Kodhmo Erkampakko Dhukatattena
4
Hxurakko Haallikkitona haqati qhoota kodhmu ine teexami maallay kippo ini ghoxne.
2 Naqharray olho bhadhdhamapa olho koro palamisaasi an hela hxurri,
ini koro tataknekka,
Kʼaale Haallikkitoosikka aayya illay ini lahxne,
laadhdhi dhukeesi pareema an qallinaanippa kʼalpe koro kaasanna qhama gharraaninu isan Haallikko miinta he itʼtʼosaani.
3 Wonkele thaani the bhadhdhamti ikkodhdhitakka payni hu bhadhamti he pannanuy.
4 Kristoosessi lighno Haallikkito kodhdhina hammakko kaanaste wonkele thuusuna koro ye dhukkaysadhi qhamu ye hiininu rafisampakkosi piyyinna Seetʼana kʼalpe inna tukkanisi.
5 Ine Iyyesus Kristoose qhamu Pogholho kodhdhiki an torruyni dhiishay ine qandhikki he qalla,
qhoota Huusu maallakki an huneesi aylaadhdhe he konni.
6 Haallikko Iyyesus Kristoose Miinta hammakko arno kaanaste Thuusuna qhamu ine teexninu “Haallikkossi thukankito hammakko ihammasama”a payi,
hammakko Huusuusi saqqe haani kitteemi ine hammasi.
7 Naqharray humni uuma dhamma ho Haallikkito dhiishay haani qhamu ye kodhdhusa hiʼaasenu olisa kaanasamiisi ine hessi maahxato acʼoqholito kodhdhi kula lighana kittati qaghi.
8 Xayta xaytattay aʼine rakkisakka payni ini tankarkare,
an hela tupe dhapnakka payni ini kippo qhaqhne,
9 aʼine ghoghorikka payni ini ranneppa hasa haqhaani,
aʼine tubhbhinapa ranaani dhiishoy ini panne;
10 qagho Iyyesuse qhamu pishko haanina armaninu farte Iyyesusesikki an xeere kaasay pishko haanina dhooqhanipa isan aʼashshaani.
11 Qagho Iyyesuse qhamu pishko haani farrana kittatte armaninu,
ine he qagho sheegha xeere kaasay qhoota Iyyesuse maallay fartenukka alighineppa teexamani.
12 Hussa maallay fartte inenakki kodhatti,
qagho kapay hunenakki kodhadhi.
13 Naqharray “An dhukkaysadhipa hussa maallay qalladha”b qhamu payamtipa tooxamo kula,
inekka nasussa dhukkaysadhatettay an dhukkaysanni,
hussa maallay lammi an qallanaani,
14 moʼo maalla payni Haallikkossi Pogholho Iyyesuseesi fartatte haqisi ineesikka qhamu Uso qale ine haqisnipa hune illay miinte Thuususa ine itʼtʼoosussa an araani.
15 Teexakussa he kishanu dhaghghapatte qagha kaanaste Haallikkonu kalatha sappa kalatha qhamu padhawamninu,
husi kaasay pakirko haahundhinukki kodhdhi.
16 Hussa maallay ini kippo qhaqhne,
pishko haani seetito panna kakki payni kitte thaani kuyyaqako kuyyaqakoomi qhawthumti.
17 Moʼo maallay payni rakku haani sholoʼapa hantu lighghina karo kaanaste olho ana qale kitaxasni ye qaghi perre ye hume sheeghekki ine tayasni.
18 Hussa maallay ehxhxe haani hu pareema eeme olho hantu armadha qandhima hoye armadhiisi,
olho hantu armadha hoye olanni,
hoye armadhi kapay ho perre ye hume sheeghenna.