Erko Erkampakko Pawloose Koro Kathama Kʼolasiyaasennu
Erko Pawloose Koro Kʼolasiyaasennu
1
Ano Pawloosessi woʼoko Haallikkitottay erkampakko Iyyesus Kristoose kodhdhipa qhawho haani Tʼimothoose.
2 Hune kʼulkʼullawhessi dhukkaysathamta kathama Kʼolasiyaasenna qaaka Kristoose dhukkaysatte koro haani,
Haallikko Paappo haanina kaanta teexakkopa nakayho ihhune kodhdha.
Kalathapa Ghissoote
3 Xeere an qhoota haahundhinu ghissanina Paappo Pogholho haani Iyyesus Kristoose Haallikkoosi kuyyaqako kaasay an kalathaysadhaani.
4 Moʼo maalay payni Iyyesus Kristooseesi dhukkaysadhe thaahundhipa cʼikno akkʼulkʼullawhe kaasannu sheeghteesi an apaqhni;
5 hu hasa kodhdhikka kipposi ghuta moonthito gharsamipa hune xawthamuna payyatti,
qhoota kippusa kaaʼitakka kʼaalessi dhukattessi qharitteema wonkelatettay aʼapaqhte;
6 hune awwonkele apaqhteppa dhukunko teexakko Haallikkitona upadhankunu paayyatti wonkeli qhamu hunena kittatte kodhatti kula piyye qhaatʼe kaasanakka iʼawshappa isi ghohay.
7 Hussaasikka hossi cʼikathamipa ine qale ayllto kodhdhu Epifaara ihhune kollisi;
uso qhoota haahundhi maallay kodhampakko Kristoose dhukkaysathami ikkodhdhi,
8 holuppa qhama Nasso Haallikkitottay ille cʼikattessakka iʼine qalli.
9 Hussa maallay inekka an husaasi apaqhninu paayyatti hune qhama arnanepa upadhe nassawnkito kaasattay woʼoko Haallikkito arintennu huneesi ghissadhepa waathathameesi ini shikkarashooni.
10 Olhanna maallay ghissanikka Pogholhonu qhamu gheeqasti kula qhama qaakinteppa olho kaasatakka Uso hxasesonkunu:
hussaka kodhmo xeesa kaasattay qhama awsho xeesa awshinteppa Haallikko arettay isa ghohankuppa
11 dhuupayte dhamma kokisadhe qhama sheeghintenu,
dhikitno Huusu kaanasami kula humna kaasattay dhikitapa isa hxasoodhankuppa
12 Hossi Ahxasesi hammakitona qhama ghapatha kʼulkʼullawhattena qhothadhdhinaaninu ine hxafasi Haallikko Appaasi kaanasankunnu.
13 Uso rafise thukkankitona iʼine pehisipa karo Ahxase Miʼaye huusu icʼcʼikadhi kula ine tahxhxasu.
14 Kʼeeqhte thuusu iʼinena muritakki an Uso kula hole tayanni,
hussakka hxurakko cʼuppito.
Kristoose Ho Kaasanna Ghula
15 Kristoose lighghno Waakossi ye armadhina;
Uso uumatha kaassana qharitto.
16 Olho kaasay Usotakki uumami,
ho moonthitopa ho piyyatte qaghakka,
ho armadhapa hoye armadhikka,
kanoomokka ikkodhdhe takki humnaadhdhekka,
rafissampawhe ikkodhdhe taakki he ghulno sheeghakka:
olho kaasay Usottappa Usoosikki uumami.
17 Uso olho kaasana qharaʼitha,
olho kaasay hu illa ghapami Usottay.
18 Uso mannesi kristaanay pishko huusu kodhdhenna pukkaqte,
qhamu olho kaasanna ghulno sheeghninu Uso ho paayyotate,
he farrena kittate fartatte haqettakka qhariththo.
19 Haallikko hoqhqhunko huusu kaasay Iyyesusettay qhamu kodhdhininukki cʼikadhipa
20 kʼeeqhtesi thuusu maskʼalaama eltittay nakkayho kodhuppa olho piyattepa moonthito qagha kaasay Usottay heqale ararsuy.
21 Kodhmo haahundhi maghana payyatti xayna qharaʼitha hune he Haallikkito kalla sikapuyte,
dhihadhe thaahundhittakka paarakaraadhdhe huusu kodhaku ahxay.
22 Haantu kapay he dhawrepa meethe yena qaghe kʼulkʼulawhe hune kodhepa minte thuususa hune itʼtʼoosenu pishko Kristoose faritakki he qale hune ararsi.
23 Husikka hu kodhdhamanni dhukkaysadhettakki aghupththamtteppa pareema shikkarankuppa kipposi wonkelatte aʼapaqhtena hunni lellehonkunna dhikitankuppa qaakonku payni.
Wonkelisakka thesi hune apaqhtepa uumatha moonthito kala qagha kaasannu athorruyi.
Ano Pawloosekka wonkelisanukki an kodhampakko kodhdhi.
Kokkisadhe Pawloose Qhoota Toʼokunko Koro Dhukkaysadhanu Hiʼasi
24 Rakko an qhoota haahundhi maalla akkadhittay hantukka an hxasoodha,
rakkosi Kristoose qhoota mannesi kristaana pishko huusu kodhe maallay akkadhina erqiisi anokka sakanko haayyuttakki anna hoqhqhashni.
25 Kʼaale Haallikkitoosi hoqhqhunkottay qhama hune itʼtʼoosninu atarassi an Haallikkito akkadhittay kodhampakko manne kristaananakki an kodhdhi.
26 Kʼaali Haallikkito the perretepa dhalathana xashshatte kodhdhitipa oladhi,
haantu kapay kʼulkʼullawhe huusunukki armathti.
27 Usundheesikka Haallikko kaanaste shorokunko xashshatinna qhamu mala ghaqqti koro ye koro ayhudhatte kodhdhunna kittaʼitha kodhdhitisa arasenuki qholadhi.
Ususakka hossi kaanaste kippito kodhdhipa isi hunnena kittatte qagha Kristoose.
28 Ine qhawho kaasay Kristoosettay ho bhahxi qhama koneppa itʼtʼoose alkasaaninnuppa koro kaasasi arnnanne kaasattay isan dhihamaanippa isan kollisanippa isan Usoosi thorruyaani.
29 Haallikko qhooti humuna huusuttay yela kittatte kodhadhi maallay anokka kodhmossa kodhenukki an humunisattay ohxmamipa isa kokkisadha.