Kodhampawhe Katape Qhawthitatte
3
Kati an hollaani pukkaqate thaani kaanase paayyaani?
Atam qhamossi koro pile kodhi kulakki taptape kanasatte huneesi taakki hunena iʼine gheeqasti?
2 Hune kulay he koro kaasay hune aripa isi hune nappapa taptappadhdhe saqqeko haanisa tooxamte.
3 Hune he kodhmo haanittay tayamte taptaape Kristoose qhama kodhdhitesa pareemi arami,
hussakka huthooxami kʼalamettay qandhimma Nasso Haallikkossi qaghitottay,
olho ana tooxikka awrukkooma qandhima saqako qhawhitosa.
4 Kristoose kakkoruy Haallikkotay dhukkaysadhe hasa ligha an sheeghni.
5 Alkase thaani Haallikkotay dhiishoy olho toʼokokka ho an paynaani alkase thaanittykki an konni ye qaghi.
6 Kodhampawhe katape qhawthithatte qhaman kodhdhinaaninu ho ine alkase teexi Uso,
hussakka hikkessi atooxittay qandhimma kʼarkʼarsa Nasso Kʼulkʼulitottay,
hikke farteesikki okaasti nassao kapay qaghosikki koro teexi.
7 Lammi waarsho Israʼeelatte kaanaste miinte Muusenna payyati usoosi miinte qila pareema eeme ye alkasnoki,
eeppa hussa xeere qhacʼa tupettay lighghina aʼawrukkooma tooxi kodhmo fartatteki kanastettay armadhi payni,
8 Kodhmo Nasso kʼulkʼullito malaki kaanaste hissana ghula ye sheeghni?
9 Kodhmo koro kutumaki ho kaanasami kodhdhi payni,
kodhmo koro pare qaghasa mala ghaqitikki ho kaanasami kodhdhini!
10 Olhosi xayna qharaʼitha kaanaste sheegha ho hantu kaanaste ghula sheegha qale ahitaxisa payni hoye kaanaste sheeghiki kodhdhi.
11 Ho lighghinaki hasa ghaqqiti kaanaste sheegha payni ho perre ye hume sheeghe qaakna malaki ye kaanaste ghula sheeghni.
12 Lammi kippo hasa ligha qhoota sheeghni maallay shaxuntakki an qallanaani.
13 Waarsho Israelate hxusesi miinte Muusena ippateete qaghanna dhikkateesi qhamu yena hiine maallay kacʼarettakki hela mutʼi,
ine kapay qhamo huusu kula qandhi.
14 Naqharray xinke akatape paʼatte nappapi kaasay lallesi akkaarati haka hantu saasa ye patu maallay saqqe huusundhi inna fafe,
hanthukka lallesi akkaarati ye patu,
hu patintikka Kristoosettay patta.
15 Haka kuyyu saasa matʼafaadhdhe Muusekka nappapi payni lallesi mutʼamatte saqqe huusundhiisi inna mutʼay.
16 Naqharray qhawho toʼokko Pogholho kula holi payni lalle mutʼamatte inna pannay.
17 Haallikko Nasso,
xayto Nasso Haallikkito qaghina hxurransadhe qagha.
18 Ine kaasay miinte ye shudhamutakki an kaanastte Pogholhitoosi qhamo eemadhito hxusnaanippa qhama Uso lighnaaninu kaanastenu karo kaanaste kula oohamnaani.