Kʼarkʼarsa Akoro Iyyerusalemennu Illa Holaasi
9
Qhoota kʼarkʼarsa akʼulkʼulawhenu kodhi kaaiʼtha hune tooxe yeye gheeqasti,
2 moʼo maallay payni woʼo akoro pileesi kʼarkʼarenu sheeghteesi an ara,
perku andheeranu paayyatti hune he piyye Akkayiyanna qaaka koro pilesi kʼarkʼarenu he gharrsatte qhamu akkodhitessa koro Mekʼodhooniyannu peepadhettakki annu qalli,
woʼo haahundhi xeesa he kishasi kodhmo xeesanukki haqisi.
3 Thannu lammi husittay peepadhe an hunettay sheeghini the lathu qhamu ye kodhintippa haqhinnu qhamossi an inthoosipa qhoota haahundhi qalla kula he gharsatte qhama akkodhinteppa tayamankunnu koroosikki an eraki.
4 Koro Mekʼdhoniyaki ye qale okaynapa huni gharsadhonkunna huna hxafonki payni hune patta huni kodhdhokunna inekka hunettay peepadhe thaanittay an palamnaani.
5 Hussa maallay hu koro inthawnipa hune kula okayu xayna qharreʼitha kʼarkʼarsassi ateexenu hxasoteesi qhamu aghgharisinteppa usundhe tiqadhonkunnu usundheesi waathadhe olho gheeqasa,
laammi hxasottay teexenu olho adhihatteesi kittettay ye kodhdhunna ho woʼo haahundhittay gharsami kodhdha.
Hxasottay Teexe
6 Qhamo apayina,
qhawho olho takkaya pooxadha ho takkaya ghimadhi,
qhawho olho dhamma pooxadhakka ho dhamma ighghimanisa hela thaaya.
7 Haallikko qhawho hxsottay teexsasi qhooti cʼikadhi maallay qhawho kaasay qhamu saqko huusuttay dhihadhi kula itteexa,
azanettay taakki kittettay qandhi.
8 Xeere kaasay olho kaasattay qhama pukkaqte thaahundhi alkasteppa kodhmo xeesanu nakeese alkasankunnu Haallikko sake Huususi naqisepa hune teexe iʼalkasna.
9 Hussakka qhamu hasa paymtipa tooxamo kula.
“Teekollonu hxsotakki teexi
pare qaghunko huusukka perre ye hume sheeghe saasa qaaknia”
10 Ho pooxanu poodhaxoosi,
yiʼenu yiithoosi hoteexa Haallikko podhaxo apooxateesi innaqsnapa hune teexu,
awshoosi pare qaghunkitoosi ihune naqisna.
11 Xeere kaasay hxasottay teexe qhamu aʼalkasintennu olho kaasatay ihune shorokumisna,
korussa kʼarkʼarsa haahundhi inettay usundhe dhaghghapi qhamu Haallikko kaanasninukki usundhe konni.
12 Teexakussa ateexte olho kʼukʼulawhate qhacʼaasi hoqhashenu patta ye kodhdhunna,
kaanaste kishasikki Haallikkonu naqisi.
13 Qhoota Wonkele Kristoosesi akkatepa eeʼe payankuppa usundheesikka ikkodhdha koro pilenukka kʼarʼarsa kodhanku maallay koro kodhmosi haahudhi theemmamipa lighghunnu Haallikkosi ikaanasna.
14 Xinkessi iqhoota haahundhi ghisadhenna teexakossi dhamma Haallikko hune teexina haqti ihhune yora.
15 Qhoota teexakossi huusu olo qalle alkasni maallay Haallikko ikkanasama.