Erko Erkampakko Pawloose Laankay Koro Kathama Kʼoronthoosennu
1
Ano Pawloosessi woʼoko Haallikkitottay erkampakko Iyyesus Kristoose kodhdhipa qhawho haani Tʼimothoose.
Hune heessi toʼokunko koro dhukkaysadha Haallikkito kathama Kʼoronthoosenna qaghapa kʼulkʼullaawhessi piyye Akkayiyanna qaaka kaasannu.
2 Paappo haani Haallikkopa Poogholho haani Iyyesus Kristoosena kaanta faroote xeesapa (teexakkopa) nakayho ihhune kodhdha.
Dhikitise Haallikkito
3 Paappo hxurakkitopa hossi dhikitno kaasanna Haallikko kodhdhi,
Paappo Pogholho haani Iyyesus Kristoose Haallikko ho kaanasami kodhdha.
4 Ine pukkaqate thaanina dhikitnossi an Haallikkito tayannittay he rakkito kittatte qaghaasi qhama dhiktise alkasnaaninnu Uso rakko haani kaasanna iʼine dhiktisna.
5 Qootʼo Kristoose qhamu ineema naqi kula dhikite thaanikka Kristoosettay iʼine naqnay.
6 Ine arrakko akkanekka payni hune dhikitnopa dhinko attayadhinte,
holuppa hunekka rakkossi ine akkaniisi dhuupaythetakki aʼakadhinteppa dhikitankuy.
7 Kippo an huneesi sheeghni ho dhikita,
moʼo maalla payni qhama ine qale rakkatte kula qhama ine qale dhiktintessa an araani.
8 Koro haayyu,
rakko an piyye Isiyanna qaghanina ineema hxafiisi qhama artekka wooni;
qaghottay qaghe haanikakki haaka an kippo ghoxnaani saasa rakko dhikita ho inena ghutay kodhdhiki ineema hxafii;
9 Karayekka qhama qhaqhitte fartatte ina qhaqhisa iʼine dhakaati,
hussakka hu hasa kodhdhi Haallikkossi he farreesi fartatte haqisattay qhamu an peepananinnu dhiishoy humna haanittay qandhikka.
10 Uso rakko hasa lighanakki ine dhinisi,
inedhinsnakka,
holuppa karo miinatekka qhamu ine dhinisnisa Usooma kippo konni.
11 Hune ghissoote thaahundhittay ine kʼarkʼaara,
moʼo maalla payni teexakkosi koro kisha ine ghissadhittay an tayani maallay koro kisha qhoota haani kalati itʼtʼoosi.
Pawloose Ashanko Huusuusi Karo Pili Oohi
12 Lammi peepadhe thaani thisi,
hassa piyye qhatʼinna saqqi thoʼoknko an hune qale sheghnittay kʼulkʼullunko Haallikkitopa dhihadhe xeesay qhaman sheghnaninnu kʼalpe thaani iʼine qallay,
hussakka arnane koritottay ye kodhdhunna teexakko Haallikkitottay.
13 Olho anapapteppa isa hela taayanku malettay olho pile ini hune tooxne,
olho kaasasi qhama upatesa an kippo kodhi,
14 hune qhama inettay peepattepa inekka isan hunetta pepadhaanisa hantu okoto aʼartekka payni kuyyaqako Pogholho Iyyesuse okaayina olho kaasasi aʼupananku.
15 Husittay qhoota an dhukampako kodhdhi maalay laanka qhama teexakko tayadhintennu an inthoosipa hune emmenu qhutʼadha.
16 Hussakka an karo piyye Mekʼdhooniya kula ashshanakki an he mintay hune emminipa an haaha hxafipa isan holana hunena kaanta hxafopa an karo piyye Yihudha kula ashshana ye laghghankukki awwoʼi ahxay.
17 An husaasi dhihadhana qhawho ye pareema dhihadhukki an hune lighi?
Atam kati qhamo kollinko piyyinna kulakki eeʼe!
Holuppa haamakata errayto paya an hune lighi?
18 Haallikko ho dhukkaysatama qhamu kodhdhi kula olho an hune qallinikka eeʼe!
Takki errayto kodhdhe ye gheeqasi.
19 Moʼo maalla payni anokka an kodhdha Silwaanoosepa Tʼimothoose,
hossi an hune qallini Miʼayyessi Haallikkito Iyyesus Kristoose eeʼe!
Takki minakale errayto qandhi,
naqharray Usottay eeʼe patta.
20 Kippo Haallikkottay teexami kaasay hu eeʼe kodhdhi Usottay,
inekka hussa maallakki an Usottay kaanaste Haallikkitonu Amen payyni.
21 Lammi inepa hunekka Kristoosettay qhama dhikitnaanippa shikkaraani ho ine konna Haallikko,
ho kodhmo huusuu ine rehadhi Uso.
22 Huusu qhaman kodhdhinaaninu ho maathama huusuusi ineema shoqhi Uso,
holuppa olho an karo miinatte tayanaaninukka ho Nasso Huusuusi waase kodhipa saqqe haanisa ine teexu Uso.
23 Karo piyye Kʼoronthoose kula olho anu namaallay laanka okayu qhamu anu huna miironippa miira haayyutay azanaku maallay,
dhukekki ye kodhdhu payni Haallikkoki yeesi misikire.
24 Ho adhikitinteppa shikkaranku dhukkaysadhettay qhooti kodhdhi maallay qhama hxasodhintenukki an hune qale kodhanaani dhiishoy dhukkaysadhe thaahundhisa waannaadhe kodhdhenu qandhikka.