Qhawho Kaasannu Xeesno Kodhe
6
Koro hayyu,
qhawho tooko cʼuppo kitta hxulli payni,
hune he qagho Nassawinkitottay dhiktte usosi laluntettay holase gheeqasa.
Naqharray athokka qhamu athu themmamintennu he tiqthadha.
2 Qhawho tookko idhdhooqho qhawho tookitoosi dhooqhi,
onke hasa lighattay hayo Kristoosesi adhdhikkisnankuye.
3 Yaxakka olhu koro pileete woyittay ye sheeghina:
“Ano koro pileete an ghula” ippaynipa isi dhihadha payni,
pukaqe thuususikki tataki.
4 Qhawho kaasa ikkodhmo huususi qhoththoosadha,
xaaysa tupettay,
pukaqte thuususi qhawho pile qale ye kitaxisunna,
kodhmo huusuttay peepadhesi ittayannaye.
5 Qhawho kaasay dhoqho huususi dhoqhadhe gheqasa.
6 Qhawho kʼaale kolladha kollisampakko huusu qale olho xeesa kaasasi iqhqhootadhdha.
7 Olo tatakame,
Haallikkonu olo maliye.
Qhawho olhu pooxadhi ususasikki ghimanni.
8 Qhawho sakanko hxaseesenu pooxadha,
sakankito patiteesekki ghimanni,
ho Nasso hxaseesenu pooxadha kapay Nassito qagho perre ye hume sheeghenaki ghimani.
9 Hussa maallay kodhmo xeesa kodheete kaalla olo lunthuqhadhe,
kippo ini ghooxoninakki xeerissa dhaghape payni ghimakoosi an ghimanaani.
10 Hussa maallay faroote an tayanni payni koro kaasanu,
karo ghula koro dhukkaysadhanu xeesno konni.
Nakayhopa Dhihamte dhikkattate
11 Qhama xargho hayyuttay qallidhdhe kaanomattay hune tooxisa eemindha.
12 Koro olho pishkito armadhattay he hiʼaase woʼa qhama karrasamintenu hune kitesenukki kokkisadhe,
olhu namallay hasa kodhe qhamu maskʼala Kristoose maalay ye ghoghoramnennu.
13 Usundhe sakanko hahundhittay he peepe qhooti woʼe maallay dhiishoy usundhissa karrasamekakki he hikke tiqthadha qandhikka.
14 Peepadhe maskʼala Pogholho haani Iyyesus Kristoosena malettay olho pile iyyela sikaapuya,
Maskʼalissattay dhihadhe maghay hassa piyye qhatʼinna iyyela rehhamiti,
anokka nakalla rehhamma.
15 Karasame takki karasame hxure olhu koro paki ye qaghi,
ho koro pakira kapay Kristoos Iyyesusettay uumatha qhawtitto kodhdhe.
16 He hayu tiqthadha kaasappa hessi dhalitho Haallikkito kodhdhe Isiraeladhenu nakayihopa horxunte innu kodhdha.
17 Paathanne pishkko hayyuna qagha qhama kodhampakko Iyyesus Kristoose kodhdhisa qhooti hiʼasi maallay xaynu koruy yaxakka yeye rakkisni.
18 Koro hayyu,
teexakko pogholho haani Iyyesus Kristoose innasso haahundhi qale kodhdha!
Amen.