He Gharise
7
Lammi koro haayyu,
qhoota an kʼaali kippito sheeghni maallay olho pishikopa Nassoosi lokana he pankanni,
Haallikko ghaapettay Kʼulkʼullonko haanisi ho dhukatte konni.
2 Saqqe haahundhiisi ine ghandhaqisama,
ine yaxanakka ini dhappooni,
yaxasikka ini dhappisooni,
yaxasikka ini tatakooni.
3 Olho anna maallay hasa hunena payi hunema qhaqhitte qhaqhenu qandhi,
moʼo maalla payni xayna qharaʼitha saqqe haanittay qhaman hune cʼikanissa an hune qallini,
hussa maallay qaghotakka ikkodhdha fartetakka ine hune qale.
4 Dhukkaysadhe an hunena sheeghi the dhammay peepadhe an hunetta sheeghi the dhammay,
holuppa uuma an dhikiti,
rakko haani kaasanakka hxaso haayyu hoye dhikkatte sheeghi.
5 Xinkesi an piyye Mekʼdhoniya kula okayninna rakko xaytay xaytannu ineema dhaghghapi dhiishoy ini hxaysadhooni,
settottay paxakko kittatekka ghaapko inena qagha.
6 Ikkodhdhitama kapay Haallikko koro azanaasi dhiktisa okaye Thithotakki ine dhiktisi.
7 Ho an dhikitnikka okaye thuusutta patta qandhimma usoosi qhoota dhikitise maallay.
Yorkopa azane pana dharraʼo ayeesi sheeghteesi iʼine qalli.
Hussa maallay ho qharrona kaanta uumi hxaso ye dhakaadhi.
8 Erko xayna qharaʼitha an hune tooxittay an hune azzansisakka payni hussattay thannu yela haqhi anu payni,
an payakka payni erko haayyutta okkoto patta qhama azantesa an upadhi.
9 Hantu kapay an hxasoodhi,
hxaso haayyukka qhoota azantennu qandhimma azane thaahundhi qhama c’uppito Haallikko kula holtennu qhooti hune kotti maallay,
moʼo maalla payni azane thaahundhi qhamo woʼo Haallikkito kula dhiishoy inettay huni kottaʼamonku.
10 Azane qhamo woʼo Haallikkito kula kodhdhiti cʼuppito karo Haallikkito kulakki koro holasti,
olho an payni thannu yela haqhi ye qaghi.
Azane piyye qhaatʼina kapay farteemi koro dhaghghapoosti.
11 Azanise qhamo woʼo Haallikkito kula kodhdhiti dhiktno mala lighapa malse holase alkase mala lighapa miira mala lighapa dharaʼo mala lighapa ghaapko mala lighapa yehyehinko mala ligha pana haalote mala lighay qhamu hune tayastisa eemindha.
Olittay he olho toʼokokka ye hunena qaghi qhama kodhdhitessa aʼaraste.
12 Lammi erko ano hune tooxi qhoota qhawho dhappi taakki qhoota qhawho ana dhappi kaaʼitha qandhi,
naqharray qhama mala ghaqitti he ineesi dhukkasathama kodhdhitessa qhamu pukkaqate thaahundhiisi Haallikko miinta eemintenu.
13 Inekka ho an dhikitini husattay,
dhikite thaanina kutay hxaso Thithottay inekka uuma an hxasonni,
moʼo maallay payni nasso huususi ahxhxysiste.
14 Peepadhe an hunettay sheeghisi Ththonu annu qalli,
hunekka huni ye palamisonku.
Naqharray olho an hune qallini kaasay qhamu dhuke kodhdhisa qhamussa kula olhossi an qhoota haahundhi usoosi peepadhettay qallini qhamu dhuke kodhdhisa iʼarasi.
15 Usokka ghaapkopa xotholhottay qhama mala uso akkatteppa hune kaasay nu eeʼe paynkussa ihela thayana cʼiknossi ihunesi sheeghi uumi dhikiti.
16 Anokka olho kaasatay an hune peepadha.