Hxurransadhe Kristoosettay Tayamay
5
Hxurransadhetay qhama qaaknaaninnu Kristoose hasi ine lihasi.
Lammi dhikitapa shikkaranku,
laanka kʼampara aylinkitosa olo ghaasame.
2 Ano Pawuloose olho an hune qalli husi,
karrasame awwoote payni,
Kristoose ye hune pakirko kodhdhini.
3 Qhawho karrasame woʼa hikke kaasasi dhikkisenu qhamu kitte na gheeqamtisa laanka anna holipa isan qhawho kaasannu pareema qalla.
4 Hune he hikkettay pare qaghunko tayadhenu kokkisadha,
Kristoosena arrehhammite,
teexakko Haallikkitonakka sikapuyanku.
5 Ine kapay Nasso Haallikkitottay kippossi pare qaghunkitoosi dhukkaysadhetakki an tiqithanaani.
6 Kristoos Iyyesusesikki adhukkaysadhi payyini karrasame thaakki karrasame hxure ye koro pakiri,
ho koro pakira kapay dhukkayisadhe cʼiknottay armadha patta.
7 Ahxay hermaththo haahundhi ho xeesa;
emma ho hune kuththumipa qhamu huni dhukenu eeʼe paynitte hunena kohxhxuy yaxa?
8 Marse hasa ligha he Haallikkossi hune ooqina qandhikka.
9 Qhama payina “Haqisisso takkayya pukessa kaasasikki haqisisi” kula.
10 Naqharray dhihadhe qawni qhamu huni sheeghitessa Pogholihottay an upadhi,
moonu payni yaxakka ho hunena tupe dhappisa qagha payni inna qhaqhamnay.
11 Koro hayyu,
haka kuyyu saasa an karrasame thorruyi payni,
emma moʼo maallakki haka hantu saasa ye ghoghore?
Hasi kodhdhti payni,
maskʼala Kristoose kuththumatte ye kodhdhu ahxay.
12 He hunena tupe dhappisa karasme patta ye kodhdhunna ihhela qhitʼe.
13 Koro haayyu,
qhama ahxhxurransadhettay qaakintenukki aʼooqaamte,
hxurransadhe thaahundhi kapay the woʼo sakankito dhikkisasay olo kodhe,
hussana kanta qhawho tookko itookonu cʼikinottay kodhadha.
14 Hikke kaasay kʼaale toʼothetakki illa ghapamti;
isisakka the payyana:
“Qhawhoosi qhamo haahu kula cʼikadhaa”
15 Naqharray qhamo harreete appukkaqate pukkaqate ille qhawiteppa isa ille yiʼanku payni,
qhamu huni ille pattisintennu he tiqthadhindha.
Awsho Nassito Pana Awsho Sakankito
16 Lammi hasa an payi,
nassottay qaakindha,
woʼo sakankitoosi olo kodhe.
17 Sakanko olho Nasso ye woʼiisi,
Nassokka olho sakanko ye woʼiiskki yooki,
usundhissa lakki qhooti ille toore maallay olho awwooteesi kodhe huni alkasinte.
18 Nasso aʼinthoosatte payni kapay hune hikkatte kalla qandhikka.
19 Kodhmo sakankito ho armadha:
husaka paalakuntepa lokmepa paalakuntenu ille gaghappadhepa,
20 killanko kaanasepa bhaasannepa poghghathopa hommepa paxxakopa yookuntepa miirapa pukkaqte thaahu patta cʼikadhepa ille rereehepa qhawho tookkoma lathu haqepa,
21 tʼuuhxarnkopa hxayyepa hiripkopa he hasa lighoma.
Qhamossi an inthoosipa paya kula hantukka an hune qalla,
koro onke hasa lighattay qaaka kaasay ahxase Haallikkitoosi ye tayni.
22 Awsho Nassito kapay:
cʼiknopa hxasopa nakayhopa dhuupaythepa horxuntepa xeesnopa dhukkaysathamepa,
23 laaluntepa he pankadhe.
Hikke oli hasa lighaasi kohxhxa ye qaghti.
24 He Kristoos Iyyesuse kodhdhe dharaʼopa woʼo maghaasi maskʼalaami dhise.
25 Nassotakki an qaakni payni,
Nassottay lallaaghamni.
26 Qawho tookko tookkosi maghinonu haqisettappa ille yookettay lathu he peepe hxuri.