Erko Erkampakko Pawloose Koro Kathama Filipisiyoosennu
Inthawte
Pawloose erkuusi hu tooxi, piyye Mekʼodhoniya ana payi the rafistte Romenna kaalla qaghay manne kristaanay kathama Filipisiyoosenna qaghanu. Manni kristaanay he Pawloose piyye Awroppassa payyootatte ghaqqi. Erkussa hu tooxami Pawloose immanne shapeetena qaghana. Xeeressi kodhampawhe dhukkaysadha tookke usooma toorakko haqiseppa kollinkossi aayyay manne kristaanay kathama Filipisiyoosenna haqittay saqko huusu uumi na asani. Ikkodhdhama kapay Pawloose dhukkayasadhe Iʼiyesus Kristoosettay sheeghi qhooti the uuma dhikittay kodhdhiti maallay erkunna ho uuma ximpadha hxasopa peepadhe Ikkistoosettay sheeghi.
Pawloose erkusi olhu namallay tooxi kuyyaqko rakkitona qhooti usoosi kʼarkʼare maallay waarsho Filipisiyooseesikki kaanasi. Usopa usundheema rakko qawni qawni inna dhaghghapakka payni shahxumtepa dhikitno qhamu sheeghnennukki usundhe dhiktisi. Peeppo pana he paseese qhamu hela patisneppa laalunte Iyyesus Kristoosettay qakonkinnu arnaanetakki usundhe dhihami. Qaghosse Iyyesus Kristoose qale nassottay toʼokke kodhettay tayadhe ho teexakossi Haallikkitona okayi dhishoy ho hikke tiqadhettay tayami qandhikka kipayipa isi na thaaysa. Hxasopa nakayhossi Haallikko koro Iyyesus Kristoose qale gharettay qaaka kaasanu teexnisikki tooxi.
Erku hu aramittay hxaasospa peepadhepa thoʼokunkoopa dhukkaysadhe kristaaninkitoopa qaghottay dhikiteesikki uuma hiʼaasi. Holuppa erkampakko Pawloose cʼikno immanne kristaanay kathama Filipisiyooseesennu sheeghisikki hiʼaasi.
Olhu Matʼaafi Illa Ghapadhi
Inthawte 1:1-11
Olho Pawloose naqaghi 1:12-26
Olho qagho kristaaninkito hiʼaasa 1:27-2:18
Ikʼkʼidhe Tʼimothoosenuppa Eppaferodhithusenuy 2:19-30
Dheekko koro dhukkaysadhe tooranu atooxi 3:1-4:9
Dhihamtepa kalatha Pawloose kristaanadhe kathama Filipisiyosenna qaghanu innu itʼoosi 4:10-20
Dhikkatte 4:21-23