Erko Erkampakko Pawloose Payyotatte Koro Kathama Theselonkʼennu
1
Ano Pawloosepa Silwaanose pana Tʼimothoose.
Hune he Haallikko Pappo haanipa he Pogholho Iyyesus Kristoose kodhdhite manne thoʼokunko koro dhukkaysadha piyye Theselonkʼenna qaghanuy.
Teexakko Haallikkitopa nakayho ihhune kodhdha.
Kalatha Qhoota Dhukkaysadhe Koro Theselonkʼe Maallay Iʼtʼtʼuyi
2 Xeere kaasakki an hune kaasa maallay Haalllikko kaanasaanippa ini hxurooninna isa hune ghissadhaani.
3 Kodhmossi dhukkaysadhe thaahundhina haqati akkotteppa qodhdho cʼikno ashsheeghtenna haqati aqqodhdhite pana kokisadhesi thaahundhi kippo Appogholho haani Iyyesus Kristoosena sheeghte mallay xeere kaasakki an Haallikkopa Paappo haani miinta hune dhihanni.
4 Hune he Haallikko hune cʼikadhi koro haayyu,
qhamu Uso hune qholadhisa an araani,
5 moʼo maallay payni wonkelessi an hune qallini hu karo haahundhi okayti humna Nasso Kʼulkʼulitopa xulsadhe dhammattay dhiishoy qalliithetta patta qandhi.
Holuppa xeere an hune qale qaghnina qhoota haahundhi maallay qhama mala qaaknissa hune aʼarankuy.
6 Rakko kisha ihhuna dhaghghapakakki payni hxaso Nasso Kʼulkʼullottay tayamana haqti kʼaalesi aʼakkatepa lighno haanipa ho Pogholho Iyyesusesi isa lighanku.
7 Hussa maallay hessi dhukkaysadha piyye Mekʼodhoniyappa Akkayiyanna qagha kaasannu lighno xeesa akkodhdhite.
8 Kʼale Pogholhito hunena kanta lighipa piyye Mekʼodhoniyappa Akkayiyanna qhaskadhe patta ye kodhunna dhukkaysadhe Ahaallikkottay sheeghte xayto kaasakki aramti;
hussa maallay ine olho anna padhawne pile ye qaghi.
9 Qhama mala ine akkateppa Haallikko qaghghampakkopa dhukampakkonu kodhadhenu killankito karo Haallikkito mala qhama holtessa usundhe iqqalla.
10 Holuppa Iyysusessi Haallikko fartatte Uso haqisi ho miirassi okaynaana ine pinnisna,
hossi moonthikki okayna Miʼaye Haallikkitoosi qhama mala tiqthatessa usundhe iqqalla.