4
Hussa maallay hessi an hune cʼikadhipa isan hune yora,
hessi hxasopa halalossi hayyu kodhmito ye lighghinippa patu kodhdhite koro haayyu,
Pogholhottay dhikitapa qaakonkuy.
Dhihaamte Dhiktisatte
2 Ewodhiyapa Sintʼekʼe Pogholho ghaapettay qhamu ille xulleppa qaakonkinnu an usundhe waathadha.
3 Ee,
atho hossi dhukkaysathamettay ye qale kodhadha qhama xiskisa kʼarkʼartinu an ho waathadha.
Usundhisakka he wonkele thoruyettay ye qalepa Kʼelementʼoose qale,
holuppa hessi makaxxe huusundhi matʼaafa qaghitosa atooxipa kodhampawhe tookesi an illa kodhanni qale kodhmo wonkelatte kodhadhaye.
4 Kuyyaqko kaasay Pogholhottay hxasoodhindha,
anna holipa isan iyya hxasoodhindha!
5 Laalunte thaahundhi ikkoro kaasannu aramtta,
Pogholho ho itʼtʼaye.
6 Olho kaasattay ghisootepa koro pilenu ghissadhe kalatha illay waathadhe thaahundhiisi Haallikko miinta itʼtʼoosa dhiishoy olho hunkattakka olo shoxxase!
7 Qhoota he Kristoos Iyeesuse kodhdhite maallay nakayyhossi Haallikkito thaayho koro kaasanna ghuttay kodhdhi saqqepa kʼalpe thaahundhiisi ittiqanna.
8 Dhikkatattekka koro haayyu;
olho dhuke kodhdhi kaasay,
olho kaanasami kaasay,
olho pare kodhdhi kaasay,
olho miilaawi kaasay,
olho cʼikathama kaasay,
olho xeesa kaasay,
olho pareema ghari kaasa pana kalatha,
olho hasa lighoomaasi dhihadhindha.
9 Olho ayyela kollatte taakki ayyela akkatte taakki ayyela apaqhte taakki ayyela hiiteesi kodha.
Haallikko nakayyhito hune qali kodhdhinye.
Kalatha Qhoota Teexakko teexennu Itʼtʼuyi
10 Xeere kisha tupettay nasso qhawthitottay yeesi dhihadhe qhootha paayite maallay Pogholhottay uuma an hxasoodhi.
Dhuke karay kodhmottay hiʼaasenu faroote adhdhapte dhiishoy dhihadheesi ayye dhihadhankuy.
11 Olho anna maallay hasa payi arrakkadhi maalla qandhi,
moʼo maallay payyni olho an sheeghi iyye hxafna payeesi an kolladhi.
12 Dhapeesikka an ara tayadheesikka an ara.
An dhalaxakka an pufakka,
an tayadhakka takki an dhapakka payni,
xankanakka ikkodhdha onke tinkatakka bhadhdhamthe olho an sheeghi iyye hxafna payeteesi an kolladhi.
13 Hossi ye huumna teexna Kristoosettay olho kaasasi an alkasna.
14 Ikkodhitakka payni he rakko haayyu qhoottadhdha qhoota kodhdhite maallay olho xeesa akkotte.
15 Husinna ghutay hune koro piyye Filipisiyoosenna qhama arte kula,
xeeressi payyootatte awwonkele akkatenna an piyye Mekʼodhoniyannu haqna,
hune malettay manne kristaanay hinkakka he teexakko teexettay takki akkadhettay yeye qale kodhdhonki.
16 Xeeressi an piyye Tesloonkʼenna qaghina kakki,
arrakkadhana anna hoholteppa ye kʼarkʼarsa erakankuy.
17 An husiisi payana kati kʼarkʼarsa haahundhi tayadhenukki an yoori payyo qandhimma awsho teexakko haahundhina qhamu hune naqninukki an yooki.
18 Olho ye gheeqasa kaasaasi huyye gheeqasina kutakki an akkadhi,
teexakossi ayye erakteesi Eppafridhutʼuuse iyye teexi,
hussakka teexakko ho oshooqno huusu na xeesipa ho Haallikko akkanipa ho Uso hxaaseesa.
19 Haallikko hayyu kaanaste thuusuna qhamu shoorokunko huusu dhamma kula ghaqqi olho hune gheeqasa kaasaasi Kristoos Iyyesuse kakoru ihhune hoqhqhashna.
20 Haallikkopa Pappo haaninu perre ye hume sheeghnu haaka perre ye hume sheeghe saasa kaanaste innu kodhita.
Amen.
Xasaththo Dhikkattatte
21 Kʼulkʼulawhe kaasanna Kristoos Iyyesusettay nakayho naye paya.
Koro yeqale qaghghakka nakayho ihhunena payi.
22 Kʼulkʼulawhe kaasay,
karo ghulattay koro ho Kʼeesarena manneete kodhahdakka nakayho ihhunena payi.
23 Teexakko Pogholho haani Iyyesus Kristoose innasso hahundhi qale kodhdha.