2
Qhoota haahundhipa qhoota koro katama Lodhokʼiyanna qagha pana he aparay miinte thaayyu ye hiʼonki kaasanu qhama mala ghaqqiti ohxmamisa qhama artekka an woʼi.
2 Olhanu ohxmamikka saqqe huusundhi qhamu dhikitneppa cʼiknottay toʼokunko sheghonkippa thayiho nu naquppa hossi xashshatte Haallikkito kodhdhi Kristoosesi aronkkinnu.
3 Shorokunkkossi arnaneetepa arnito bhadhdhami kaasay huttayami Usona kaanta.
4 Yaxakka qhamu qalliithe marseetettey ye hunne tatakninu husiisikki an hune qalli.
5 An hunena kaanta sikaapuyakakki payni nassottay ano hunne qale,
pareema qaake haahundhipa dhukkaysadhe dhikitay Akkristoosettay sheeghteesikki an eemipa isan hxasoodha.
Aata Koritona Kristoosettay Hasa Lighe
6 Lammi qhama Pogholho Kristoos Iyyesuseesi dhukkaysatte kula Usottay qaakindha:
7 dhishshamappa Usoma ghupthamankuy,
qhamossi akkolatte kula dhukkaysadhettay dhikitankupa kalatha naqisankuppa nu itʼtʼoosanku.
8 Kollinko Kristoosesa ye kodhdhuna ho koritopa ho nassidhesi piyye qhaatʼina sappeete kodhadhasa ghupthami arno dhammapa qalliithe lathuttay yaxakka qhamu ye hunne tataknippa pojuyamankunnu he thiqithadhindha.
9 Hoqhqhunko Haallikkunkito kaasay pishko Kritoosenakki qaaki,
10 hunekka Kristoosesi rafisepa ghulno kaasana pukkaqate kodhdhi qale akodhiteppa hoqhqhanku.
11 Usotakka kodhdhiteppa karrazame xarghe qhawhitottay ye kodhdhuttay karrazamanku,
husakka karrazame Kristoosettay dhihadhe cʼuppolatesisi hela patisanku;
12 xinkessi ashshoxatte shoxattenna Uso qale ammaayamte,
humnassi Haallikkito Usoosi he farrenna kittate haqisittay dhukkaysadhankuppa Uso qale fartate haqanku.
13 Hune dhappitte thaahundhipa kʼalpe thahundhi cʼuppitoosi hela patise hxure haahundhina payyatti he farrite akkodhdhitenaki Haallikko Kristoose qale he qagho sheegha hune kodhi.
Cʼuppo haani kaasasikka ine hxuruy.
14 Tooxesi kuurito ine dheehapa isi ine toorasi iʼakkipa maskʼalaama dhisuppa patisu,
15 onke hasa lighattay humnaadhdhepa ghulnidhdhe maghumaasi maskʼalaama putu,
immaahxessi shapadheesikka na ishshighasi tupettay he pojuyame qhamu kodhdhineppa ximpadhonkinnu kodhu.
16 Lammi olho ayyiitekka ikkodhdha ha quukte taakki paalepa leqito payootepa kuyyaqako sampataasi kaanase maallay yaxakka ihhuna qhaqhitte qhaqhe xura.
17 Hisi kaasay hossi karo miinatte okaynannu qhamo kaasse kula,
dhuke hutayamti kapay Kristoosettay.
18 Yaxakka ho laalunte ayyattay hoqhqhipa isi erkapatadhdhe kaanase cʼikadha qhamu ye hune kuththumninu he thiqthadhindha.
Qhawho hasa ligha raaʼe iʼhiʼi maalakki uuma he ghulasipa dhihadhe sakankito lathuttay hoqhuppa isi he peepa.
19 Qhawho hasa ligha Kristoosesi pukkaqate kodhdhi qale toʼokonko ye sheeghi,
ho pishko kaasasi meellepa ribhottay illa ghapasapa isi yiʼasha Uso.
Haallikko onke hasa lighatakki pishko kaasanu ghohko teexi.
Kolinko Koro Dhappisana He Tiqithadhe
20 Kristoose qale farriteppa nassidhesi hassa piyye qhaatʼinna kodhadhana rehamanku payni moʼo maallakka he hunina rehamonku kula kodhdhiteppa hayidhdhe hasa lighoomanu isa eeʼe payanku?
21 Haydhissakka he paya “Olo ghappadhdhi!
Olo lokodhi!
Olo kohxi!”
22 Hisi kaasay he hayopa kollinko koritosa shikkaare qhooti kodhdhe maallay ikkodhmito nakaye tupettay he panna.
23 Husikka qhamo woʼo qhawhito kula kanastepa laalunte ayyappa sakanko qootʼuyettay ho arnane na qagheki lighi,
naqharray sakanko qhamu woʼi kula qhamu ye kodhdhini kohxhxenu olhu koro nakeesi ye qaghi.