Fartenu Karo Qaghito Kula Lighghe
2
Hune dhappitepa cʼuppo haahundhina haqti he farrite ahxay,
2 hussatakka ashshanko magha piyye qhaatʼina kala isa ashshankuy,
hossi nassidhessi maghooma monthoʼita qhaghana rafisampakko kodhdhi holuppa hantukka nassosi koro ye Haallikkonu eeʼe payina kodhadhanukka aʼeeʼe payteppa isa qaakanku ahxay.
3 Ine kaasay xayna qharaʼita woʼo sakanko haaninakki an hxasesinippa isan nakala ashshaanippa isan usundhena kitteʼitha qaakaani.
Qhamo tookke kula inekka miiray Haallikkitona kalla ahxay.
4 Naqharray Haallikkosi hxurakko huusuttay shorokitto kodhdhi cʼiknosi huusu dhamma iʼineesi sheeghina haqati,
5 an dhappitte taanittay he farrine kodhdhinenakki Kristoose qale he qagha ine kodhi,
ho an dhdhintekka teexakko Haallikkitottay.
6 Haallikko Kristoos Iyyesuse qale iffartatte ine haqisipa ghuta monthidheema Uso qale ine qakatheesu.
7 Hussakka horxuntesi Kristoos Iyyesusettay perre okaynana ine armateesi teexakkossi shorokunko huusuna olho akitaxnittay ye sheeghiisi ine hiʼaasenu.
8 Hune ho adhdhinte dhukkaysadhe kaakuruy hxoruxhuntettay,
husakka teexakko Haallikkito dhiishay kodhmo haahundhittay qandhikka.
9 Yaxakka qhamu ye peepaninu kodhmotta qandhikka,
10 Moʼo maala payni kodhmosi xeesa Haallikko qhariteema intoosipa ine gharisuusi qhama konnaaninu ine he Kristoos Iyyesusetty uumamni kodhmo xarghe Haallikkitona.
Toʼokunko Kristoosettay Tayama
11 Hune he xayna qharaʼita dhalatha haahundhittay koro Ayhudhatte huni kodhdhonku,
hessi kodhmo axarghe qhawhitottay kodhina payatti “ine he karrzamni” payattay “Heye karrazamonk” ahunena payi into hela thaaya.
12 Perisana qhama Kristoose male kodhdhiteppa waarsho Israʼeelattenakka sikapuyankuppa Kʼaalesi katape kippitonu hayhitto kodhdhankuppa piyye qhaatʼina isa kippopa Haallikko male qaakankusa hela thaaya.
13 Hantu kapay hune hessi qharro sikapuyte Kristoos Iyyesusesikki adhukkaysatteppa kʼeeqhte thuusuttay itʼtʼuyanku.
14 Moʼo maalla payni hossi koro Ayhudhattepa koro ye koro Ayhudhatte kodhdhuusi toʼoke kodhipa pokkolessi poghghathitoosikka pulu Kristoose Usokki nakayho haani.
15 Hikkeesikka hayopa tampe illakki sakanko huusuttay puli,
olhunna maallay hasa kodhikka usundhissa lakkina kittate qhawho qhawthito toʼoko qhamu ummnipa nakayho okasunu.
16 Maskʼalaama fare huusuttay poghghathoosi patisuy,
usundhe lakkiisi pishko toʼoko kodhuppa Haallikko qale ararsu.
17 Okayuppa hunessi sikapuyteppa hessi itʼtʼanukka nakayho thorruyu.
18 Ine kaasay Uso kakoru Nasso toʼokusattay Appa kula itʼtʼuye an alkasnaani.
19 Hussa maallay xaynu koru hune kʼulkʼulaawhe qale koro piyye toʼotatepa ahxke Haallikkito dhiishay okaayopa hayhitho qandhikka.
20 Kiriththo erkampawhattepa ho hxuumampawhatte sappeema aghghupthamte,
awrukkosi dhikita manne ghapakka Kristoos Iyyesuse.
21 Mannissa Usoatakki illa ghapamneppa Manne Kʼulkʼullawhessi Pogholhito kodhdhenu isi ghoha.
22 Usottay hunekka Manne Haallikko Nasso huusuttay naqaaki qhama kodhdhintenu anna qale ghupthamanku.