesusesippa hxuumampaawhe paaxe,
ineesikka ine ghoghoronkkippa piyyatte ine lihasonki,
usundhe he Haallikkoosi asanisapa korosikka isi shikka,
16 holuppa koro ye koro Ayhudhatte kodhdhunu qhamu ini kʼaale qallineppa dhinonkinnu iʼinena kohxhxa.
Onke hasa lighattay cʼuppo sappa isi cʼuppo padhawettay ashsha;
hussa maallay dhikkatate miira Haallikkito na okayu.
Yorko Pawloose Koro Theselonkʼe Eemmenu Sheeghi
17 Naqharray koro haani saqkottay ye kodhdhunna an xeere qhacʼa hunena kanta rehaminakakki payni,
yorko dhamma an huneesi sheeghnina haqati miinte thaahundhi hiʼenu uuma awwooni!
18 Ahxay hune kula okaye wooni;
karo ghula ano Pawloose the kishatakki awwoʼi,
naqharray Seetʼana ine olthisi.
19 Emma kippo haani taakki hxaso haani taakki kuyyaqko Pogholho haani Iyyesuse okaayina halaalossi kanastatte an peepanaani hune qandhi?
20 Dhuke karay kaanaste thaanipa hxaso haani hune.