Erko Erkampakko Pawloose Koro Kathama Filipisiyoosennu
1
Ine heessi kodhampawhe Iyyesus Kristoose kodhdhini Pawloosepa Tʼimothoose.
Hune hessi kathama Filipisiyoosenna qaaka Iyyesus Kristoosettay kʼulkʼulawhe kodhdhite kaasanu,
holuppa inthawampawhepa kodhanpawhe manne kristananna qagha kaasannu.
2 Paappo haani Haallikkopa Pogholho haani Iyyesus Kristoosena kaanta xeesno Haallikitopa nakayho ihhune kodhdha.
Ghissoote Kalathay
3 Xinke an huuneesi hela thaay kaasanna Haallikko haayyuusi an kalataysadha,
4 holuppa kuyyaqako an qhoota haahundhi ghissadhi kaasanna hxasotakki an ghissadhi,
5 moʼo maallay payyni kuyyaqko payyottattenu haka hantu saasa hune he ye qale kodhmo wonkelatte kodhakka kodhdhite.
6 Haallikkossi hunettay kodhmo xeesa kodhe paayyi haka kuyyaqako Iyyesus Kristoose okayni saasa qhamu dhikkisnisa an ara.
7 Saqkito ayyela qaghte maallay qhoota haahundhi dhihadhe thaayyu pare,
shapame thaayyunakka ikkodhdha an wonkelenu ohxmamapa isan dhikktisanakka huune kaasay heye qale teexakko Haallikkito qhoottadhdhakka kodhdhite.
8 Cʼikno Kristoos Iyyesusettay qhama saqkottay mala ghaqiti hune kaasannu yorisa Haallikko yeesi misikire.
9 Cʼikno haahundhi arnopa thaayho kaasattay qhamu padhawamnipa isi ghohapa purrunu an ghissadha.
10 Hussakka hossi olho kaasanna pare kodhdhiisi qhama arteppa haka kuyyaqako Kristoose na okayni saasa he alhesamteppa he meethe yena qaghe kodhdhankuppa
11 awshossi pare qaghunkito Iyyesus Kristoosettay tayama kaanastepa kalatha Haallikkonu kodhdhinaasi awshankunnuy.
Wonkele Qhamu Shapame Pawloosettay Ghandhaqati
12 Koro haayyu,
rakko yeema dhaghghapi wonkeleesi qhamu uuma ghandhaqisisa qhama artekka woʼi.
13 Husinna payyatti shapame thaayyu qhoota Kristoose qhamu kodhdhitisa koro manne ahxasatte thiqadhapa koro pileette kaantakka iqhaskatti.
14 Shapame thaayyuna paayyatti he Pogholho dhukkaysadhana kittatte he kisha ye ghaaponkinnakki kʼaale Haallikitoosi shahxuntettay thorruyenu dhiktino tayadhe.
15 Tookke dharraʼo maghapa nyarkotakki Kristoosesi thorruye,
tookke kapay woʼoko huusundhi xeesatakki thorruye.
16 Ano ho wonkelenu thamakadha qhama kodhdhipa shapamasa aronkippa cʼiknottay isi wonkele thorruya.
17 Tookissa kapay an shappeete qaghana yeemi rakko naqisi woʼeppa dhihadhe xeesattay ye kodhdhunna pakirkko husundhinu isi Kristoosesi thorruya.
18 Eemma rakko moʼo na qagha?
Olho yela ghara,
dhuketakka ikkodhdha onke ye dhuke kodhdhutakka ikkodhdha,
onke thinkattakka qhoota Kristoosekka ththorryi maallay an hxasoodha.
19 Tookko olho anna maallay hxasodhi ghissote thahundhipa kʼarkʼarsa Nasso Iyyesus Kristoosettay qhama hasa lighnisa an upadhi.
20 Onke thinkatakka qhamu anu palamninnu yorkopa kippo dhikita an sheeghi,
naqharray qhamossi qharro kula kuyyukka qaghotakka ikkodhdha farttetakka Kristoose qhamu pishko hayyusa kaanasamnisa shahxumte dhamma an sheeghi.
21 Qagho hayyu Kristoose,
fartekka pakirkko hayyu.
22 Qaghotakki an qaghi payni kodhmo xeesa an konni,
naqharray qaghopa farittatte qhama hunka qholladhinisa anu ari.
23 Usundhisa lakkinukki arrakkadhi,
ashshepa Kristoose qale qaakesi an woʼa,
husakka olho uuma xeesa.
24 Naqharray qaghottay qaghe haayyu uumi hune gheeqasti.
25 Husiisi an hela thaayipa qhama dhukkaysadhettay ghohteppa hxasodhonkunnu hune kaasay qale qhama olanipa qaakosa upadha.
26 Xinke an laanka karo haahundhi okayipa isa hune qale qaakana yela paayatti hxaso Akkristoos Iyyesusettay sheeghte ihhune naqana.
27 Olho kaasanna kutay wonkele Kristoosennu qhamu gheeqasti kula qaakindha,
hasi kodhdhiti payni an okayi hune hiʼakka taakki sikapnonukki an qhoota haahundhi apaqhikka payni,
dhukkaysadhe wonkelattenu qhama qhawho toʼokko kula kodhdhiteppa isa ohxmamankuppa nasso toʼokottay dhikitankuppa shikkaarankussa an arra.
28 Onke thinkatakka payni he hune tooranu olo muruke,
hussakka usundhe qhamu panneppa hune dhinankunnu milikite Haallikko teexi.
29 Kristooseesi dhukkaysadhe patta ye kodhunna qhama qhoota Huusu rakko akkadhintennu teexakukki hune teexami.
30 Qhamu xayna qharaʼitha rakko ya hxafipa hiʼankuppa hantukka isi yela qaghapa isa apaqhanku kula huneemakka rakkussa kulakki huna hxafi.