Pare Qaghunko Hu Tayami Kristooseesi Dhukkaysadhettay
3
Hune he huni hela thaayte koro Kelathiyay!
Yaxa huneema bhaasanne kodhi?
Iyyesus Kristoose qhamossi dhisami kulakki hunena miinatte ximbhadhi ahxay.
2 Olho toʼoko pattakki an hunena kasqadhe woʼi:
Nasso Kʼulkʼuloosi ho akkatte hikke thiqthadhettam ata kʼaalessi wonkelatte ahune thorruyiisi dhukkaysadhettay?
3 Hune he hasa ghaqqitti huni hela olo thaayte?
Kʼarkʼarsa Nasso Haallikkitotakki appayitteppa isa dhihadhe thaahundhittay dhikkisennu kokkisadhanku?
4 Rakko aqhqhoota Wonkelatte akkatte ho lathukki kodhdhi payyo?
Hasa kotte payni karay dhuke ho lathukki kodhdhi payyo.
5 Haallikko hu Nasso huususi hune teexipa isi hunena kittatte dhahxhxotadhdhe kodha qhoota hikke tiqthatennu atam qhoota kʼaalessi wonkelatte apaqhateppa dhukkaysadhankunnu?
6 Into Aprihaamesi hela thaaya,
“Uso Haallikkosikki dhukkaysadhi,
dhukkaysadhe thuusukka pare qaghunko kodhdhippa nu dhihamoy.”a
7 Lammi he dhukkaysadha qhamu miʼaadhe Aprihaame kodhdhessa arindha.
8 Qhamu Matʼaafa Kʼulkʼullo payina,
Haallikko koro ye koro Ayhudhatte kodhdhu dhukkaysadhettay qhamu pare qaghasinisa iʼinthoosipa hiʼu:
“Warshidhdhe kaasa hottakki sakamneb” payettay inththoosippa wonkeleessi Aprihaamenu arasoy.
9 Hussa maallay he dhukkaysadha Aprihaamesi dhukkaysadhi qali sakamne.
10 He hikke tiqthadhettay peepadha kaasay he qhiicʼame;
“Qhawho olho matʼaafa hikkatesa atooxi kaasasi ye kodhi ho qhiicʼamikki”c payamtipa tooxamoy.
11 “Qhawho pare qagha dhukkayisadhetakki qaaki”d qhooti payamti maallay yaxakka minte Haallikkitona hikketay qhamu ye pare qaaghunko tayanissa olho arami.
12 Hikke the kiriththo dhukkayisadhatte sappeema theelamti qandhi,
naqharray hasi payamti:
“Qhawho hikke dhikkisa isetakki qaghottay qaghni.”e
13 “Qhawho karkooma rakkamipa faru kaasay ho qhicʼami”f qhooti payamtipa tooxamo maallay Kristoose qhoota haani maallakki qhiicʼo ikkodhdhipa qhicʼo hikkatena kalla ine lihasu.
14 Husikka hu hasa kodhdhi,
sakessi Aʼaprihaamenu teexisi kodhmo Kristoos Iyyesuse kodhittay koro ye koro Ayhudhatte kodhdhunnu qhamu dhaghghapnipa inekka Nassosi Haallikko an hune teexna payisi dhukkaysadhettay akkadhaaninu.
Hikkepa Kʼaale Kippito
15 Koro hayyu,
qhamo kolinko korito kula an lighno hune qalla,
katape koro ille xuli kakki toʼonakka apayi tuppettay yaxakka ye oohi takki yena padhaawi.
16 Haallikokka Kʼaale kippitoosi onke hasa lighattakki Aprihaamepa sanynye thuusunu teexi.
Matʼaafakka kʼaalessi kippito sanynyadhdhe uso kala okaynanu qhamu kodhdhitisa he kishanu ye payi naqharray qhamo aqhawho toʼokkonu qalli kula;
“Sanynye thaahunukki” payi,
Ususakka Kristoose.
17 Lammi ano hasa an payi,
hikkessi perkko 430 tupettay teexamti,
kaatapessi qharraʼitha Haallikkottay aramtiisi ye pulintippa kippossi kʼaalateesi oohi.
18 Hikketakki aghapatha tayi payni ahxay,
kʼaalessi kippitottay ye tayamu,
Haallikko hu ghapatha huususi Aprihaamenu qhamo teexakkito teexi kʼaalessi kippitottay.
19 Emma olho ana maalla hikke teexi moʼo?
Hikke hu padhawamiti,
dhappite koritona payyati haki sanynyeesi Kʼaale kippito ghudhdhiti okayti saasa,
hikkisakka erkampatte kakkorukki teexamtipa ararsampako toʼokkottay kodhmito nakay.
20 Ikkodhitama kapay ararsampakkusa tookkonu patta qandhikka,
Haallikko kapay toʼokko.
21 Inta Hikke the kippo Haallikkitoosi tooray?
Moʼokka payni yetoortikka!
Hikke qagho tayasenu teexami payni,
pare qaghunko hikkettakki tayamni ahxay.
22 Naqharray kippossi Iyyesus Kristoose dhukkaysadhettay tayama qhamu koro dhukkaysadhanu teexamninu,
qhamu matʼaafa payi kula koro piyye qhaatʼeete qagha kaasay cʼuppotakki shapami.
23 Dhukkaysadhi ye okayunna qhaarraʼitha ine he hikkettay shapamnikki an kodhdhinipa haki dhukkaysadhe armadhinti saasa ina kʼupamoppa hikkatte kalla kodhdhaani.
24 Hussa maallay qhama dhukkaysadhettay pare qaghunko tayanaaninnu hikke apinaththessi Kristoose kula ine dhaghghapoosnakki kodhdhti.
25 Hanttu kapay dhukkaysadhissa qhooti okayti maallay lammi ine apnanko hikkattena kalla ini ghayyni.
Miʼaadhe Haallikkito
26 Hune kaasay Iyyesus Kristoosesi dhukkaysadhettay miʼaadhe Haallikkito akkodhdhite.
27 Kristoose qale qhama toʼokke kodhdhintennu hune he shoxatte shoxatte kaasay Kristoosesikka aʼurkuyte.
28 Koro Ayhudhattepa koro Krikatte,
aylithopa ho ye ayliththo kodhdhu,
tʼiirakkopa xiskatitto kittatte ille reehe ye qaghe,
hune kaasay Kristoosettay toʼokke akkodhdhite.
29 He Kristoosekka kodhdhite payni hune sanynye Aprihaame,
qhamo kʼaalessi kippito kula hune tayampawhe.