3
Hussa maalay dhupadhe qhooti ini alkasooni maallay piyye Athenassa an ine patta haqhenu qhutʼanni.
2 Qhawho haani kodhampakko Haallikkito kodhdhipa otessi xeesa Kristoose isi ine qale thorruya Tʼimothoosesikki an hune kula erakni.
Olhanna maallay hune kula eraknikka qhamu hune dhiktisnipa dhukkaysadhettay dhikitankunnu.
3 Husakka rakko huneema hxafittay qhamu huni lelehintekki hune konni.
Qhama rakkusanu teexamnissa hune aʼaranku.
4 Laadhdhi xinkessi an hune qale qaghninna qhamu rakko ineema dhaghapnisa kuyyaqko kaasakki an hune thorruyni,
qhama arte kula rakkusa uso ina dhaghghapi.
5 Hussa maalay dhuupadhe qhooti anu alkasu maallay dhukkaysadhe thaahundhiisi arenukki an Tʼimothoosesi hune kula eraki.
Olho anna maallay erakikka yaxaaray Themampakkossikki hune theemipa tardhinko haanikka thaythe kodhukki an payipa ghaapo maallay.
6 Naqharray haantu Tʼimothoose hunena kaantakki haqipa ine kula okayuppa qhoota dhukkaysadhe thaahundhipa qhoota cʼikno haahundhi kaaʼitha ote xeesa ine thorruy.
Holuppa qhama ineesi xeere kaasay olho xeesatay thaaytepa qhamo ine hune hiʼenu yorri kula hunekka isa ine hiʼenu yorankussa ine qallu.
7 Hussa maallay koro haayyu,
arrakkopa qootʼito kitatte qaghnakaki payni dhukkaysadhe thaahundhina haqati an dhikitni.
8 Qhoota humuna Pogholhtottay kokkisatteppa shikkaaranku maallay qagho haaninu dhikitno.
9 Hxaso an qhoota haahundhi maallay Haallikkito miinate sheeghninu kaanaste mala dhamaki an Usoosi teexe alkasnaani?
10 Laankka hune hiʼepa olho dhukkaysadhe thaahundhina erqikki qagha payni hune hoqhqhashenu awnepa kuyyaqate kokkisadhettay isan ghissadhaani.
11 Hantukka qhama karo haahundhi okaye alkasnaaninnu Haallikko Appa haanipa Pogholho Iyyesus Kristoose onke thaanisi iʼine gheteʼisa.
12 Qhamo ine huneesi cʼikno sheeghni kula cʼikno hune ille sheeghteppa ho aʼkoro pilenu sheeghte Pogholho ihhune padhaawapa hune naqisu.
13 Onke hasa lighattay Pogholho haani kʼulkʼullawhe kaasay illay iʼokaayana Haallikko Paappo haanina miinatte he meethe yena qagheppa kʼulkʼulawhe qhama kodhdhintenu issaqqe haahundhi dhiktisa.