Qhoota Ahxhxkatepa Ho Dhelleete
6
Hune dhelle,
qhoota he Pogholhita kodhdhite maallay ahxkaadhdhe haahundhinu eeʼe paya.
2 Hayossi payyottatte:
“Paappopa yaye thaahuusi kaanas” iyyana kittatte kippo kʼaalatte qagha,
3 “Olho xeesa qhamu ho kodhininu,
perre hahukka piyyinna qhamu hu sikaapuynennu.a”
4 Hune ahxkke,
dhelle haahundhiisi aata Pogholho Iyyesusettay kolisepa,
dheehepa qheerettay ghohisa dhiishoy olo miirese.
Qhoota Poghlaadhdhetepa Ho Aylaadhdhete
5 Hune aylaadhdhe,
qhama Kristoosenu eeʼe payte kula,
poghlaadhdhe haahundhi piyyatenukka kaanastepa ghaapkopa saqako xeesattay nu eeʼe paya.
6 He peepepa usundhena paseste tayadhenu ye kodhdhuna qhamo aylaadhdhe Kristoose kula woʼoko Haallikkitoosi saqako xeesattay dhikkisenu nu eeʼe paya.
7 He qhawhonu kodhadha kula qandhimma he Pogholhonu kodhadha kula saqako xeesattay kodhadha.
8 Moʼo maalla payni qhawho ayle kodhdhi takki hoye kodhdhuy kodhmo xeesa ikkodhinu hxayye qhamu Pogholhito akkanisa aʼarankuye.
9 Hune poghlaadhdhe,
aylaadhdhe haahundhinu qhamussa kula kodha,
Pogholhossi haahundhipa huusundhi kodhdhi moonthito qagha qhamu ye miinte qhawhito eemipa isi ye lighghadhisa aʼarankuye hussa mallay olo usundhe ghaghghaapise.
Maahxhxe Orxanko Haallikkitona
10 Lammi Pogholhopa humnassi huusu dhikitattay kokisadha.
11 Kodhmosi dhohmuntatte Orrithito qhama hela koxxe alkasintennu maahxhxe orxanko Haallikkitona shapadha.
12 Moʼo maalla payni orxanko haani koro qale qandhimma hessi tukkanko piyye qhaatʼina rafisampawhe kodhdhe he ghulno sheeghapa humnaadhdhe qale,
holuppa nassidhdhesi maghooma monthidheete qagha qale.
13 Xinki kuyyaqako magha huna okayina qhama kokisadhinteppa hela holase alkasankunnu maahxhxe orxanko Haallikkitona urkuya;
olho kaasasi adhdhikkiste tupettay dhikitepa shikkaare aʼalkasnankuye.
14 Lammi kuudheʼitha sinaara dhukatte shapadha;
pare qaghunkoosikka qhamo maahxatossi orxankito asipilhito kodhdhi a’ero’itha shapadhi kula shapadhankuppa
15 wonkelessi nakayhitoosi thorruyenu luhhe haahundhi ighgharsameppa shikkaronkuy.
16 Hissi kaasay illay,
kooʼessi Orrithito qhamo hathatte sipinaasi qhama imase alkasintennu kontolessi dhukkaysadhatteesi ghapadha.
17 Okolo dhinkitoosi pukkaqeema qadhdhadha,
koorate Nassitosikka ghapadha,
hussakka Kʼaale Haallikkito.
18 Kuyyako kaasa ghissootepa waathathamettay Nassottay ghissadha,
hussasi inna hela ghadhankuna thayra,
qhoota kʼulkʼullawhattekka kokisadhettay ghissadhankuy.
19 Xinke an bhadhame Wokelatte ishighenu pako qhaashi kaasanna shaxuntettay qallenu kʼaale qhamu ye teexamtinu ye ghissadha.
20 Hantukka siplettay aye shapakakki payni Ano erkampakko wonkelinna,
hussa maallay ghapko male qhama qalle alkasninu ye ghisadha.
Xasaththo dhikkatatte
21 Qhama moyto qaghipa isa moʼo kodhasa qhama artenu Hossi Pogholhottay kodhampakko dhukkaysathama kodhdhi qhawho haayyu an cʼikadhi Tihikoose olho kaasaasi ihhune qallina.
22 Saqqe haahundhiisi qhamu dhiktisinuppa olho anna qaghniisi hune araseonukki an usosi hune kula eraki.