Pawloose Qhamu Waarsho Kʼoronthoosennu He Ghadhi
12
Pakirko he peepettay tayamakaki ye qaghipa isi hepeepe gheeqasa payni armadhe an Pogholhito akkadhi kulaki an ashshini.
2 Perko hudhdhanpa salaxna qharaʼitha qhawho toʼon ho Kristoose dhukkaysadhi haaka moontho isxa saasa simdhamiisikki an ari,
hu akkamikka ippishkottay kodhdha ippipishko male kodhdha anu ari;
Haallikko kapay iʼara.
3 Qhawhusaasi an ara naqharay ippishkottay kodhdha ippishko male kodhdha anu ari,
Haallikko kapay iʼara.
4 Usokka Kenneete kula simdhamuy xaytusana olho olo qalle alkasnikki apahi.
5 Qhawho hasa lighattay an peepadha,
qhoota haayyu kapay malaale thaayyu malettay olhan peepani ye qaghi.
6 Peepadhe awoʼi kakki payni qhamo qeepakkito dhihame yeye gheeqasti,
moʼo maalla payni olho an qalladhi dhuke.
Naqharray yaxakka olhu iqhqhoota haayyu hiʼipa iʼapaqhina ghutay qhamu yeye hibhbhani maallay peepadhatte anhe tiqadha.
7 Ximbhadhi dhammana haqti qhamu anu hepeepni maallay dhotampakko pishkito hussakka hoye qotʼuya erkampakko Seetʼanaki aye teexi.
8 Olisa qhamu yela panninu,
issextakki an Pogholhoosi waathadhi.
9 Uso kapay iyyela payi “Teexakko Haayyu ihho hxafna,
humna haayyukka hu pareema ximbhadhi xeere atardhina.”
Hussa maallay humna Kristoose qhamu ye qale qaghninu the ghulattay inna hxasodhanakki an tardhinko haayyuttay peepadhi.
10 Hussa maallakki an qhoota Kristoose tardhinkopa rakkopa ghoghoramepa cʼinkʼettay hxasoodhi.
Xeere an tardhinakki ano ho dhikita.
11 Peepadhe taayyuttay qeepakko an kodhdhi!
Lammi qhama qallaninu hoye kodhi hune,
ahxay hune ye kaanasna,
ano moʼunko haayyuttay ho ye arami an kodhdhakka payni hessi ana payi erkampawhe kaanooma na kalla moʼottakka anu qhacʼi.
12 Olho erkampawhunko dhukatte hiʼaasa hune kitta kodhdhamadhi,
hussakka dhuupaythettay kokkisadhepa milikitaadhdhepa olho koro dhahxhxisapa dhahxhxootaadhdhe.
13 Huneesi rakkise hxure malettay,
mannaadhdhe kristaana pileete mootakka qhacʼite?
dhappitisaasi ye hxura.
14 Husi tara isxa an hune kula okayenu gharsadhi.
An okayi payni anu hune rakkisni,
ano ho an gheeqi huneesi dhishoy kodhatte thaahundhi qandhikka,
holuppa ahxke miʼaadhenu kodhadha dhishoy miʼaadhe qandhikki ahxkenu kodhadha.
15 Ano qhoota haahundhi maallay olho an sheeghipa pukaqe thayyusikakki an teexini payni iyyela xeesay,
emma ano hasa ghaqqitikki an hune cʼikadhi payni hune okotto pattakki ayye cʼikatte payyo?
16 Ikkodhdhitama kapay anu hune rakkissu,
naqharray ano ho dhohmuntepa tatakettay hune rakkissa ye hune lighe hxurinti.
17 Emma keenni korossi an hune kula erakina kittatte qhawho toʼokotaka inta an hune sari?
18 Thitho qhamu hune kula okayininu awwaathadhi,
qhawho haaniisikka uso qale eraka.
Inta Thitho ihhune sari?
Uso illay nasso toʼokottay ini lallaghamooni?
Ashshanko haanikka toʼoko qandhi?
19 Ine he haka hantu saasa rakko haani maallay hela malse holasenu patta qaakakki an hune lighni?
He Kristoosekki an kodhdhinipa Haallikko miinta isan qalladhaani,
holuppa koro haayyu;
hannu husi kaasaasi konni huneesi dhiktisenu.
20 Xeere an hune kula okayina,
yexarakka qhamo ano woʼi kula anu hune tayni,
taakki qhamo hune woote kula huniye tayintekki an payipa isan ghaapa,
yaxarakka hunena kitatte poghghathopa yokkuntepa miirapa koronkopa makaxko patisepa hxashaththopa peepo pana paqhato qaghnaki an payipa isan ghaapa.
21 An laanka hune kula okaayana Haallikko haayyu ghapna hune miinteema ye palamisukki an payipa isan ghaapa,
hussakka he kisha cʼuppo ixayna qharaʼitha kodheppa lokmepa palakuntepa palakuntenu ille ghapadhe maallay ye Haallikko kula holonkinna qhamu ye haqhneppa asananu.