Toʼokunko Kristoosettay Tayama
4
Lammi ano ho kodhmo Pogholhito maallay shapami,
oqmathussa annu oqamtennu qaako gheeqasa qhama qaakintennu an hune waathadha.
2 Pukkaqatte pukkaqatte cʼiknottay inna ille alkasankunna he dhuupadha kodhdha,
laaluntepa yehyehunkottay qaakonkuy.
3 Nakayhottay illa ghapamapa toʼokunko Nasso Haallikkito tiqadhenu kokkisadha.
4 Xinkesi aʼooqamtenna qhama kippo toʼokonu ooqamte kula pishko toʼokopa Nasso toʼoko qagha,
5 Pogholho toʼokkopa dhukkaysadhe toʼottepa shoxatte toʼotte qagha,
6 Holuppa hossi olho kaasanna ghula,
olho kaasattay kodhadha,
olho kaasattay qaaka,
Paappo koro kaasanna kodhdhi Haallikko toʼoko qagha.
7 Naqharray qhamo teexakko Kristoose kulaki ine kaasanu teexakko Haallikkito teexami.
8 Husaka qhamu hasa payamti kula:
“Xinkesi moontho kula hadhdhina
poojkosikki poojuyi,
koronukka teexako teexu.a”
9 Emma kʼaalisa iʼiyyana:
“Haqila ihhadhdhi” kki kala piyye kalakatakka iʼoodhi payyo ye kodhdhu payyni pilakko moʼo qagha?
10 Olhunna maallay hakkata oodhdhi qhamu uumatha kaasassa hoqhinenu,
ho moonthidhdhe kaasanna ghutay hadhdhikka Uso.
11 Tookke tookke erkampawhe tookke tookke hxumampawhe tookke tookke he wonkele thorruya tookke tookke koshnampawhepa kollisampawhe qhamu kodhdhinennu honu teexakko teexi Uso.
12 Hussakka mannessi kristaana pishko Kirstoose kodhdhe qhamu ghupthamnenukki kʼulkʼullawhesi kodhmonu gharisi.
13 Hu hasa kodhdhinikka ine kaasay qhama karo toʼokunkosi Miʼaye Haallikkito dhukkaysadhepa arettay tayama kula okaynaanippa koro nassawinkottay bhahxi kodhdhettay dhukunkosi Krisoosettay qagha kula hxafoni saasa.
14 Xaynu koruy kolinko dhohmuntepa tatakepa koro dhappisenu gharsamittay qhamo miʼaadhessi urure haʼithapa hakoruy sughurti kula ini kodhdhine.
15 Laadhdhi dhukeesi cʼiknotakki an qallinaanippa hossi pukkaqate kodhdhi kula olho kaasattay isan ghohaani,
Ususakka Kristoose.
16 Ususana paayyatti pishko kaasay ribhbhoittakki ille ghapamipa illa cʼaqhqhalappa meelho kaasay isi kodhmo huusu kodhapa isi cʼiknottay ghoha,
isi he ghupadha.
Dhelle Hammakito Kula Qaake
17 Hussa maallay oliiskki an hune qallini,
makaxako Pogholhtottay an hune waathadha:
qhamo korossi ye koro Ayhudhatte kodhdhu dhihadhe lathuttay qaaka kula lalaghame ye hune gheeqasti.
18 Saqqe huusundhi fafenna paayatti qhooti ye hela taaye maallay kʼalpe thuusundhi inna thukkanti,
qagho Haallikkitonakka reehamonki.
19 Kʼalpe thuusundhi qhootinna faffti maallay dharraʼo ye koro hxaysisipa lokme kaasatakki qhamu woʼe kula qaakenu palakunkonu ille ghaghapadhenu he likkaseppa he teexonki.
20 Hune kapay Kristoosesi ho akkolatte onke hasa lighattay qandhikka,
21 karayi qhoota huusu aʼapaqhte,
dhuke qhamu Iyyesusena kaanta qaghtisikka usona kolladhanku.
22 Qaako xayna qharaʼitha aʼaqaakte kaʼita pishkossi keshshakossi haahundhi dharraʼo maghattay xarkishamiisi qhama hela yukintteppa kʼurankunnu ahune kollisi.
23 Holuppa nasso kʼalpe thaahundhinakka qhawthumnta,
24 pare qaghunkopa kʼulkʼulunko dhukattettay pishkko qhawthittossi lighno Haallikkitottay ummamiisi urkuyankuy.
25 Hussa maallay aayyaasi hela patisapa koro kaasa qale dhuke qalladhanku,
moʼo maalla payni ine kaasay meelle pishko toʼokitoye.
26 Mirodhindha,
naqharay olo cʼuppo kodhe,
miira haahundhisa oqhqhaye inni xullu,
27 Orrithonukka olo xayto teexe.
28 Qhawho qharro kereqa xaynu koru inni kerequ,
naqharray koro dhapinu olhu teexni qhamu sheeghninu ixxarghe huusuttay olho xeesa kodhapa tayadhenu isi tardha.
29 Qhamu gheeqasti kula qalliite koro pileesi ghupadhay holuppa the koro apaqhqhasaasikka pakiray dhiishoy qalliithe lathu inni pako haahundhina lighu.
30 Nasso Kʼulkʼullossi Haallikko kuyyaqako dhinkitonu affaarawamtetaiisi olo asanse.
31 Raqano kaasappa miirapa ghithepa paqhtopa dhaghistoosi maghno kaasa illay hela patisa.
32 Qhamo Haallikko Kristoosettay hune hxuri kula,
hunekka illa hxura,
pukkaqatte pukkaqatte lalawhepa xorxaamo ille kodhdha.