Dhihamte Dhikkatatte
13
Husi thara isxa an hune kula okaayi,
“Olho kaasay misikire lakki taakki issextakki dhuke kodhdhe alkasi.a”
2 Xinkesi an laanka hune emmina qhama he tiqtatennu an kokkisipa hune dhihama,
hantukka sikapnonukki an kodhdhipa isan hune dhihama,
xinke an laanka hune kula okayina he xayina qharaʼitha cʼuppo kodheppa koro pileesikka anu hxurri.
3 Hu hasa kodhdhinikka Kristoose qhamu ye kitta kodhdhipa isi qalladhasa qhoota misikire gheeqete maallay.
Ususakka hunena kittatte ho dhikita dhiishay ho thardha qandhikka.
4 Uso hu maskʼalaama dhisamipa faru ittardhinkottay kodhdhakka payni hantu humna Haallikkitotakki ihho qagha kodhdhipa isi qaaka,
inekka Usottay he thardha an kodhdhinakkai payni,
huneesi kodhadhenu kapay humna Haallikkitotakki an Uso qale he qagha kodhdhinaanipa qaghooni.
5 He dhukkayysadhettay dhikitte kodhdhe haahundhi arenu he qhothusadha,
pukkaqate thaahundhiisi theemma,
Iyyesus Kristoose qhamu hunena kittatte qaghisa huni upadhonku inta?
Hasakki ye kodhdhu payyni themmatetakki arante payyo.
6 Ine kapay qhamu ini thematettay ranonissa qhama artesa an kippo kodhi.
7 Hantukka olho magha qhamu huni kodhintenu Haallikko an ghissanni,
ho an ghiassanekka ine he kokkisadha qhama kodhinisa koro qhamu ine eemninu qandhi,
naqharray ine he kokkisadha kakki ini kodhdhooni payni hune qhama olho xeesa kontennu.
8 Duke maallay dhishoy dhukkemate olho toʼokokka kodhe ini alkasne.
9 Ine he thardha an kodhdhinipa hune kapayi he dhikitaka kodhdhanku kakki payni an hxasoodhaani,
ghissoote thaanikka hune he olho toʼokokka ye hunena qaghi qhama kodhdhintenu.
10 Xinke an hunena sikaapuyina olhanna maallay erkuusi hune thooxi,
kuyyaqako an hune kula okaayina ghulno haayyuuttay qhamu anu hune ghaapisni maallay,
Pogholhokka hunnu ghulno ye theexi huneesi ghupadhenu dhiishay pulenu qandhikka.
11 Dhikkatatte koro haayyu,
nakayye ghayyindha!
He olho toʼokokka yena qaghi kodhdha;
dhihamte thaayyuusikka apaqha;
dhihatoote toʼote sheeghindha;
nakayyhottay qaakindha.
Haallikko cʼiknitopa ho nakayhito ihhune qale kodhdha.
12 Xasatto kʼulkʼulawittay ille xasa.