Erkampawhe Tookke Qhamu Pawloosesi Akkadhe
2
Perko hudhdhanpa salax tupettay lankka an karo Iyerusalame kula ashshi,
xinkisana Parnapaase ye qali qaghi,
Thithoosikka an ooqipa he qale ashshottay.
2 Armadhe an tayadhina haqti hakula ashsho,
Wonkelessi an koro ye koro Ayhudhatte kodhdhunnu thorruyiisi inthawanpawhenukka qalla.
Moʼo maallay payyni yaxaray thaythe an heri holuppa hantukka isan thaythe hera qhoota an payipa ghaaponuy.
3 Thithoossi ye qale qagha iqhqhawho Krikkatte kodhdha kakki payni qhamu karrasamninu olo uso kittuyu.
4 Hussakka koro kollinko aayyay kollisa qhooti hxuransadhessi an Kristoosettay tayaniisi inena qiweppa ayilaadhdhe ine kodhenu looxatay karo haani hxulonkkinnu.
5 Naqharray korusanu okkotto kakki ininu eeʼe payooni,
hussakka dhuke Wonkelatte ye oohamunna qhamu hune qale dhikitintipa qaakonnu.
6 Qhoota inthawanpawhe aramanu kitte yeyela qaghti,
moʼo maalla payni Haallikko ye minte qhawhito eemipa isi lighghadha,
korusakka erko haayyusa olho naye padhaawi ye qaghi.
7 Naqharray Petʼiroose koro Ayhudhattenu qhamu Wonkele thorruyininu qhamu anu atara teexi kula,
yeesikka qhama koro ye koro Ayhudhatte kodhdhunu Wonkele thorruyenu atara aye teexisa iʼupadhe,
8 Hussa maallay Haallikkossi Petʼirooseesi qhamu erkampakko koro Ayhudhatena kodhdhininu kodhi,
yeesikka qhama erkampakko koro ye koro Ayhudhatte kodhdhunna kodhdhinukki ye kodhi.
9 Inthawanpawhessi qhamo dhiipeete ximpadha,
Yayikʼoopepa Petʼiroose pana Yohanise teexakossi aye teexisi iʼupadhenna,
anopa Parnapaase qale qhamu kodhdhessa iʼine arase,
usundhe qhamu koro Ayhudhatte kula ashshinenukki ille xule.
10 Olhu kokkiseppa ine dhihamonki teekollonu dhihadhe qhamu ini hxurennu patta,
karay anokka hussaasi kodhenu ho gherisadhi.
Pawloose Qhamu Petʼirooseesi Qheeri
11 Petʼiroose xinki karo Antʼokiya okayina onke aramattay qhooti dhappi maallay miinteʼitha an uso qheeri.
12 Korossi Yayikʼoope eraki ye okayunna qharaʼita Petʼiroose koro ye koro Ayhudhatte kodhdhu qali yiʼo yiʼi.
Iʼusundhe okayenna kapay korossi iyyana karasame gheeqasasikki ghaapipa koro ye koro Ayhudhatte kodhdhunna kalla rehamuppa shohnonadhe paayu.
13 Parnapaasekakki haaki paseste thuusundhittay akkamni saasa,
Ayhudhadhe tookekka paseste thuusu qali ghare.
14 Kodhmo huusundhi Wonkele dhukatte qhamu ye kodhdhussa an upadhina Petʼiroosena koro kaasa minta hasa anna payi;
“Atho Ayhudhitto,
ikkodhitama aata koro ye koro Ayhudhatte kodhdhuttay dhiishoy ho koro Ayhudhattettay athu qaakti;
emma malaala koro ye koro Ayhudhatte kodhdhu qhamu aata koro Ayhudhattettay qaakninu kittesiti?”
Koro Kaasay Hu Dhinni Dhukkaysadhettay Patta
15 Ine dhaladhe thaanittay koro Ayhudhatte dhishoy,
cʼuppolawhessi ye koro Ayhudhatte kodhdhonki kula qandhi.
16 Ikkodhitama kapay qhawho hu pare qaghunko tayanni Iyyesus Kristoosesi dhukkayisadhettay dhishoy hikke tiqthadhettay qhamu ye kodhdhussa an araani.
Iyyesus Kristoose dhukkayisadhettay qhama he pare qagha kodhdhinaaninnu inekka Kristoos Iyyesusesi an dhukkayisanni,
yaxakka hikke tiqthadhettay pare qaghunkoosi ye tayanni.
17 An Kristoose dhukkaysadhettay pare qaghunko gheeqaninakki an cʼuppolawhe kodhdhinanippa tayamaani payni,
lammi Kristoose kodhampakko cʼuppito payyo?
Hasa qandhikka!
18 Hossi an pulisikki an holipa isan ghupadha payni ano ho hikke dhappi qhama kodhdhisaki an hiʼaasi.
19 Haallikkonu qhama qaakninu,
hikke kakurru qhamo qhawho fari kulakki an hikkatte reehami.
20 Kristoose qale an maskʼalaama dhisami,
lammi xaynu koruy ano ho qagho sheegha anu kodhdhinippa qaako,
naqharray Kristoose yela kittatte qaakni.
Hantu qaako an pishkottay qaaki hossi ye cʼikadhipa qhoota haayyu maallay he teexuy dhukkaysadhessi an Miʼaye Haallikkitona sheeghittay.
21 Teexakko Haallikkitoosi ho lathu anu konni,
moʼo maalla payni pare qaghunko hikkettay tayama payni,
Kristoose lathukki fari payyo.