3
Hussa maallay ano Pawloose hune he huni koro Ayhudhatte kodhdhonkinnu qhoota Kristoos Iyysuse maallay ho shapama an kodhdhi.
2 Karay qhamu Haallikko pakirkko haahundhi maallay teexakko yiʼashatte ye teexisa aʼapaqhte.
3 Xayna qharaʼitha qhama onke mahxnaʼattay hune tooxi kula,
bhadhdhamtisaasi Haallikko ximbhadhetakki ye hiʼaasi.
4 Lammi erkusa an hune tooxiisi annapapankunna qhama mala ghaqqiti bhadhdhamte Kristoosesi hela sheeghisa upadhe aʼalkasnanku.
5 Bhadhdhamtisay qhamu hantu erkampawhepa hxumampawhe kʼulkʼullawhenu armatti kula ghaqqi koro perre hxayna qharaʼitha lighghenna qaghanu ye armadhukka.
6 Bhadhamtisay koro ye koro Ayhutatte kodhdhu qhamu wonkelettay koro Ayhudhatte qale tayampawhe kodhdhinipa na qale meelle pishko toʼokito kodhdhuppa kippossi Haallikko Kristoos Iyyesusettay teexamiisi naqale qhottadhonkinnu.
7 Anokka kodhmo humna Husuttay teexakkosi Haallikkito ye teexamittay kodhampakko wonkelina kodhdha.
8 Ano ho kʼulkʼullawhe kaasanna kalla qhacʼa an kodhdhakka payni shorokunkosi Krirstoose ye saapanko sheeghisi koro ye koro Ayhudhatte kodhdhunu qhama qallininukki teexakussa Haallikkito ye teexami.
9 Laadhdhi Haallikkossi olho kaasasi uumittay kodhmosi perre lighghena bhadhdhamisi qhama koro kaasannu armatesninukki ye teexami.
10 Hussakka wannaadhdhepa he gulno sheegha moonthito qagha perri hantuna qhamu manne kirstaanattay arnane Haallikkitoosi qawni qawni kodhdheesi arrennu.
11 Husaka woʼokosi huusu perre yehume sheeghenasikki Pogholho haani Kristoos Iyyesusettay dhikkisi.
12 He Kristoose kodhdhepa Usoosi dhukkaysadhe thaanittay shahxuntetappa saqako hoqhqhottay Haallikko kula itʼtʼuyesi an alkasnaani.
13 Rakko ano qhoota haahundhi maallay akkadhi huneesi kaanaste,
hussa maallay rakko yeema hxafinu qhamu huni kippo ghoxintenu an hune waathadha.
Cʼikno Kristoose
14 Hussanukki an Haallikko Appa miinta ghulladhipa isan ghissadha,
15 ahxke moonthitopa he piyyatte qagha kaasay makaxunte dhukatteesi Usonakki tayyanne.
16 Kitte thaahundhittay qhama dhikitinteppa shorokunko kaanaste thuusuna Nasso Huusu kaakoruy humna hune teexunnu an ghissadha.
17 Hussakka Kristoose qhamu dhukkaysadhettay saqqe haahundhina qaakninu.
Holuppa qhama xisse ghaqqinteppa cʼiknottay dhikitankuppa,
18 Cʼikno Kristoosenna ghandhaqunte thuusupa haʼithakko sikapepa haqqilaakko sikaapepa hakkatakko sikaape thuusu qhamu mala ghaqqi kodhdhisa kʼulkʼullawhe kaasay illay qhama humuna hela thaayete tayadhintenu.
19 Husaka cʼiknossi Kristoose arno qhawhitona ghuttay kodhdhi qhama arteppa hoqhunko Haallikkitottay hoqhqhankunnu.