Pawloosepa Erkampawhe Ayya
11
Qeepunte thaayyu takkayaasi ye dhuupadha,
karayka ayye dhuupadhanku.
2 Yokkunte Haallikkitotakki an hune yooki,
huneesi qhamo sheeththe olho toʼokoka yena qaghi ye tʼiirako aru ashamponu rapadhi kulaki an Kristoosenu hune rapadhi.
3 Naqharray qhamu tawwo Hewwaanesi dhohumuntettay dhappisi kula dhihadhe thaahundhikka qhamu ye xarkishaminteppa cʼiknopa xeesnossi Akristoosenu sheeghtenna kalla lighanku maallay an ghaapa.
4 Moʼo maalla payni qhawho tooko hune kula okaynapa Iyyesusessi ine hune thoorruyina mali Iyyesuse pilesi hune qallu payni,
taakki nassosi aʼakkate malettay nasso ho qawni akadhanku payni,
taakki wonkelesi adhukkayisate male the qawni dhukkayisadhanku payni,
miinakale aʼolissanu eeʼe paynte payyo.
5 Ano kapay “erkampawhessi arama” apayina kalla ho qhacʼa yeye lighti.
6 Qalithekakki anu alikasi payni arno kapay an sheegha,
husssikka onkke qaawni qaawnitakki an pareema hune qallini.
7 Qhama hune qila paytennu ano kata he paasepa wonkele Haallikkitoosi hxaayye maalle hune thooruye thaayuki cʼuppooma ye dhihamna kati?
8 Huneesi kodhadhenu maallay manadhe kristana pileete kʼarkʼarsa akadhdhe thayuttay an usundhe sari.
9 Xinkessi an hune qale qaghipa olho tooko tooko isi ye gheeqasana koro dhukkaysadha piyye Mekʼdhoniyannu okayi olho ye gheeqasasi qhooti ye teexe maalay huneesi anu rakkisu;
qhamu anu hune rakkisninu an he thiqithadhi,
karo miinatekka an he tiqithanna.
10 Dhuke Kristoose haki yela kittatte qaghti saasa,
piyyadhdhessi Akkaayiyana kittatte qaaghana ho yela peepadhe thaayyu dhawrasna ye qaaghi.
11 Olho anna maalla hasa payi moʼo?
Qhoota anu hune cʼikadhi maallay?
Qhama hune cʼikadhisa Haallikko iʼara.
12 Erkampawhissa ayya payana:
“Inekka qhamo huusundhi kulakki an kodhani” olhu ihetta peepeesi dhapisenu husi an hantu kodhisi karo minattekka an konna.
13 Koro hasa ligha ho erkampawhe Kristoose lighenu he oʼooha,
erkampawhe ayyappa kodhampawhe koro tataka.
14 Husikka ho koro dhahxhxisna qandhikka,
moʼo maalla payni Seetʼana kakki qhamo erkampatte hamakkito lighninu he oʼooha.
15 Lammi kodhampawhe huusukki kodhampawhe pare qaghunkito lighenu he oʼoohna payni olho koro dhahxhxisna qandhi,
dhikkatte thuusundhikka qhamo kodhmo huusundhi kulaki kodhdhinti.
Pawloose Rakko Nahxafittay Ippeepadha
16 Hantukka hasa an payi,
yaxakka inni qeepakko kula ye dhihu,
hune kakki hasa ye dhiha payni qhama okotto peepaninu qhamo qeepakito ye akkadha.
17 Ho anhasa saqako mulottay kodhdhipa isan qalladha qhamo qeepakito dhiishay qhamo woʼo Pogholhito kula qandhikka.
18 He kisha qhooti olho piyye qhaatʼina qaghattay peepadhe maallay anokka an peepanna.
19 Hunekka qhoota thaayho sheeghte maallay qeepawhenu hxasotakki annu dhupatte.
20 Yaxakakki ayladhdhe hune konnapa,
hune saruppa,
pakirko husunu hune kapa xighghuppa,
isi huneesi he naqsa takki isi hune kakanaqasadha payni adhuupadhankku.
21 Ine kapay olisanu he uuma maalaala qhama kodhdhinisa palankottakki an qalladhi.
Olho yaxakka shaahxuntettay peepadhi kaasannu anokka qhamo qhawho shaahxumapa isi peepadhe alkasa kulaki an qhamo qeepakito qalladhi.
22 Usundhe Iprawiyadhe inta?
Anokka Iprawiytho ata.
Usundhe Israeeladhdhe inta?
Anokka Israeelito ata.
Usundhe sanynye Aprihaame inta?
Anokka sanynye Aprihaame ata.
23 Usundhe kodhampawhe Kristoose inta?
Anokka usundhena kaanta the ghulattay kodhampakko Kristoose,
an hasa payana qhamo saarakito kulaki an kodhdhipa isana qalladha.
Holuppa xeere kiishaki an kodhmottay tardhi,
xeere kiishakki an shappami,
xeere kishakki aye thubhbhi,
xeere kiishakki an farteema itʼtʼuyi,
24 Koro Ayhudhatte kiraafe hudhanko izzaxapa kollantakki tara hxupin na hoholepa ye kakarafoy.
25 Tara isextakki atholakkottay ye thubhbhi,
tara tootekka awrughettay aye hattapoy,
tara isextakka rakko markapatte yeema dhaghghapu,
kuyyaqako tookkopa awne tootte paso kitteema oladha,
26 xeere kishakka ashshankottay uuma rakkadha,
holuppa rakko kolle hoqhitipa ho shiftadheetepa ho koro haayyunapa ho koro ye koro Ayhudhatte kodhdhunapa ho katamapa ho piyye mandhitonapa ho pasito pana kristanadhdhe ayyannu haqha.
27 The dhammataki an kokisadhi,
xeere kisha tardha,
xeere kisha piʼaathe dhapepa puffayepa dheptetakka rakkadha,
xeere kishana puffapa dhepodha xeere kishana yiʼo anu lokodhunna oladha,
lalle dhapapa oshonkooma haqhaa.
28 Olho pileesi anuna dhihuna ho kuyyaqako kuyyakooma uuma ye ghadhasa dhihadhe an manadhdhe kristaana kaasannu sheeghi.
29 Ho thardhi yaxapa isi anuna qale thadhu?
Ho cʼuppottay kuttumadhipa isi anunu he ghadhu yaxa?
30 Hepeepe ye gheeqasa payni olho thardhinko haayyu hiʼasatakki an he peepni.
31 Hossi perre ye hume sheeghe saasa kaanasami,
Haallikkopa Paappo Pogholho haani Iyyesuse qhamu anu aayya qalladhisa iʼara.
32 Xinkessi an kathama Dhemaskʼonna qaghina rafisampakkossi Nukusa Aritaasena kalla qagha ye ghapasi woʼipa isi mankaxadhdhe kathama Dhemaskʼo thiqthatheesa.
33 Naqharray koochcho kitteemi ye qadhdheppa ohintessi kathamanna bhaqettay ye lihasonkippa piyyeema ye oodhasonkippa xarghe huusundhina pinna.