Erko Erkampakko Pawloose Koro Piyye Kalathiyannu
1
Ano Pawloosessi korottay taakki ghulno qhawhitottay anu erkamu naqharray Iyyesus Krisitoosepa hossi farttatte Uso haqsi Haallikko Paappottay erkami,
2 holuppa koro haayyu ye qale qagha kaasay.
Hune hessi mannadhdhe kristaanay piyye Kalathiyanna qagha kaasannu,
3 Paappo haani Haallikkopa Pogholho haani Iyyesus Kristoosena kaanta faroote xeesappa (teexakko Haallikkitopa) nakayho ihhune kodhdha.
4 Uso perri maghana ine dhinisenu qhamo woʼo Paappo haani Haallikkito kula qhoota cʼuppo haani maallakki pukkaqte Thuusu teexi.
5 Hussa maallay perre ye huume sheeghennu haka perre ye huume sheeghe saasa kaalatha innu kodhdha!
Amen.
Wonkele Dhukatte Toʼotte
6 Hossi cʼikno horxunte Kristoosettay hune ooqisi hxurepa Wonkele pile kula haattay laaghame thaahundhi iyye dhahxhxisti;
7 dhuke karay wonkele pile ye qaghti.
Olho anna maallay hasa payi koro tooko tooko ho huunena tupe dhappisapa isi Wonkele Kristoosesi xongholoolisenu kokkisadhaki qagha.
8 Naqharray inekka an kodhdhina taakki erkampatte moonthitokka,
Wonkelessi an huune thorruyni malettay ho Wonkele pile huune thorruyna qaghna payni usussa haka perre ye huume sheeghe saasa ho qhiicʼami ikkodhdha!
9 Qhamossi an inthoosnippa hune qallaani kula,
hantukka anna holipa isan hune qalla,
yaxaakka Wonkelessi aʼakatte maallettay Wonkele pile huune thoruyna payni,
usussa hakka perre ye huume sheeghe saasa ho qhicʼami ikkodhdha!
10 Emma kati ano korito miinatte:
“An shooqhayya” (An pasese tayadhe woʼi) payame woʼim ata Haallikkito miinatte kati?
Qhamo qhawho koroosi hxasesa kulakki an hune lighi?
Koroosikki an hxasese woʼi payni ahxay kodhampakko Kristoose anu kodhdhini.
Ooqame Pawloose
11 Koro haayyu,
wonkeli an hune thorruyi the qhawhito tayamti qhamu ye kodhdhussa qhama artekka an woʼi.
12 Wonkeliisi Iyyesus Kristoose ye armaatheesi dhiishoy yaxanakka anu akkadhu,
yaxakka yeye kollisuy.
13 Xayna qharraʼitha an dhukkayisadhe koro Ayhudhattena gheyyana qhama mala qaakipa isa manne kristaanay Haallikkitoosikka uuma ghoghorapa patisenukka isan kokkisadhasa aʼapaqhte.
14 Dhukkaysadhe koro Ayhudhattena tiqadhettay koro Ayihudhatte an illay helinko sheeghninna uuma an ghuli,
aata appadhetenukka yokkunte dhammakki an sheeghi.
15 Naqharray Haallikko anu dhaladhunna qharaʼitha iyye rehhadhdhipa texakko husuttakka ye ooqu.
16 Xinkkessi an koro ye koro Ayhudhatte kodhdhunna kitteʼitha qhoota huusu qhama thoruyininu Haallikko Miʼaye hususi yetta armatheesenu cʼikadhina yaxaasikka anu thorrosadhu,
17 taakki he yela qharaʼitha erkkampawhe kodhdhe kula karo Iyyerusaleme anu ashshu,
naqharray hattakki an piyye Arapatte kula ashshi,
hatupenu karo Temaaskʼo kula hola.
18 Nakalemakka perko isex tupettay Kefassi ana payi Petʼiroose hiʼenu karo Iyyerusalame kula ashsho,
haamakka uso qale kuyyaqako hudhdhanpa hxupin oladha.
19 Qaso Pogholhito Yayikʼoope malettay erkampawhatte yaxaasikka anu hiʼu.
20 Olho an hune tooxittay qhamu anu Haallikko miinta aayya qalladhisa pareema an hune qalli.
21 Xaysa tupettay karo piyye Sooriyappa Kilikʼiya kula ashsho,
22 xinkisana mannadhdhe kristaanay piyye Yihutanna qagha hannay yeye aronki.
23 Usundhe kapay qallithe hasa paya pattakki apaqhe:
“Qhawhossi ine ghoghora,
dhukkayasadhessi xayna qharaʼitha ippatise woʼisikki holi isi thorruya.”
24 Usundhekka qhoota haayyu maallay Haallikkosi kalatayisadhonkki.