2
Lammi qhoota anu hune asanise woʼi maallay qhamu anu laanka hune kula okayninukki an qhutʼadhi.
2 An hune asanisakakki payni hunisa an hune asanisi malettay ho ye hxaseesa yaxa?
3 Olhanna maallay hasa hune tooxi,
an hune kula okaayana koro yeesi hxasese gheeqasa qhamu yeye asanisninu;
moʼo maalla payni hxaso haayyu hxaso hune kaasanna qhamu kodhdhinisa an dhukkaysadha.
4 An husaasi hune thooxana asane dhammappa saqakottay rakkadhepa ooye dhammatakki an kodhdhi,
olho anna maallay husiisi kodhi cʼikno dhikita an huneesi sheeghi qhama artenu dhiishoy huneesi asanisenu qandhikka.
Qhawho Inena Dhappinu Hxure
5 Yaxakkakki qhawho azanisi payni iyye folsise kodhdhe hxurtama hu asanisi yeesi patta qandhimma hune kaasaasi.
6 Qhawho hasa ligha qhaqhitte koro kisha na qhaqhi iʼuso hxafnay.
7 Holuppa qhamu ye uuma azanippa kippo qhaqhu maallay hxurakko nu kodhepa dhiktise hune gheeqasa.
8 Hussa maallay hantukka he uso cʼikadha qhama kodhdhitesa thinku annu hiʼaasenu an hune waathadha.
9 Olhanna maallay Erku hune thooxi themmatte huneema hxafnana he dhuupadhepa he olho kaasattay eeʼe paya qhama kodhdhithesa arenu.
10 Qhawho hune nu hxurakko hxurte anokka annu hxurra,
karay olhanu hxurriki qagha payni hannu Kristoose minteema hxuri qhoota haahundhi maallay.
11 Olhanu hasa konne Seetʼana qhamu ye bhaaqhqhe xullete tayaninu,
moʼo maalla payni dhihadhe thuususi ini dhappine.
Rakko Piyye Tʼiroʼadhdhasa Pawlooseema hxafi
12 Xinke an wonkele Kristoose thorruyenu karo Tʼiroʼadhdha ashshina Pogholho mankaxe iyye qhaashi.
13 Ikkodhdhitama kapay qaso haayyu Thithoosi qhota anu hiʼu maallay anu hxasoodhukka,
hussa maallay korosiisi an nakaysadhipa karo Mekʼdhoniya ashsho.
14 Naqharray Haallikkossi xeere kaasay inesi he Kristoosettay puta ine kodhipa ine inthawupa oshoqono arno huusunakka inettay xayto kaasay isi armatheesanu kalatha innu kodhdha.
15 Moʼo maallay payni ine he dhinnapa he panana kittatte Haallikkonu oshoqono Kristoose.
16 He pannanu ine oshoqono karo farttatte usundhetta ashshina,
he dhinnanu kapay oshoqono qaghito karo qaghito usundhettay ashshina,
lammi ho kodhmunnu gharra yaxa?
17 Ine kulay korossi Kʼaale Haallikkitoosi maahxhxe niktatte kula lahxapa isi lassa kula qandhi,
naqharray ine he koro Haallikkito kaanta erkami kula Kristoosettay kodhdhinippa isan Haallikkito miinatte xeesnottay qalladhaani.