Rakko Pawloose Akkadhi
6
He Haallikko qale kodhadha qhamo an kodhdhini kula teexakossi Ahaallikkito akkateesi ho lathu qhamu hune kontennu an kokisnippa isan hune waathadhani.
2 Haallikko hasi payi:
“Saathessi gheeqasanakki an ho apaqhi,
Kuyyaqako dhinkittonakka ho kʼarkʼaara.a”
Haadhi satissa gheeqasakka hantu,
kuyyaqakossi dhinkitokka hantu.
3 Kodhmo haani qhamu ye dhafamninu yaxanukka kuthumatte kodhdhe ini woone.
4 Ladhdhi olho an konni kaasattay qhamo kodhampawhe Haallikkito kulakki an he itʼtʼoosne,
dhuupayte dhammapa rakko dhammapa rakkopa cʼinkʼepa
5 thubhbhamepa shappamepa paqhatopa kodhmo ina naqipa piʼaathe dhapepa puffayepa
6 gharsopa arnopa dhuupaythepa horxuntepa Nasso Kʼulkʼullopa cʼikno dhukattepa
7 thorre dhukattepa humna Haallikkitopa miskitopa pixattettay maahxatho orxankito pare qaghunkitoosi ghapadhepa,
8 kaanastepa palankopa kalatayysamepa dhaghisametakki an qaakni;
holuppa an dhukampawhe kodhdhinina aayyampawhe an payamni.
9 Inna aramaaninna heye arame kulakki an kodhdhini,
iffarre apayana haadhi an qaghaani,
aʼine thubhbhikka payni olo ine paahxu,
10 an azannakakki payni ine he xeere kaasay hxasoodha,
an xiyyaawhe kodhdhinina he kishaasi shorokke an konni,
he olho toʼokokka ye sheeghe an kodhdhininna olho kaasay haani.
11 Hune waarsho Kʼorontoose,
olho kaasasi pareema an hune qallini,
saqqe haanisikka hune qhaashani.
12 Hune ine cʼikadhe hxuri dhiishoy ine ini hune cʼikadhe hxurooni.
13 Qhoota miʼaadhe haayyu kodhdhite maallay oliisikki an hunena thaayise wooni,
hunekka qhamussa kula saqqe haahundhiisi ine qhaasha.
Koro Ye Dhukkaysadhi Qale Qhamu Mala Qaake Kgheeqasi
14 Koro ye dhukkaysadhi qale onke ye ghartitay olo ghaasame.
Moʼo maalla payni Pare qaghunko maghno qale toʼokunko moyto shsheeghi?
Takinti hammakko tukkanko qale toʼokunko moyto shsheeghi?
15 Kristoose bPeliyale qale toʼokunko moyto shsheeghi?
Ho dhukkaysadha hoye dhukkaysadhi qale toʼokunko moyto sheeghi?
16 Manne Haallikkito killanko qale toʼokunko moyto sheeghe?
Ine kulay manne Haallikkossi qaghottay qaghitona,
Haallikkokka hasi payipa qalladhu,
“Qaako Haayusi waarsho Haayu kitta an konni,
usundhe qalekka an qaakna,
Anokka Waako huusundhi an kodhini,
usundhekka waarsho Haayyu ikkodhine” cQhamu paypa qalladhu kula inekka pukkaqatte pukkaqatte Manne Kʼullkʼulampawhe Waakossi qagho sheeghana.
17 Holuppa Haallikko hasi payi:
“Usundhena kitatte rehamindhapa lighanku,
Olho lokmadhiisikka olo kohxe,
Anokka an hune akkanaye.”d
18 “Anokka Appa an hune kodhdhini,
hunekka dhelle haayyu shampidhdhepa ihaadhdhe
ayye kodhdhinte,
iʼiyyi Waakossi olho kaasay alkasa.e”