Cʼiknottay qaake
5
Lammi qhamo dhelle cʼikathame kula Haallikko lighindha,
2 Kristoose qhamu ine cʼikadhipa pukkaqate tuususikka ine maallay meepa oshoqno xeesa sheeghapa teexakko kodhdhipa Haallikkonu he teexu kula hunekka cʼiknusattay qaakindha.
3 Palakunte taakkinti lokme hinkakka payni takki yuʼuyuʼunko hunena kittate qaghu,
olho hasa ligha waarsho Haallikkito kʼulkʼullawinu ye gheeqasiye.
4 Qalliithe koro palamisappa the lathu,
fedhdhe ye gheeqase inni hunena kittatte qaghonki,
laadhdhi he kalataysadha kodhdha.
5 Holuppa olisi arindha,
qhawho Palakuma taakkinti lokume taakinti yuʼuyuʼunko.
Husakka killankonu sakata.
Qhawho hasa ligha Ahxase Kristoosepa the Haallikkitona ghapatha ye sheeghi.
6 Yaxakka qalliite lathuttay inni hune tataku,
moʼo maalla payni koro ye eeʼe payesa miira Haallikkito na okayna.
7 Hussa maallay korussa ye eeʼe payi qale olo thoʼoke kodhdhe.
8 Qharro tukkankito kittate aqaakte,
naqharray hantu kapay qhoota he Pogholhito kodhdhitte maallay hune hammakko,
hussa maallay koro hamakito qaaka kula qaakindha.
9 Awsho hammakito xeesnopa pare qaghunkopa dhuke kaasattaye.
10 Holluppa olho Pogholhoosi hxaseesaasi arenu gheeqa.
11 Moʼokka payni kodhmossi tukkankito ye awsho sheeghi qale inna toʼokunko sheeghonku,
laadhdhi lihasa.
12 Olho ibhbhadhdhamtettay kodheesi qallenu ikkoro palamisa.
13 Naqharray olho hammakko na hamasami kaasay pareemi armadhi.
14 Moʼo maalla payni olho kaasa qhamu armaninu ho hiʼaasa hammakko.
Hussa maallay hasi payamti:
“Atho ho rafa thayri,
He farrenna kittattekka haq,
Kristoose ihho hammasamnaye.”a
15 Lammi qhamo koro ye arnane sheeghi kula qandhimma qhamo koro arnane sheegha kula mala qhama qaakintessa he tiqthadhindha.
16 Kuyaqqe he maghayye perresi hune teexameesi pakirsadha.
17 Hussa maallay woʼoko Pogholhito qhamu moʼo kodhdhisa hela thaaya dhiishoy qeeppe olo kodhdhe.
18 Nassottay hoqhqha dhiishoy qukutettay olo hxayyoodhe,
hussa xarkishankoye.
19 Kodhdhathepa kaanastepa qhallitakko nassawnkitottay pukkaqatte pukkaqatte ille qale qalladha,
saqqe haahundhittay Pogholhonu koladhindha nu qhaaladhankukka.
20 Hussattay qhoota olho kaasa maallay Haallikko Appaasi makaxako Pogholho Iyyesus Kristoosettay kuyyaqako kaasay kalataysadha.
21 Kaanaste Kristoosennu mallay toʼokko ittookonu ghapkottay eeʼe paya.
Qhoota Qaako Ahxkattena
22 Hune xiske,
qhama Pogholhonu eeʼe payte kula tʼiire thaahundhinukka eeʼe paya.
23 Kristoose qhamu manne kristaananay pishko huusu kodhdheppa Usokka nu Dhinisampakko kodhunna ghulno sheeghi kula tʼiirakkokka xiskatto thuusuna ho ghula.
24 Lammi manne kristaanay qhamu Kristoosenu eeʼe paye kula xiskekka qhamussa kula tʼiire thuusundhinu olho kaasattay eeʼe paye usundhe gheeqasa.
25 Hune tʼiire,
Kristoose qhamu manne kristaanaasi cʼikadhipa pukkaqate thuususikka nasappeete teexu kula hunekka xiske haahundhiisi cʼikadhindha.
26 Iyyesuse olhunu hasa kodhi,
manne kristaanaasi kʼulkʼulleesse qhooti woʼi maallay,
hu kʼulkʼulesikka kʼaale thuusu kaakoru shooxatettay.
27 Onke hasa lighattay manne kristaana he oskakko takki minte qhancʼaarise takki olho pile ho hasa ligha yena tayamunna he kʼulkʼulawtipa he lokme yena qagheppa he olho ana qallini yena qaghipa he xeesakki konnipa he kula itʼtʼoosukki woʼi maallay.
28 Qhamusa kula tʼiirekka xiske husundhiisi pishko huusundhi kula cʼikadhe usundhe gheeqasa.
Qhawho xiskato thuusu cʼikadha pukkaqate thuususikki cʼikadhi.
29 Qhawho pishko huusu shikka ye qaghi ladhdhi,
iyyiʼashapa isi pankadha,
Kristoosekka manne kristananu qhamussa kulakki kodhi,
30 moʼo mallay payni ine meelle pishko Kristoosenna.
31 “Hussa maallay qhawho paappopa yaye thuusuusi hxhxura;
xiskatto thuusu qalekka toʼoko kodhdhu,
usundhe lakki pishko toʼoko kodhdhonkib”.
32 Husi bhadhamte uuma dhikitay,
anokka oliisi qhoota Kristooseppa qhoota manne kristaanay maallakki an qalli.
33 Ikkodhdhakka payni hunena kittatte qhawho kaasay xiskatto thuususi iqhqhamo hussu kula kodhapa cʼikadhoy,
xiskattokka itʼtʼiirakko hiisisi kaanasta.