Pare Qaghunko Dhukatte
3
Lammi koro haayyu,
Pogholhottay hxasodhindha!
Hantukka anna hollapa hune tooxo payni yeye pakisni,
laadhdhi maghnito ihhune tiqanni.
2 Harrissana kalla he tiqadhindha!
Kodhampawhe maghampawhatte kalla he tiqadhindha!
Karrasame ayyanna kalla he tiqadhindha!
3 Ine he Haallikkoosi Nassottay kaanasaapa isa Pogholho Iyyesusettay peepadhaani dhiishoy he ini aata settito armadhattay dhukkaysanni dhuke karay ine he karasamni.
4 Laadhdhi ighgheeqasa pani anokka olho an sakankottay peepanni an sheegha.
Yaxakkaki payna olho an sakankito peepanni an sheeghi payni,
ano annu ghula.
5 Ano dhalanni ho kuyyaqko setentonna karsami,
ho sanynye Israʼeelatena kodhdhi,
kafko Piniyaamenna dhaladhi,
Iprawiththo,
qhoota hikkatte ahaqisni payni ano Ferisawiththo,
6 qhoota yookuntatte hikkatte kaaʼitha payni ano ho koro dhukkaysadhaasi ghoghora,
pare qaghonkossi hikkettay tayama kaaʼithakka ano ho meethe ye yela qaghe.
7 Lammi olhossi xayna qharaʼitha iyye pakira an payi kaasasi hantu qhoota Kristoose maallay qhamo olho lathu kulaki an dhihi.
8 Husinna ghutay olho Pogholho haayyu Kristoos Iyyesuse arete ghula pile qhooti ye qaghi maallay,
olho kaasasi ho lathu kulakki an dhihi.
Uso maallay olho kaasasikki an dhapi,
Kristoosesi tayadhenu olho kaasasi qhamo miise akappatte ooshi kulakki an dhihi.
9 Olho anna maallay hasa kodhikka pare qaghunkossi haayyu hikkeema ghupthamiisi hela hxurepa pare qaghunkkossi Haallikkito dhukkaysadheema ghupthami Kristoos Iyyesuseesi dhukkaysadhettay tayamaasi tayadhepa Uso qale kodhdhenu.
10 Kristoosepa humna fartatte haqeetesi qhama arripa qootʼo huususikka naqale qhotadhapa farte thayyutakka Usoosi lighonu awwoʼa.
11 Holuppa haqmakko koro farrina tayadhenukka ayyora.
Xaytossi Hxafe Gheeqasti Kula Waadhe
12 Husi payyo kaasasi an tayadhi taakki xaytossi hxafe ye gheeqasinna an hxafi payyo qandhikka,
naqharray Kristoos Iyyesuse olhossi inna maallay yeesi huusu kodhi anokka olisaasi haayyu kodhenukki an kokkisadhi.
13 Koro haayyu,
ano qhama na hxafisa anu he dhihi,
naqharray olho toʼokko an konni,
ho konnaththo koray qaghaasi an thaymonnapa ho yela miinatte qaghaasi ghapadhenu isan shokka.
14 Haallikko Kristoos Iyyesusettay moontho kula qhooti ye ooqi maallay,
shillimaathe akkadhenu xaytosi na hxafe ye gheeqasti kulakki awwaanni.
15 Lammi ine he qagho nassawinkitottay bhahxni olho tookko tookkoosi onke hasa lighattay eeme ine gheeqasa,
olho tookko tookkottay dhihadhe qawni qawni ashsheeghtekaki payni Haallikko hussasikka ihhune armatheesna.
16 Ikkodhdhitakka payni qaghusa nassawinkito anna hxafnittay qaakni.
17 Koro haayyu,
yeesi lighettay koro pile qalekka ghara,
koro lighno ine nu teexnittay qaakasikka thaayhottay eemindha.
18 Moʼo maallay payni qhamu xayyna qharaʼitha an hune qalla kula,
hantukka anna holipa isa ilmamettay hune qalla,
he kisha ashshanko huusundhittay paarakaraadhdhe maskʼala Kristoosenakki kodhdheppa isi qaaka.
19 Dhikkate thuusundhi patitte.
Karqito huusundhi usundheesi waako.
Olho koro palamisa usundheesi kaanaste.
Saqqe huusundhikka olho piyyatesa ihxhxaysadhe.
20 Piyye thaani kapay moonthito,
Dhinisampakkossi haahanu okayna Pogholho haani Iyyesus Kristoosesi yorkotakki an tiqthanni.
21 Usokka humnassi huusu iʼolho kaasasi he kala rafisittay pishko huusu kaanasamiisi qhamu lighninu pishko haani palamiisi iʼoohna.