Malse Pawloose Qhoota Kodhmo Ikkodhadhi Kaaʼitha Hela Holasi
10
Ano Pawloosessi,
“An huunena miinatte qaghana qhawho ghaapa an huneena kaanta sikaapuyina kapay qhawho shahxako” payama laaluntepa horxunte Kristoosettay an hune waathadha.
2 Xeeresi an hune kula okaayna shahxumtettay qhama qallaninu thinku huni ye kodhintennu an hune waathadha,
hessi ineesi he dhihatoote piyyinattay lallaghama kodhapa isi ine dhiha miinteema kapay shahxumtettay qallaadhenu an qhutʼadhi.
3 An piyye qhaatʼina qaaknikka payni qhipato haani hayyunko koro piyye qhaatʼina kula qandhi.
4 Moʼo maallay payni maahxe an orxamnittay maahxe orxanko piyye qhaatʼina kulatta qandhi,
ikkodhitama kapay ho mishighe pule alkasna ho humna Haallikkito sheegha.
5 Peepopa tiyye arno Haallikkitosa haqa kaasasi an pullaani,
dhihadhe koro kaasanna an poojuynanippa qhamu Kristoosenu eeʼe payinti kodhaani.
6 Xinke eeʼe paye haahundhi pare kodhdhena eeʼe paye hxure kaasanna haalo akkenu an gherissani.
7 Hune olho setitoosi pattakki aʼeemite.
Yaxakkaki ho Kristoose kodhdhe husuta he peepa payni qhamu uso ho Kristoose kodhdhi kula inekka qhama he Kristoose kodhdhinssa are uso gheeqasa.
8 Ghulno Haallikko ine teexittay an uuma peepadhikka payni husittay anu palamni,
ghulnuusi ho an akkanni huneesi ghupadhenu dhishoy hune pulenu qandhikka.
9 Ano ho Erkidhdhe haayyuttay hune ghaapisa inni hune lighu.
10 Tookke tookke hasi paye:
“Erkidhdhe huusu he haxapa he dhikita,
naaqharay piishko huusu aʼeemana ho malaalapa qalliithe thusukka tha dhafamti.”
11 Koro hasa paya,
erkidhdhi haani an sikapnonu thoruyni kaasasi an itʼtʼayninakka qhama kodhmo haanittay hiʼasnisa are usundhe gheeqasa.
12 Koro he kaanasa qale he dhihe takki he kitaxe ye ine gheeqasi;
naqharray usudhdhe inni pukaqate thusudhiisi he qale hibhbhadhappa isi pukaqate thuusudhiisi he qale kitaxisana ye hela thaaye.
13 Naqharray ine hu gheeqastina ghutay ini peepanekka,
ho an hepepnekka kodhmosi Haallikko ine teexi haka hune qaghte saasa hxafnattay patta.
14 Xeeressi an wonkele Kristoosettay hune kula okaynina,
sapankossi kodhmito aʼine payina ini lighghooni.
15 Holuppa kodhmo koro pile tardhitty sapankossi aʼine payna ini lighghine peepadhooni,
ladhdhi dhukkaysadhe thaahundhi xinki ghohtipa isi ashsha kaasanna kodhmossi hunena kanta kodhenu ine payi qhamu naqnipa isi ashshanu kippo an konni.
16 Lammi sapanko qhawho piletena lighghettay kodhmossi axayna qhareʼitha kodhitay ini he peponinna piyyadhdhe hunena koray qaghana ote xeesay thorruye an alkasnaani.
17 Naqharray “Ho peepadha Ihhaallikkottay peepadha.a”
18 Moʼo maallay payni ho Pogholho uso kaanasi dhishoy ho pukkaqe thuususi kaanasisa ye cʼikathami.