Lighno Laalunte Kristoosenna
2
Toʼokunko Akkristoose qale sheeghtetakki aʼille kokkisteppa cʼikno huusutakka isa ille dhiktisakuppa isa Nasso Kʼulkʼullo qale toʼokunko sheghankuppa pukkaqate pukkaqatte hxurakkopa horxunte isa illa hiʼaasanku payni,
2 dhihadhe toʼoteppa cʼikino toʼokopa nasso toʼoko pana olha kodhe wootenu toʼoke kodhdhapa hxaso hayyuusi ho dhukatte ye kodhanku.
3 Kata he paasettay koro pile qhamu hunena ghulisa dhihadhindha dhishoy,
pukkaqate thaahudhisi cʼikadhettay pasastepa ye male yaxa qagha payettay olho toʼokokka olo kodhe.
4 Hune kaasay olho koro pileesikka pakirra dhiishoy,
ho huneesi patta pakirra olo gheeqi.
5 Dhihadhe Kristoos Iyyesuse ihhunena kittattekka qaghti,
6 Uso inni Waako kodhdhina
humunassi Haallikko Paappo qale Uso kitaxisaasi ihhela hxuri.
7 Naqharray lighno ayylinkito ghapadhipa
pukkaqate thuususikka heneqqe kodhuppa
lighno qhawhitottay dhaladhuppa
8 qhawho kodhdhuppa armadhu.
Pukkaqte thuususika hela takoosu
haka fartte saasa hussakka haki maskʼalaama
farri saasa eeʼe payu.
9 Hussa maallay Haallikko uumi qila qila Uso paasi,
makaxko makaxunte kaasanna ghula nu teexu,
10 Hussakka moonthopa piyyatte,
piyyatte kallakka,
kilpayye kaasay qhamu Makaxko Iyyesusennu kilipnennu,
11 qarrapo kaasay kaanaste Haallikko Appannu,
Iyyesus Kristoose qhamu Pogholho kodhi masakarrinu.
Piyye Qhaatʼenu Hammakko Kodhdhe
12 Hussa maallay koro haayyu,
qhama he kuyyaqako kaasa eeʼe paya kodhdhite kula,
hantukka an hunena kaanta qaghana patta ye kudhdhunna,
laadhdhi hantu thisi anu hunena kaanta qaghina ghaapkopa xotholhottay dhinko haahundhi qhamu ho dhukatte kodhdhisa kodhmottay hiʼaasa.
13 Haallikko eeʼe payesi ihhune teexinapa woʼoko huusu xeesasi dhikkatteema hxafasenu hune kitta kodhdhuppa isi kodhadha.
14 Olho kaasasi huni qhurumrumonkuppa huni tiyyamonkunna kodha,
15 hussakka dhalatha xonghololhopa maghakito kittatte qhama miʼaadhe Haallikkito miilaawe meethepa dhawre yena qaghe kodhdhinteppa piyye qhaatʼe kaasannu qhamo xuskeete hxusankunnu.
16 Kʼaale qaghitosikki appareema ghapatte payni,
qhamu anu thaythe heru takki thaythe anu tardhussa kuyyaqko Kristoose okaayina olho an peepani iyye kodhdhini.
17 Teexakossi adhdhukkaysadhettay Haallikkonu itʼtʼositeppa kodhmo hahundhisakki qagho haayyukakki qhamo teexakko quktatte kodhdhinipa na padhawamuppa elukkakki payni an hxasoodha,
hunekka ayye qale hxasonanku.
18 Holuppa ahxasonankupa anokka ho hune qale hxasoodha kodhdha.
Tʼimothoosepa Eppafrodhitʼuuse
19 Qhama qhoota haahundhi apaqhnipa hxasoodhonu,
Tʼimothoosesi waadhettay hune kula erakanukki an Pogholho Iyyesusettay kippo kodhi.
20 Ho qhoota haahundhi maallay uuma he ghadha uso maale qhawho pile anu sheeghi.
21 Tookke kapay qhoota kodhmo Kristoosennu qandhimma pakirko huusundhinukki hehere.
22 Naqharray qhama arte kula Tʼimothoose moʼunko huususi iʼarasi,
qhamu miʼaye pappo huusu qale kodhadhi kula usokka kodhmo wonkelatteesi iyye qale kodhadhi.
23 Lammi shappe haayyuna olho ayela payniisi an ari tupettay Tʼimothoosesi wadhettay hune kula erakenukki an kippo kodhi.
24 Ano qhama waadhettay hune kula okaye alkasninu Pogholho qhamu ye kʼarkʼarisa an ara.
25 Hossi olho ye gheeqasattay ye kʼarkʼarinu ayye kula erakte,
qhawho haayyu Eppafrodhitʼuuse hoye qale serawithitto Iyyesuse kodhdhi kodhmo wonkelatte kodha qhama holli karo haahundhi erakanu olho gheeqasa ikkodhipa upadha.
26 Uso hune kaasasi hiʼenukki yori.
Udhame thuusuusi qhama apaqhtessa iʼarina uumi rakkadhi.
27 Dhukenu iʼudhamipa fartemakka itʼtʼuyu ahxay,
naqharray Haallikko iʼuso qhararsadhipa dhinisuy,
usoosi patta qandhimma yeemakka asane sappa asane qhamu yeya padhawamintinnu.
28 Hussa maallay qhama laanka uso hiitepa hxasodhonkupa anokka rakko haayyuna hxaysadhonu usoosi hune kula erakenu uuma ayyori.
29 Qhoota Pogholhito payapa hxaso dhammattay akkadhankuy,
koro qhamo huusu qaghasikka kaanasa.
30 Uso ho kodhmossi qhoota yela kaanta sikapuyte mallay kodhe huni alkasonkuusi kodhenu qagho huusu kakki ye qharasadhunna kodhmo Kristoose maallay haka fartte saasa itʼtʼuyi.