Hxsottay Teexakko Teexe
8
Koro haayyu,
teexakkossi Haallikko Mannaadhdhe Kiristaanay piyye Mekʼdhoniyanna qaghanu teexisi qhama artekka wooni.
2 Rakko usundheema hxafi ho dhikita ikkodhdhakka payyni hxaso huusundhi kapay ho dhamma,
teekunte thuusundhikka the dhikita ikkodhitakka payni teexe huusundhi kapay innaqa.
3 Hu alkasne patta ye kodhdhunna huyye alkasnenna kutay qhamu woʼo huusundhitay teexessa annu masakara.
4 Usundhekka kʼarkʼarsassi akʼulkʼullawhe kathama Iyerusalamenna qaghanu kodhi qhamu konenukki uuma ine waathadhe.
5 Iʼintooseppa ho ine tiqanina ghuttay Pogholhonu he teexokki,
nakalakka woʼo Haallikkitottay ineesi he teexonki,
6 hussa maallay Thitho kodhmossi teexete ixayna qharaʼitha hunena kitatte payyiisi qhamu dhikkisninuy awwaathanni.
7 Hune olho kaasatay hussakka dhukkaysadhepa thorrepa arnopa kokkisadhe dhukattepa cʼikino aʼineesi sheeghtettay qhama inthawte kula,
hantukka kodhmu teexetetakka qhama inthawintenu an hune waathadhaani.
8 Olho anna maallay hasa payi hayo teexenu qandhikka,
naqharay kokkisadhe koro pile hiʼaasina haqti cʼikʼno hahundhi ho dhukatte qhamu kodhdhisa arenu.
9 Teexakko Pogholho haani Iyyesus Kristoosesi aʼaranku,
theekunte thuusuna haqati hune qhama shorokke kodhdhintenu uso inni shshorokito kodhdhinaki hune maallay teekoolakko kodhdhi.
10 Olinna kaaʼitha dhihamte hune pakirra an hune teexni hisi,
perko andheeranna teexe patta ye kodhdhuna teexenu dhihadhettakka hune he payotatte.
11 Hantukka kodhmussa appaayyiteesi qhamu hune alkasami kula dhikkateema hxafasindha,
husakka woʼo ateexenu sheeghte qhamu dhuke kodhdhininuye.
12 Teexenukka wooni payni teexakusa hu akkamni ho an sheeghini kula ghaqitikka an teexni payni dhishoy ini sheeghnina teexenu theemettay qadhikka.
13 Olhanna maallay hasa payni hune qhama rakkateppa koro pilenu ghari maalla qandhima hune kaasay qhama illekito kodhintenu.
14 Xeeri hantuna thirfe thaahundhi erqunko huusudhisikki hoqhqhashinti,
thirfe thuusundhikka erqunko haahundhiisikki hoqhashinti,
husattay olha sheeghte kaasaasi illekito qhootadhinte.
15 Hasi payamtipa tooxamoy:
“Ho olho kisha illeema holsadhinukka yenu haqhu,
ho olho takkaya illeema holsadhinakka yena qhacʼu.”a
Thithoosi Karo piyye Kʼoronthoose kulaki Aeraki
16 Ho dhihadhe thaayyu xeesaasi saqako Thitho kitteema xawwadhi Haallikko ikkaanasama.
17 Moʼo maalla payni Thitho hu karo hahundhi okayi qhoota ine uso waathaninnu patta qandh woʼo huusupa hxaso husuttay.
18 Uso qalekka qhawho haani ho kodhmo wonkelatettay mannadhe kristaana kaasanna kanasamsikki an erakni,
19 husinna ghutay xinkesi an kʼarʼarsa akkenu ashshinina usokka mannaadhdhe kristaanatakki qholami,
kʼarʼasisakka olhanu akkinaani kaanaste Pogholhitopa woʼo xeesa an koro pile kʼarʼarenu sheeghinina haqati.
20 Kodhmu xeesa an kodhanina meethe qhamu yena tayamninnu anhe tiqthadhaani,
21 Moʼo maalla payni alaama haani minte Pogholhitona patta ye kodhdhunna korito miintekka olho xeesa kodhe.
22 Holuppa qhawho haani xeere kishana olho kishattay theemamipa kokkisadhuusikki an koro Thitho qale erakni,
hantukka qhooti uuma huneesi peepadhi maallay ho qharrona kaanta hanthu uumi kokkisadhi.
23 Qhawho qhoota Thitho are woʼa qagha pani uso ho hune kʼarkʼarenu ye qale kodhadha,
holuppa qhawho korossi uso qale okayna kaaʼita are woʼa qagha payni usundhe erkampawhe mannaadhdhe kristaananna he kaanastte Kristoosenu shikaare.
24 Hussa maallay cʼikno haahundhi dhukateesi nu hiʼaasa,
onke hasa lighattay cʼikno haanipa peepadhe an hunettay sheeghini the mala ghaqiti qhamu kodhdhitisa mannadhe kristaana kaasa miinta nu hiʼasa.